დიეგო სიმეონე: ჩვენ და "ბარსელონა" სხვადასხვა იარაღით ვიბრძოდით

მადრიდის "ატლეტიკოს" მთავარმა მწვრთნელმა დიეგო სიმეონემ "ბარსელონასთან" (2:0) ჩემპიონთა ლიგის საპასუხო მეოთხედფინალური მატჩის შემდეგ კომენტარი გააკეთა.

- ატლეტიკო-ბარსელონა 2:0 - ნოკაუტი სიმეონესგან [VIDEO]

"მიხარია ჩემი ფეხბურთელების გამო, რომლებიც ამ კოლექტივში არიან თავმოყრილნი. მარტო ნახევარფინალში გასვლაზე არ ვლაპარაკობ, ეს უფრო მნიშვნელოვანია. თანამედროვე საზოგადოებაში მცირდება ღირსეული ფასეულობები, ხოლო ჩვენ პატიოსან მშრომელთა გუნდი ვართ. შეგვიძლია წავაგოთ ან მოვიგოთ, მაგრამ ყველაფერს ჩვენი ღირსებით ვაღწევთ.

ძალიან ძლიერი მეტოქის წინააღმდეგ ვთამაშობდით, რომელსაც მდიდარი ისტორია აქვს და ძლიერი ფეხბურთელები ჰყავს.

ეს იყო გუნდების მატჩი, რომლებიც სხვადასხვა იარაღით იბრძვიან. ზოგჯერ გამარჯვება შენ გრჩება - ასე მოხდა დღეს. დაუვიწყარ საღამოს ვატარებთ. ეს უნიკალური მოგონებები იქნება.

ახლა კი მხოლოდ "გრანადასთან" მატჩზე ვფიქრობ.

"მანჩესტერ სიტის" დაუჯერებელი ფინანსური შესაძლებლობები აქვს და ასევე, შესანიშნავი ფეხბურთელები ჰყავს. "რეალსა" და "ბაიერნზე" მათი ისტორია მეტყველებს, ისინი დიადი კლუბები არიან.

ხოლო "ატლეტიკოსთვის" ევროპის საუკეთესო ოთხეულში მოხვედრა დიდი ამბავია. ახლა შეგვიძლია უფრო მეტს მივაღწიოთ", - თქვა სიმეონემ უეფას ვებგვერდთან საუბარში.