რომა VS რეალი: ზიზუს დებიუტი და გამოცდა

ზინედინ ზიდანისთვის ხავერდოვანი პერიოდი დასრულდა, "რომასთან" დაპირისპირება ლეგენდარული ფეხბურთელისთვის, მაგრამ გამოუცდელი მწვრთნელისთვის პირველი დიდი გამოცდაა და მისი კარიერა ამ ორ მატჩზე დიდად არის დამოკიდებული.

* ამ თამაშში შედგება ზინედინ ზიდანის სამწვრთნელო დებიუტი ევროთასებზე.

* "რომამ" ბოლო 13 შეხვედრაში (ყველა შეჯიბრება) მხოლოდ ერთი მატჩი დათმო.

* "რეალს" ცუდი ისტორია აქვთ პლეი ოფებში - მათ იტალიურ კლუბებთან ბოლო 8 ორმატჩიანი დაპირისპირება აქვთ წაგებული.

ლუჩანო სპალეტი (რომა): "არა მგონია, ამ დაპირისპირებას ფავორიტი ჰყავდეს. შანსები 50/50-ზეა. ბოლო დროს კარგად ვთამაშობთ და ახლა ეს ამ თამაშზეც უნდა აისახოს, რომ დავრწმუნდეთ, სწორად ვმუშაობთ. გავიგე, თითქოს, ჩვენ რონალდოს პერსონალურ მეურვეობას ვაპირებთ და მას სამ კაცს მივუჩენ. არ დაიჯეროთ, რომ მე ჩემს ფეხბურთელებს ვუთხრა, რონალდოს მესამედი ღირხართ-მეთქი. ასე რომ იყოს, 33 ფეხბურთელი მჭირდება "რეალის" გასანეიტრალებლად. ვფიქრობ, ფლორენცი საკმარისად სწრაფია, რომ რონალდოს დუელი გაუმართოს".

ზინედინ ზიდანი (რეალი): "ლა ლიგა სხვაა და ჩემპიონთა ლიგა - სულ სხვა. "რომა" კარგი გუნდია, რომელმაც ფეხბურთის თამაში იცის. ძალიან მძიმე მატჩი გველის, მაგრამ ჩვენ ამისთვის მზად ვართ. "რეალისთვის" ბევრს ნიშნავს წარმატება ჩემპიონთა ლიგაზე. ზეწოლა მუდმივად იგრძნობა, მაგრამ ამის გარეშე არ გამოვა.

მეტოქის შემადგენლობაში არ შემიძლია არ გამოვარჩიო ერთი ფეხბურთელი - ფრანჩესკო ტოტი. მან მთელი ეპოქა შექმნა. ამბობენ, შეიძლება გაისად მან აღარ ითამაშოსო. ვისაც ფეხბურთი უყვარს, ეს ამბავი დააღონებდა. მოედანზე ტოტის თამაშის ყურება დიდი სიამოვნებაა".

"რომამ" სტუმრად "კარპის" მოუგო და თან შესანიშნავად ითამაშა - 3:1. ლუკას დინის შორეულ დარტყმას ბოლოსკენ ედინ ჯეკოსა და მოჰამედ სალაჰის გასროლები დაემატა. ბოსნიელმა ფორვარდმა მშრალი სერია შეწყვიტა. ეს სპალეტის გუნდის ზედიზედ მე-4 გამარჯვება იყო.

"რეალმა" ტურის ცენტრალურ მატჩში 4:2 მოუგო "ბილბაოს". ბასკთა კარში დუბლი შეასრულა კრიშტიანო რონალდომ. დიდებული გოლი გაიტანა ხამეს როდრიგესმა, თავი ტონი კროოსმაც გამოიჩინა. "ლოს მერენგესმა" ზიდანის ხელმძღვანელობით მეექვსედ ითამაშა. გუნდი ჯერაც დაუმარცხებელია ფრანგის ხელში.

ევროთასებზე გუნდები 8-ჯერ შეხვდნენ ერთმანეთს, ოთხი მატჩი "რეალმა" მოიგო, სამი - "რომამ". მათი ბოლო ოფიციალური შეხვედრა 2008 წელს ჩემპიონთა ლიგის მერვედფინალში შედგა. მაშინ სპალეტის გუნდმა (დიახ, მაშინაც სპალეტი იყო "რომას" თავკაცი) "რეალს" ორივე მატჩი მოუგო, ორივე - 2:1.

ოთხშაბათი. 17 თებერვალი
რომა-რეალი 23:45
დისკვალიფიკაცია: არავინ
ტრავმა: კაპრადოსი, დე როსი (?), ტოტი (?) - ბეილი, პეპე, აბნერი, მარსელო (?)
სავარაუდო შემადგენლობები
რომა (3-5-2): შჩესნი - რუდიგერი, დე როსი, მანოლასი - ფლორენცი, პიანიჩი, კეიტა, ნაინგოლანი, დინი - სალაჰი, ჯეკო
რეალი (4-3-3): კ. ნავასი - კარვახალი, ვარანი, ს. რამოსი, დანილო - მოდრიჩი, კროოსი, ისკო - ხ. როდრიგესი, ბენზემა, რონალდო
მსაჯი: პაველ კრალოვეცი (ჩეხეთი)

ყოველდღიური სპორტული გაზეთი "ლელო"

ასევე იხილეთ:
გენტი VS ვოლფსბურგი: დებიუტანტების ბრძოლა