"მეთოფეებმა" ორივე შეხვედრა ერთნაირი ანგარიშით, 1:5 დათმეს და საინტერესოა, რომ ამ კლუბების წინა ურთიერთშეხვედრაც (ჯგუფურ ეტაპზე) ასე დასრულდა, მიუნხენელთა სასარგებლოდ - 1:5. ამას წინ უძღვოდა "ლივერპულთან" პრინციპული თამაშის დათმობა და ოთხეულიდან გამოვარდნა.
პრემიერლიგა ისე დაძაბულად მიდის და ისეთი კონკურენციაა, დიდია შანსი, საბოლოოდ "არსენალი" ოთხეულს მიღმა დარჩეს და საყვარელ მეოთხე პოზიციასაც ვეღარ შეწვდეს, თუ იმასაც გავითვალისწინებთ, რომ "მეთოფეების" ზურგსუკან "მანჩესტერ იუნაიტედი" სუნთქავს.
რა თქმა უნდა, ეს ყველაფერი ფანების დიდ უკმაყოფილებას იწვევს. პირველი სერიოზული საპროტესტო ტალღა არსენ ვენგერის წინააღმდეგ წინა სეზონის მსვლელობისას აგორდა. ამდენი გულშემტკივარი მას ერთდროულად არასდროს აჯანყებია. ერთი-ორი მინდორზეც კი გადმოხტა და ფრანგ სპეციალისტთან მიჭრა სცადა, მაგრამ სტიუარდებმა გააკავეს.
ახლაც გვხვდება ბანერები - "არანაირი ახალი კონტრაქტი", "მადლობა, არსენ, მაგრამ წასვლის დროა" და ასე შემდეგ...
"არსენალის" სათავეში მყოფთა ნაწილი უკვე მივიდა იმ დასკვნამდე და რისი გაფიქრებაც კი აქამდე წარმოუდგენელი ჩანდა - ვენგერი უნდა წავიდეს. ის 1996 წლიდან პოსტზეა და ადრე თუ გვიან, ყველაფერი მთავრდება.
21-წლიანი მმართველობის დასასრულის დასაწყისს გარკვეულწილად, ისიც მოასწავებს, რომ მწვრთნელს უკვე ფეხბურთელებთანაც მოსდის კონფლიქტი და თანაც, ლიდერებთან - რამდენიმე დღის წინათ, ალექსის სანჩესს წაეჩხუბა. ასე რომ, შანსი მასთან თანამშრომლობის შეწყვეტის დღითიდღე იზრდება.
მუსიე არსენის ჩანაცვლების სავარაუდო კანდიდატთა შორის სახელდებიან მასიმილიანო ალეგრი, 29 წლის ვუნდერკინდი, "ჰოფენჰაიმის" თავკაცი იულიან ნაგელსმანი და სხვანი. თავად ვენგერს კი აქტიურად უკავშირებენ "პარი სენ-ჟერმენს", მაგრამ ეს ყველაფერი უკვე სხვა სტატიის თემაა.
"ბაიერნთან" საპასუხო მატჩს "მეთოფეები" იგებდნენ თეო უოლკოტის ულამაზესი გოლით, მაგრამ მეორე ტაიმის დებიუტში ყველაფერი თავდაყირა დადგა, როდესაც მატჩის მთავარმა მსაჯმა ანასტასიოს სიდიროპულოსმა ლორენ კოსიელნი გააძევა და პენალტი დანიშნა. სხვათა შორის, თავდაპირველად მან ფრანგ მცველს ყვითელი ბარათი უჩვენა, მაგრამ ეს გადაწყვეტილება კარსუკანა მსაჯთან კონსულტაციის მერე შეცვალა. აღსანიშნავია, რომ აპრილიდან მოქმედი წესების თანახმად, საჯარიმოში უხეშობის დროს ფეხბურთელები წითელ ბარათებს აღარ იღებენ, მხოლოდ ყვითელს. საქმე კი ის არის, რომ ლონდონელთა აზრით, პენალტიც კი არ უნდა ყოფილიყო, ხოლო წითელზე საუბარიც ზედმეტია.
მატჩის შემდეგ ვენგერმაც ამ ინციდენტზე ისაუბრა და იწუწუნა. ფრანგის ემოციები გასაგებია, მაგრამ… არის ერთი მაგრამ - ეს ინციდენტი რომც არ ყოფილიყო, გულზე ხელს თუ დავიდებთ, "მეთოფეები" "ბაიერნის" გამვლელები არ იყვნენ და თავის ამ ინციდენტით მართლება მუსიე არსენს ალიბისთვის არ გამოადგება.
"პენალტისა და წითელი ბარათის ეპიზოდი აბსოლუტურად აუხსნელი გახლდათ, ეს სკანდალური გადაწყვეტილება იყო. ამან ძალიან გამაბრაზა და არც კი ვიცი, რა ვთქვა. თანაც, პირველ ტაიმში ჩაბი ალონსომ თეო უოლკოტზე იუხეშა და აშკარა პენალტი არ დაგვინიშნეს. არადა, ჩემი გუნდი ძალიან ბევრს შრომობდა და იხარჯებოდა, ბიჭები მშვენივრად თამაშობდნენ და ბრძოლას აგრძელებდნენ. ვწუხვარ ფანების გამო, მათ ბილეთში ფული გადაიხადეს, საგულშემატკივროდ მოვიდნენ და ასეთი რამ ნახეს" - თქვა ვენგერმა.
ფრანგს იმ საპროტესტო დემონსტრაციებზეც ჰკითხეს, რომელიც ამ მატჩამდე იყო მისი წასვლის მოთხოვნით და ალბათ, კიდევ უფრო მასშტაბურ ხასიათს მიიღებს ამ შეხვედრის მერე. 67 წლის მუსიე არსენმა მოკლედ მოჭრა - სათქმელი არაფერი მაქვსო.
ისე, ფანების რისხვა არც სანჩესს ასცდა, რომელიც კადრში იმ მომენტში მოახვედრეს, როდესაც უკვე შეცვლილი რაღაცაზე ხითხითებდა და ანგარიშს თუ გავითვალისწინებთ, საქმე სასაცილოდ არ უნდა ჰქონოდაო.
გულშემატკივრებმა მცირე არეულობაც მოაწყვეს, რაშიც მათ გერმანელი ქომაგებიც აჰყვნენ და შედეგად, უეფა ორივე კლუბს დააჯარიმებს. სასჯელთან დაკავშირებით კონკრეტული დეტალები 23 მარტს გახდება ცნობილი.
ფაქტები
*ინგლისურ კლუბს ჩემპიონთა ლიგის პლეი ოფში ორი მატჩის ჯამში 2:10-ის დარი სხვაობით აქამდე არასოდეს წაუგია. * 1998 წლის მერე "არსენალი" საშინაო მატჩში ასეთი სხვაობით არ დამარცხებულა. მაშინ "მეთოფეები" ლიგის თასზე დაეცნენ "ჩელსისთან" - 0:5.
* ჩემპიონთა ლიგის პლეი ოფში ამაზე დიდი სხვაობა აქამდე მხოლოდ ერთხელ დაფიქსირდა და ისიც მიუნხენის "ბაიერნის" მონაწილეობით. 2009 წელს გერმანულმა გრანდმა ლისაბონის "სპორტინგს" ორი მატჩის ჯამში 12:1 მოუგო.
ყოველდღიური სპორტული გაზეთი "ლელო"
