გუშინ, 8 სექტემბერს, მსოფლიოს საკვალიფიკაციო ეტაპის მე-6 ტურის მორიგი შეხვედრები გაიმართა.
ვარშავაში, ადგილობრივმა პოლონეთმა ინგლისს უმასპინძლა, შეხვედრა ფრედ, 1:1 დასრულდა.
უგოლო პირველი ტაიმის შემდეგ, ინგლისელები 72-ე წუთზე ჰარი კეინმა დააწინაურა, თითქოს და მატჩიც "სამი ლომის" გამარჯებით უნდა დასრულებულიყო, თუმცა მსაჯის მიერ კომპენსირებულ დროში რობერტ ლევანდოვსკის გადაცემით დამიან შიმანსკიმ ისარგებლა და წონასწორობა აღადგინა.
ამრიგად, I ჯგუფში სიტუაცია დაძაბულია, 16 ქულით 1-ელ ადგილს ინგლისი იკავებს, პოლონეთს 11 ქულა აქვს და მე-3 ადგილზე იმყოფება, მათ შუაში კი 12 ქულით ალბანეთია.
"სამი ლომი" მომდევნო შეხვედრას 9 ოქტომბერს, ანდორის წინააღმდეგ გამართავს, პოლონეთi იმავე რიცხვში სან მარინოს უმასპინძლებს.
რეიკიავიკში, ადგილობრივმა ისლანდიამ, გერმანიას უმასპინძლა და 0:4 დამარცხდა.
"ბუნდეს ნაკრებმა" თავიდანვე აგრესიულად დაიწყo, პირველი გოლი მე-4 წუთზე გაიტანეს, თავი სერჟ გნაბრიმ გამოიჩინა, 24-ე წუთზე ანტონიო რუდიგერმა შესანიშნავი თავური დარტყმით სხვაობა ორამდე გაზარდა.
მეორე ტაიმში 56-ე წუთზე ლეროი სანემ ლეონ გორეცკას გადაცემით ისარგებლა და სხვაობა სამბურთიანი გახადა, მატჩის საბოლოო ანგარიში კი ტიმო ვერნერმა 88-ე წუთზე დააფიქსირა.
ამრიგად, J ჯგუფს 15 ქულით გერმანია ლიდერობს, ისლანდია 4 ქულით მე-5 ადგილზე იმყოფება.
"ბუნდეს ნაკრები" მომდევნო შეხვედრას 8 ოქტომბერს, რუმინეთის წინააღმდეგ გამართავს, ისლანდიელები იმავე რიცხვში სომხებს უმასპინძლებენ.
ევროპის მოქმედმა ჩემპიონმა იტალიამ საკუთარ კედლებში ლიეტუვა მიიღო და 5:0 გაანადგურა.
მასპინძლებმა პირველი ტაიმი 4:0 მოიგეს, გოლები მოისე კინმა (2), ედგარას უტკუსმა (ა.გ.) და ჯიაკომო რასპადორიმ გაიტანეს.
მეორე ნახევარში კი საბოლოო ანგარიში 55-ე წუთზე ჯოვანი დი ლორენცომ დააფიქსირა.
ამრიგად, 6 ტურის შემდეგ C ჯგუფს 14 ქულით "სკუადრა აძურა" ლიდერობს, ლიეტუვას 0 ქულა აქვს და ბოლო ადგილზე იმყოფება.
იტალია მე-7 და მე-8 ტურის მატჩებს გამოტოვებს და გათამაშებაში 12 ნოემბერს, შვეიცარიასთან ჩაერთვება, ლიეტუვა 9 ოქტომბერს ბულგარეთს უმასპინძლებს.
![alt](/pictures/image50/6d43883425391514ea9ddc64135bcea4.png "დრამა ვარშავაში,"სკუადრა აძურას" მორიგი გამარჯვება და დაუნდობელი "ბუნდეს ნაკრები" [VIDEO]")
ჰოლანისა და მემფისის ჰეთ-თრიკი - ევროპულმა გრანდებმა დიდი ანგარიშით იმარჯვეს [VIDEO]
