დაუმარცხებელი არავინაა და არც "ბაიერნია" დაუმარცხებელი. ოღონდ ეგაა, რომ აგერ, უკვე ორი წელია, მიუნხენური გრანდი მარტო ისეთ თამაშებში აგებს, სადაც მოგება არ სჭირდება ხოლმე. ექვსივე მატჩის მოგება ძალიან კარგი იქნებოდა, მაგრამ რეკორდმაისტერმა "სიტისთან" 2:3 წააგო. თანაც, მას მერე, რაც 2:0-ს იგებდა. ეს ცუდია, მაგრამ საქმე იმაშია, რომ მიუნხენში ამ წაგების გამო ცუდ ხასიათზე არავინ დამდგარა. მატჩისშემდგომ პრესკონფერენციაზე უხასიათობა არც "ბაიერნის" თავკაც ხოსეპ გვარდიოლას დასტყობია:"იქნებ საჭიროც იყო, რომ ერთხელ ჩვენც წაგვეგო. ხანდახან წაგებაც კარგია, ოღონდ მაშინ, როცა მოგება არც ისე მნიშვნელოვანია," - განაცხადა გვარდიოლამ.
პეპი არ ტყუის. ამ წაგებამ "ბაიერნს" გული არ ატკინა - რეკორდმაისტერი ჩემპიონთა ლიგის მერვედფინალში მაინც პირველადგილოსნის რანგში გავიდა და წილისყრაზე ძლიერებში იქნება განთესილი.
არადა, პირველ წუთებში "ბაიერნისთვის" ყველაფერი იდეალურად იყო. თომას მიულერმა და მარიო გიოტცემ მიუნხენური გრანდი 2:0 დააწინაურეს, მაგრამ მერე "ბაიერნი" რატომღაც და როგორღაც გაჩერდა, პეპის ბიჭებმა სიჩქარე დააგდეს და "სიტიმაც" თამაში შეატრიალა. ზემოთაც ვთქვით, რომ გვარდიოლა მართალია, ამ წაგებამ რეკორდმაისტერს არაფერი დააკლო - მარტო სტატისტიკა გაუფუჭა:
"ბაიერნისთვის" ეს პირველი წაგება იყო ბოლო 24 თამაშში. ცნობისათვის, მანამდე ბავარიელები ბოლოს ივლისის ბოლოს, გერმანიის სუპერთასზე, დორტმუნდის "ბორუსიასთან" დამარცხდნენ (2:4).
გვარდიოლა: "მთავარი ისაა, რომ ჯგუფში მაინც პირველ ადგილზე გავედით. ეს მარცხი კარგი მხოლოდ იმ მხრივაა, რომ გვიჩვენებს, ჩემპიონთა ლიგაში მოშვება არ შეიძლება. თუმცა ბუნდესლიგაც ძალიან რთული ტურნირია, მაგრამ ამის დამტკიცება ძნელია მაშინ, როცა ყოველთვის იგებ".
თამაშის შემდეგ განაწყენება არც "ბაიერნის" კაპიტან ფილიპ ლამს ეტყობოდა: "დღეს ცუდად ვითამაშეთ, მაგრამ ამ წაგების იოლად გადატანა შეიძლება, რადგან ჯგუფში მაინც პირველი ადგილი დავიკავეთ. ცხადია, ყველა თამაშის მოგება გვინდა, მაგრამ როცა ისეთ თამაშს წააგებ, რომლის მოგებაც ბევრს არაფერს გაძლევდა, ეს კატასტროფა არ არის," - აღნიშნა ლამმა.
გაგახსენებთ, რომ ერთი უსარგებლო მატჩი "ბაიერნმა" ჩემპიონთა ლიგის წინა გათამაშებაშიც წააგო (1:3 ბატესთან), მაგრამ ბოლოს თასი აიღო. ამრიგად, არც "ბაიერნია" უძლეველი, მაგრამ საქმე ისაა, რომ მარტო ისეთ თამაშებს აგებს ხოლმე, რომელთა მოგება რეალურად არც სჭირდება...
ყოველდღიური სპორტული გაზეთი "ლელო"
ასევე იხილეთ:
ჩემპიონთა ლიგა. VI ტური. D ჯგუფი: არც ისე უძლეველი რეკორდმაისტერი [VIDEO]
