მოსკოვის "ლოკომოტივი" პირველად თამაშობს ევროპალიგის მერვედფინალში. ბუნებრივია, პირველია ეს ეტაპი საბა კვირკველიასთვისაც. საბას სერიოზული გამომცდელები ეყოლება მადრიდში - დიეგო კოშტა და ანტუან გრიზმანი.
ატლეტიკო-ლოკომოტივი
"ლოკომოტივი" უკვე მადრიდშია და მატჩისთვის ემზადება. საბა კვირკველია, რა თქმა უნდა, რუსული კლუბის ძირითად შემადგენლობაში ითამაშებს. დიეგო სიმეონეს გუნდში შეტევის ტანდემი ძალიან სახიფათოა - დიეგო კოშტა და ანტუან გრიზმანი. ქართველს ერთი სული აქვს, როდის გამოცდის თავს ამ დონეზე და როდის დაუპირისპირდება "ატლეტიკოს".
ფაქტები
- "ატლეტიკომ" ზედიზედ 5 მატჩი ისე მოიგო შინ, რომ გოლი არ გაუშვია.
- "ლოკომოტივს" ესპანეთში ჯერ მოგებული არა აქვს - 1 ფრე, 5 წაგება.
- "ლოკომოტივი" ევროპალიგის 1/8-ფინალში პირველად თამაშობს.
- "ატლეტიკომ" ბოლო ოთხ ცდაზე სულ მცირე, მეოთხედფინალში იასპარეზა ევროპალიგაზე.
ცსკა-ლიონი
ფრანგები გუნდის ლიდერის, ნაბილ ფეკირის გარეშე ჩავიდნენ მოსკოვში, რაც "ლიონისთვის" უდიდესი დანაკლისია.
ფაქტები
- ამ ორ კლუბს ერთმანეთში აქამდე არასოდეს უთამაშია.
- 2018 წელს ცსკა-ს სამ ოფიციალურ თამაშში ჯერ გოლი არ გაუშვია.
- "ლიონმა" შარშან ამ ტურნირის ნახევარფინალში ითამაშა.
ლაციო-დინამო
იტალიურ-უკრაინულ დაპირისპირებაში პირველის უპირატესობა აშკარაა, მაგრამ ისტორია ბევრს არ ნიშნავს. "ლაციოს" წინა მატჩში დისკვალიფიცირებული ლუის ფელიპე უბრუნდება.
ფაქტები
- 1999 წელს ამ ორი კლუბის ორივე დაპირისპირებაში "ლაციომ" იმარჯვა.
- "ლაციომ" შინ უკრაინულ კლუბებთან 5-დან 5 ორთაბრძოლა მოიგო.
- ევროპალიგის ამ გათამაშებაში ყველაზე მეტი გოლი სწორედ "ლაციომ" და "დინამომ" გაიტანეს.
სპორტინგი-პლზენი
ამ წყვილში ფავორიტი პორტუგალიური გრანდია. ბრუნო ფერნანდეშს ევროპალიგის 2 მატჩში სამი გოლი აქვს გატანილი.
ფაქტები
- "სპორტინგი" ევროპალიგაზე შინ საშინლად თამაშობს - ბოლო 7 მატჩიდან ერთი მოიგო.
- "პლზენი" სტუმრად ვერ ვარგა - ბოლო 14 მატჩში მხოლოდ ერთი თამაში მოიგო.
მარსელი-ბილბაო
"მარსელის" გულშემატკივრებს ცუდად ახსოვთ 2016 წელი, როცა 1/16-ფინალში არიც ადურისმა 1:0 მოაგებინა "ბილბაოს" "ველოდრომზე". ადურისი ისევ ბასკური კლუბის შემადგენლობაშია.
ფაქტები
- ამ სეზონში "მარსელი" შინ ევროთასებზე არ დამარცხებულა.
- არიც ადურისი (ბილბაო) ევროპალიგის მიმდინარე გათამაშების ბომბარდირია - 7 გოლი.
- ორივე გუნდი ევროპალიგის მესამე საკვალიფიკაციო წრიდან მოდის.
დორტმუნდი-ზალცბურგი
ფაქტები
- "დორტმუნდს" ავსტრიულ კლუბებთან 4-დან 4 მოგება აქვს.
- "ზალცბურგის" ბოლო 9 საგარეო მატჩი - 4 მოგება, 5 ფრე.
- ავსტრიის ჩემპიონს გერმანიაში ჯერ თამაში არ მოუგია.
მილანი-არსენალი
ამ ტურნირის ფავორიტთა შეხვედრა დიდ ინტერესს იწვევს. ეს ტურნირი, ალბათ, არსენ ვენგერის ბოლო შანსია. არადა, ახლა "მეთოფეები" საშინელ ფორმაში არიან, ჯენარო გატუზოს გუნდი კი - პირიქით. მართალია, გატუზომ პრესკონფერენციაზე აქო და ადიდა ვენგერი, ჩემი მასთან შედარებაც კი არ შეიძლებაო, მაგრამ ფაქტია - ლონდონური კლუბი ახლა შავ დღეშია და "მილანი" დაპირისპირების ფავორიტია.
ფაქტები
- "მილანს" 6 თამაშია, გოლი არ გაუშვია.
- "არსენალმა" ბოლო 4 თამაში წააგო.
- 2008 წელს "არსენალმა" "სან სიროზე" 2:0 მოიგო.
- 2012 წელს იქვე "მილანმა" "არსენალი" 4:0 გაანადგურა.
ლაიპციგი-ზენიტი
"ზენიტს" ამ შეხვედრაში დისკვალიფიცირებული ლეანდრო პარედესი არ ეყოლება.
ფაქტები
- "ლაიპციგი" რუსულ კლუბს ისტორიაში პირველად ხვდება.
- ბოლო 4 თამაშია, გერმანულ კლუბს არ მოუგია.
- "ზენიტი" გერმანიაში - 3 მოგება, 2 ფრე, 3 წაგება.
ხუთშაბათი, 8 მარტი
მილანი-არსენალი 22:00
ატლეტიკო-ლოკომოტივი მ. 22:00
ცსკა-ლიონი 22:00
დორტმუნდი-ზალცბურგი 22:00
ლაციო-დინამო კ. 00:05
მარსელი-ბილბაო 00:05
ლაიპციგი-ზენიტი 00:05
სპორტინგი-პლზენი 00:05
(იბეჭდება მცირე ცვლილებით)
ყოველდღიური სპორტული გაზეთი "ლელო"
