ვინჩენცო მონტელა: "მილანში" ახალი ერა იწყება!

დღეს, ევროპალიგის მესამე საკვალიფიკაციო ეტაპის საპასუხო მატჩში "მილანი" რუმინულ "კრაიოვას" უმასპინძლებს. "როსონერის" პირველი მატჩი 1:0 აქვს მოგებული და, დიდი ალბათობით, ამ წყვილში ყველაფერი გადაწყვეტილია, მაგრამ თუ იტალიურ მედიას ვენდობით, სტადიონზე სანთლით საძებარი იქნება თავისუფალი ადგილი.

საქმე ის არის, რომ ბოლო წლებში პირველად, "მილანს" ნაყოფიერი სატრანსფერო კამპანია ჰქონდა და, წესით, მომავალ სეზონში მხოლოდ მაღალი მიზნებისთვის უნდა იბრძოლოს. რუმინულ კლუბთან საშინაო მატჩი კი ახალი "მილანის" ერთგვარი საშინაო პრეზენტაციაა. აი, რას ამბობს გუნდის თავკაცი ვინჩენცო მონტელა:

"აქ დიდი ხანია, ვარ და ზუსტად ვიცი, რას ითხოვენ ჩვენგან გულშემატკივრები. ბოლო წლებში "მილანი" ვერ თამაშობდა ისე, როგორც ეს მის ისტორიას ეკადრება და ჩვენ ეს აუცილებლად უნდა გამოვასწოროთ. რა თქმა უნდა, ველოდები კარგ და ბოლო სეზონებისგან განსხვავებულ კამპანიას ჩვენი დიდი კლუბისთვის.

სატრანსფერო ბაზარზე ძალიან ვიაქტიურეთ და ახლა ეს ყველაფერი მინდორზე უნდა აისახოს. ჩვენ შეგვწევს ამის ძალა. მოხარული ვარ, რომ ყველანი ვართ მონაწილენი იმ ახალი ერისა, რომელიც იწყება კლუბის ცხოვრებაში. უდიდეს სიამოვნებას მანიჭებს აქ მუშაობა, თუმცა ვიცი ისიც, რომ ჩვენი პასუხისმგებლობა გაზრდილია და ჩვენი თამასა ძალიან მაღლაა აწეული. ყველას მუშაობა, ფეხბურთელისა თუ მწვრთნელის, ფასდება შედეგით და ნებისმიერ შემთხვევაში ეს შედეგი უნდა იყოს კარგი, მით უმეტეს, იმ ფეხბურთელებით, რომლებიც დავიმატეთ...

რაც შეეხება მეტოქეს, პირველმა მატჩმა დაგვარწმუნა, რომ საქმე გვაქვს კარგად ორგანიზებულ მოწინააღმდეგესთან, რომელიც სივრცეებს არ გიტოვებს დაცვაში და უპირატესობას ანიჭებს სწრაფ კონტრშეტევებს. რა თქმა უნდა, ჩვენი მიზანი კვლავ გამარჯვებაა, მით უმეტეს, ჩვენი გულშემატკივრის თვალწინ, რომელიც ბევრს იმსახურებს.

...კაპიტანი აქამდე ყოველთვის გუნდის შიგნით ირჩეოდა. კლუბის ახალმა მეპატრონეებმა მთხოვეს მე, რომ აგვერჩია კაპიტანი იმ ფეხბურთელებიდან, რომლებიც "მილანს" ახლა შეუერთდნენ. ეს იქნება იმ კურსის სარგებლიანობის ხაზგასმა, რომელიც ჩვენ ავირჩიეთ. ჯერ დრო მჭირდება, ამ თემაზე არ ჩამოვყალიბებულვარ...

...დონარუმა? ის ძალიან მონდომებულია. როგორც იცით, მან ძალიან ბევრი გადაიტანა მთელი ზაფხულის განმავლობაში. სულ ყურადღების ქვეშ იყო და, ცხადია, ამას თან სდევს გარკვეული სტრესი. ამასთან ერთად, ეს იყო ერთობ სასარგებლო გამოცდილება მისთვის. ვამჩნევ, რომ დონარუმა აშკარად გაიზარდა...

რაც შეეხება სატრანსფერო ამბებს, ჩვენ ვმუშაობთ კიდევ ერთი თავდამსხმელის მოსაყვანად, მაგრამ არ ვჩქარობთ. გვინდა, ყველაფერი გავაანალიზოთ და ისე მივიღოთ საბოლოო გადაწყვეტილება. ანდრე სილვა ახლახან შეუერთდა გუნდს და მას ჯერ კიდევ სჭირდება გარკვეული დრო ადაპტაციისთვის. პატარა პრობლემა ჰქონდა თითზე, მაგრამ ყველაფერი მოგვარდა...

...ჰაკან ჩალჰანოღლუს ბოლოს სათამაშო პრაქტიკა აკლდა, მაგრამ ის თავდადებით მუშაობს ამ ხარვეზის გამოსასწორებლად და მჯერა, რომ შედეგს მივიღებთ. ჰაკანი დიდი ტალანტია - ამის თქმა ახლავე შემიძლია!..

სუსო გუნდთან ერთადაა. მას ჰქონდა ტრავმა და ეს ხელს უშლიდა ვარჯიშში. ახლა ის ბოლომდე იტვირთება და მე მომწონს, თუ როგორ იხარჯება ვარჯიშებზე. მას სჭირდება სათამაშო პრაქტიკა და სუსო ხელს მიწყობს იმაში, რომ უფრო მეტი არჩევანი მქონდეს...

...ისევ დონარუმას დავუბრუნდები. დარწმუნებული ვარ, როგორც მისთვის, ისე მთელი გუნდისთვის, ძალიან სასარგებლო და წარმატებული იქნება "კრაიოვასთან" მატჩი. დონარუმამ თავისი საქციელით ნათლად აჩვენა, რომ მას ძალიან უყვარს "მილანი" და ის ამისთვის დიდ პატივისცემას იმსახურებს - როგორც ჩვენი, ისე გულშემატკივრების მხრიდან...

ანშლაგი "სან სიროზე"? ეს დიდებული იქნება! ეს იქნება დამატებითი მოტივაცია როგორც ჩემთვის, ისე ჩემი ფეხბურთელებისთვის. მინდორზე გავლენ ფეხბურთელები, რომლებიც ბოლომდე იქნებიან მზად. ამასთან, არ მინდა, ეს იყოს ზედმეტი წნეხი ფეხბურთელებისთვის.

დარჩება თუ არა პატრიკ კუტრონე? ბევრს გაუკვირდა, რომ პირველ მატჩში ის ძირითადში დავაყენე. მე მომწონს მასთან მუშაობა, ის სწრაფად იზრდება და გაცილებით უკეთესია, ვიდრე თუნდაც შარშან იყო", - თქვა ვინჩენცო მონტელამ პრესკონფერენციაზე.

ყოველდღიური სპორტული გაზეთი "ლელო"