რა ითქვა "რეალი" - "ბარსელონას" ნამატჩევს

მადრიდის "რეალმა" "ბარსელონა" მადრიდშიც დაამარცხა (2:0) და ესპანეთის სუპერთასი მოიგო. თამაშის შემდეგ მეტოქე გუნდების მწვრთნელებმა და ფეხბურთელებმა კომენტარები გააკეთეს.

ზინედინ ზიდანი (რეალის მწვრთნელი):"დღეს ყველამ კარგად ითამაშა, მარტო მარკო ასენსიომ კი არა. სეზონი დიდებულად დავიწყეთ, ორი სუპერთასი მოვიგეთ. პირველ ტაიმში ბურთს უკეთ ვფლობდით და თამაში უფრო სანახაობრივი გამოვიდა. მეორე ტაიმში კატალონიელებმა მოუმატეს, მაგრამ ჩვენ დადებით შედეგს მივაღწიეთ, რაც გვახარებს. "ბარსასთან" დაპირისპირებები? ეს პრიმერაზე ხელახლა იწყება და რთული სეზონი გველის".

დანიელ კარვახალი (რეალის მცველი):"ჩვენ უბრალოდ გავიმარჯვეთ. მეტოქე პირველ 20 წუთში დავჯაბნეთ. მარკო ასენსიოს დონეს ყოველდღე ვნახულობთ ვარჯიშებზე. შესანიშნავი დარტყმა აქვს და მისი გოლები არ გვაკვირვებს. ჩინებული გუნდი გვყავს და ყველა ტურნირზე ვიმარჯვებთ. წინ ბევრი მატჩი გველის და ბევრს ვიშრომებთ".

ერნესტო ვალვერდე (ბარსელონას მწვრთნელი):"უნდა ვაღიაროთ, მომენტებში "რეალი" გვჯობდა. განსაკუთრებით პირველი ტაიმის დასაწყისში და ბოლოსკენ. თამაშის გარდატეხის შანსი გვქონდა, მაგრამ ვერ გამოვიყენეთ. მადრიდელები აქტიურ პრესინგს მიმართავდნენ და გვსჯიდნენ ბურთის დაკარგვისთვის. მალე ჩემპიონატი იწყება და ფიზიკური მომზადების გაუმჯობესება გვმართებს. წინ უნდა ვიაროთ, სხვა გზა არა გვაქვს. ყველაფერი მხოლოდ ახლა იწყება. ფეხბურთში დაუმარცხებელი არავინაა და უეჭველია "რეალიც" დამარცხდება ხოლმე".

ჟორდი ალბა (ბარსელონას მცველი):"მადრიდელები კარგად გვმეურვეობდნენ, ბურთის ფლობის საშუალებას არ გვაძლევდნენ. მეორე ტაიმში თამაში გამოვასწორეთ, თუმცა მოწინააღმდეგემ ორივე შეხვედრაში გვაჯობა. კარგი გუნდი ყავთ, განსაკუთრებით ნახევარდაცვა. ჩვენთან შეხვედრებისთვის მაგრად მომზადებულან. სამწუხაროა, მაგრამ საჭიროა დავივიწყოთ მომხდარი და მომავალზე ვიფიქროთ. აშკარაა, დღეს გაგვიჭირდა, თუმცა სეზონი მხოლოდ ახლა იწყება. ყველაფერი წინაა. დარწმუნებული ვარ, ყველაფერი მოწესრიგდება".