სიტი VS ბარსელონა - მარადიული კითხვა: როგორ გავაჩეროთ მესი?

ერთხელ, როცა ანტონიო კონტეს ჰკითხეს, როგორ გავაჩეროთ ლეო მესიო, "იუვენტუსის" თავკაცმა ამაზე ნახევრად ხუმრობით უპასუხა, მხოლოდ იარაღითო.

წუხელ ეს კითხვა "მანჩესტერ სიტის" თავკაცსაც დაუსვეს, მაგრამ პელეგრინის პასუხის გაგებამდე თანმიმდევრულად მივყვეთ მოვლენებს...

2-თვიანი პაუზა დასრულდა და მსოფლიოს ყველაზე პრესტიჟული და ძლიერი საკლუბო ტურნირიც განახლდება - 18 თებერვალს, ჩემპიონთა ლიგის 22-ე გათამაშებაში (მას მერე, რაც ჩემპიონთა თასი ლიგად გადაკეთდა) გადამწყვეტი ფაზა, პლეი ოფები იწყება.

მერვედფინალურ სტადიას ორი ქალაქი გახსნის: გერმანული ლევერკუზენი და ინგლისური მანჩესტერი. ამ ეტაპზე აღარ არსებობს უინტერესო დაპირისპირება, თუმცა, ცხადია, "ეტიჰადზე" გასამართი მატჩი უდიდეს ინტერესს იწვევს: "ნისლიან ალბიონს" ლიგის ერთ-ერთი მთავარი ფავორიტი "ბარსელონა" სტუმრობს.

სიტი-ბარსელონა: დებიუტანტი გრანდის წინააღმდეგ
ამ დაპირისპირებას 1/8-ფინალის ერთ-ერთ მთავარ ჯახად მიიჩნევენ და მართებულადაც. "მანჩესტერ სიტის" და "ბარსელონას", ორივეს სერიოზული ამბიცია ამოძრავებს წლევანდელ ლიგაზე.

თუმცა ისტორია გვამცნობს, რომ ინგლისური კლუბი დებიუტანტია - ჩემპიონთა ლიგის პლეი ოფში პირველად გავიდა! მაშინ, როცა "ბარსელონა" 4-ჯერ ფლობდა ევროპის საკლუბო ფეხბურთის უპირველეს ჯილდოს.

ლიგის შეხვედრას ორივე გუნდი ამაღლებული განწყობით ხვდება, "სიტიმ" ასოციაციის თასიდან (სხვათა შორის, იქაც მერვედფინალური სტადია იყო) "ჩელსი" გააგდო - 2:0, ხოლო "ბარსელონამ" მადრიდულ "რაიო ვალეკანოს" კიდევ ერთხელ ჩაუტარა ფეხბურთის გაკვეთილი - 6:0.

"სიტიმ" ღირსეულად განვლო D ჯგუფი: 15 ქულა დააგროვა (მეტი, ვიდრე "ბარსამ") და მხოლოდ "ბაიერნს" ჩამორჩა, რომლის დამარცხებაც შეძლო. H ჯგუფში ტატა მარტინოს გუნდს 13 ქულა ეყო პირველი ადგილის მოსაპოვებლად და პლეი ოფში საპასუხო შეხვედრის შინ გამართვის დასაბევებლად.



"სიტი" განსაკუთრებით კარგად თამაშობს "ეტიჰადზე", სადაც ამ სეზონში 20 შეხვედრიდან მხოლოდ 2 ვერ მოიგო. დიდებულ ფორმაშია იაია ტურე, რომელიც "ბარსელონას" ყოფილი ფეხბურთელია.

"ბარსელონაში" ჩემი როლი ლიმიტირებული იყო შუახაზში, არ შეიძლებოდა წამითაც დამეკარგა კონცენტრაცია. ინგლისის პირველობა უფრო ღიაა და მე შემიძლია როგორც დაცვაში ჩასვლა, ისე წინ გაჭრა", - განუცხადა უეფას ოფიციალურ საიტს ტურემ.

