ბათუმელებს შეუძლიათ - თურქული ბარიერი გადასალახია!

რამდენიმე საათში ქართველი გულშემატკივრების მთელი ყურადღება ბათუმისკენ იქნება მიმართული. იქაური "დინამო" ეცდება, მოჯადოებული წრე გაარღვიოს და ქართული კლუბი ევროტურნირის ჯგუფურ ეტაპზე ვიხილოთ.

კონფერენს ლიგა ევროპის რანგით მესამე ტურნირია, მაგრამ ახლა ამას გადამწყვეტი მნიშვნელობა არ აქვს. მთავარია, ერთხელ საკუთარ თავზე მაღლა ახტომა შევძლოთ და იქნებ ამ ბაზისზე ჩემპიონთა ლიგა უფრო იოლად დაეშენოს. თურქული ბარიერის წარმატებით გადალახვის შემთხვევაში წინ მხოლოდ ერთი წინაღობა დარჩება...

ბათუმის "დინამოში" თავი კარგმა კონტინგენტმა მოიყარა - გამოცდილება და ახალგაზრდული ჟინი პროდუქტიულად შეირწყა. გია გეგუჩაძის ევროპული გამოცდილება, როგორც ჩანს, გუნდზე თავის დადებით გავლენას ახდენს.

რაც ბათუმელებმა ბორისოვოში შეძლეს, იოლი არავისთვისაა - ასე დამაჯერებლად მოიგო შეხვედრა, რომელსაც ორი მატჩის ჯამში უკვე 0:2-ს აგებ...

თურქული კლუბი კიდევ უფრო მაღალი დონეა, თუმცა ეს ის თამასა არაა, რომელზეც ვერ უნდა გადავაბიჯოთ. "სივასპორს" უკანასკნელი ორი წლის განმავლობაში სერიოზული პროგრესი აქვს და ევროტურნირებზე გასვლას ახერხებს -  გასულ სეზონში ევროპა ლიგის ჯგუფურ ეტაპზე გააღწია.

კონფერენს ლიგის საწყის რაუნდში თურქებმა მოლდოვის "პეტროკუბს" მოკრძალებულად აჯობეს, მაგრამ დღევანდელ მეტოქეს საკმაოდ ბევრი გააქვს და უშვებს კიდეც - მაგალითად,  სუპერლიგის გასულ სეზონში ისეთი ანგარიშებით გაიმარჯვა, როგორებიცაა 5:3 და 4:2.

თურქეთის ჩემპიონატის 2020-21 წლების სეზონში "სივასპორის" რიგებში კოტ დ'ივუარელი ლეგიონერი, 33 წლის მაქს გრადელი ბრწყინავდა, რომელმაც 11 გოლი გაიტანა და 13(!) საგოლე გადაცემა შეასრულა. მოლდოველებთან აიობა კაიოდემ გაიტანა, რომელიც ასევე გამორჩეულია; გუნდში ახალწვეულ მცველ დიმიტრიოს გაუდასის ეიმედებათ, რომელიც "ატრომიტოსის" რიგებში გამოდიოდა.