დღეს, 31 აგვისტოს, ზაფხულის სატრანსფერო ფანჯრის ბოლო დღეა. გთავაზობთ სიახლეებს:
საულ ნიგესი მადრიდის "ატლეტიკოს", დიდი ალბათობით, დღეს არ დატოვებს. მანამ, სანამ სატრანსფერო ფანჯარა დაიხურება, "როხი ბლანკოს" ხელმძღვანელობა მის გასხვისებას შეეცდება, თუმცა რეალური მსურველი კლუბს აღარ დაკავშირებია. შეგახსენებთ, ესპანელი ფეხბურთელით "ბარსელონა" და "ჩელსი" ინტერესდებოდნენ.
ხერარდ მორენოს თქმით, "ბარსელონას" "მანჩესტერ იუნაიტედის" ურუგვაელი ფორვარდი ედინსონ კავანი სურს. მას შემდეგ, რაც "წითელი ეშმაკების" რიგებში კრიშტიანო რონალდო დაბრუნდა, საუბარი მიმდინარეობს, რომ კავანი გუნდს დატოვებდა. "ბლაუგრანას" ხელმძღვანელობა ფეხბურთელთან პირად დეტალებზე ცდილობს შეთანხმებას, ინგლისელებისთვის კი ოფიციალური წინადადებით
ჯერ არ მიუმართავთ.
The Mirror-ის მიხედვით, პიერ-ემერიკ ობამეიანგი "არსენალში" დარჩება. ფეხბურთელს სხვადასხვა გუნდს უკავშირებენ, თუმცა "მეთოფეები" მას მხოლოდ სარფიანი გარიგების შემთხვევაში შეელევა.
"ვესტ ჰემმა" მოსკოვის ცსკა-დან ხორვატი ნიკოლა ვლასიჩი დაიმატა. ფეხბურთელმა "ჩაქუჩებთან" ხელი 5-წლიან კონტრაქტს მოაწერა.
L'Equipe-ის მიხედვით, ედუარდო კამავინგა სულ მალე მადრიდის "რეალის" ფეხბურთელი გახდება. სატრანსფერო ღირებულება 40-45 მილიონს შეადგენს. "რენი" ფრანგის გასაშვებად მზადაა.
დანიელ ჯეიმსი "მანჩესტერ იუნაიტედიდან" კარიერას "ლიდსში" განაგრძობს. "წითელმა ეშმაკებმა" ფეხბურთელის სანაცვლოდ 29 მილიონი ევრო მიიღო. უელსელი ფეხბურთელი სამედიცინო შემოწმებას დღეს გაივლის.
"ჩელსი" იულეს კოუნდეს არ ეშვება, "სევილიამ" კი ფეხბურთელის სანაცვლოდ 80 მილიონი ევრო მოითხოვა. ანდალუსიელების თქმით, ისინი სხვა თანხაზე მოლაპარაკებაზე არ წავლენ.
სატრანსფერო ფანჯრის ბოლო დღეს ჰექტორ ბელერინი, დიდი ალბათობით, "ბეტისში" გადაბარგდება. ესპანელ ფეხბურთელს რამდენიმე თვეა "არსენალის" დატოვებას უწინასწარმეტყველებდნენ. აღსანიშნავია, რომ მარჯვენა მცველით მილანის "ინტერიც" ინტერესდებოდა, თუმცა გარიგება ჩაიშალა.
RAC1-ის ცნობით, "ბარსელონამ" მადრიდის "ატლეტიკოს" ჟოაო ფელიშის იჯარის თაობაზე მიმართა. "როხი ბლანკოს" პოზიცია ჯერჯერობით უცნობია. შეგახსენებთ, "ბლაუგრანას" თავდაპირველად პორტუგალიელი ფეხბურთელის ანტუან გრიზმანში გაცვლა სურდა.
მომზადებულია marca-ს მიხედვით