მიუხედავად ამისა, "ბარსა" მაინც ფავორიტია - კატალონიურმა გუნდმა ლიგის ბოლო 6 გათამაშებაში მინიმუმ ნახევარფინალს მაინც უწია.

მანუელ პელეგრინის, ალბათ, არ ეყოლება არგენტინელი სერხიო აგუერო, ხოლო ბრაზილიელი ფერნანდინიოს შანსი, ითამაშოს, უფრო დიდია. ჩილელ სპეციალისტს არც ჯეიმს მილნერი ეყოლება, მან ჯგუფურ ეტაპზე 3 გაფრთხილება "შეაგროვა".

ტატა მარტინოს სერიოზული საფიქრალი ამ მხრივ არა აქვს, რადგან ტრავმირებული ჯონათან დოს სანტოსი ისედაც არ ითვლება ძირითადის ფეხბურთელად.



მანუელ პელეგრინი (მანჩესტერ სიტი):
"ამ სეზონში მანჩესტერს, ფაქტობრივად, ერთი კლუბი ჰყავს. ასე რომ, ქალაქის პრესტიჟის დაცვა ჩვენ მოგვიწევს. როგორ უნდა გავაჩეროთ მესი? უნდა ვითამაშოთ ჩვენი თამაში. მესი ტოპ-ფეხბურთელია, მაგრამ არ ვფიქრობ, რომ "ბარსელონა" მხოლოდ მესია".

ხერარდო მარტინო (ბარსელონა):
"არანაირ პრიორიტეტს არ ვსახავთ. უნდა შევძლოთ ბურთზე კონტროლის მოპოვება, რადგან ეს საქმე კარგად გამოგვდის. თუკი ამასობაში გოლის გატანასაც შევძლებთ, დიდებული იქნება. თუ აქცენტს შემტევებზე გადავიტანთ, მაშინ მეტი სირბილი მოგვიწევს; თუ ნახევარდაცვაზე, მაშინ ბურთი უმეტესად ჩვენი უნდა იყოს. აქ, რა თქმა უნდა, არ ვიტყვი, როგორ მოვიქცევით ხვალ.

"მანჩესტერ სიტი" ძალიან მომწონს. ამ გუნდს შეუძლია მრავალნაირად შეუტიოს, ფლანგებიდან თუ ცენტრიდან, საჰაერო ორთაბრძოლებით გავიდეს ფონს ან პასებით. "სიტი" კარგია საჯარიმოებისა და კუთხურების შესრულებისასაც. ამ გუნდს ბევრი გოლი გააქვს. რომ დავიცვათ თავი, ბურთი უნდა წავართვათ მეტოქეს.

"სიტი" ძალიან ჰგავს "ბარსელონას", თუმცა არ ვიტყოდი, რომ მინი "ბარსელონაა".

ნეიმარი მნიშვნელოვანი ფეხბურთელია ჩვენთვის, მაგრამ ხვალ გადავწყვეტ, ითამაშებს ის პირველი წუთებიდან თუ მერე ჩაერთვება თამაშში. 6 წელია, ნახევარფინალში მაინც გავდივართ. ასე რომ, თუ გავვარდებით, ფანები ამას ვერაფრით გვაპატიებენ".

ჩემპიონთა ლიგა. 1/8-ფინალი. I მატჩი
18 თებერვალი. მანჩესტერი. "ეტიჰადი". 23:45
მან. სიტი (ინგ)-ბარსელონა (ესპ)
დისკვალიფიკაცია: ჯეიმს მილნერი (სიტი)
ტრავმა: ფერნანდინიო (?), სერხიო აგუერო (?) - ჯონათან დოს სანტოსი, კარლეს პუიოლი (?)
ბოლო 6 შეხვედრა ლიგაზე:
+5=0-1 +4=1-1
არბიტრი: იონას ერიქსონი (შვედეთი)

ყოველდღიური სპორტული გაზეთი "ლელო"