"მუსკრონში" მოვწონვარ - ბექა ქავთარაძის გოლი და საგოლე პასები ტესტ-მატჩში [VIDEO]

რამდენიმე დღის წინ გაზეთ "ლელოსთან" საუბრისას საქართველოს 17-წლამდელთა ნაკრების მწვრთნელმა გოჩა ავსაჯანიშვილმა თქვა, ბექა ქავთარაძე ბელგიაში ვარჯიშობსო.

Sportall.ge ბექას სწორედ ბელგიაში დაუკავშირდა და სცადა დეტალები გაერკვია. ამასთან, ქავთარაძეს ევროპის ჩემპიონატზე მოხვედრის შანსების შეფასებაც ვთხოვეთ. შეგახსენებთ, რომ წილისყრის შედეგად, ჩვენი ნაკრების მეტოქეები ელიტრაუნდში იტალიის, ბოსნიის და რუსეთის ნაკრებები იქნებიან.

"ევროპის შესარჩევი ეტაპის შემდეგ, რომელიც უნგრეთში ჩატარდა, ჩემი მენეჯერი სერგო ქუთათელაძე დამიკავშირდა და "მუსკრონზე" მიამბო. სწორედ მისი რეკომენდაციით მივედი ამ გუნდში.

ერთი ტესტ-მატჩი ვითამაშე უკვე "მუსკრონის" 19-წლამდელთა გუნდშუ "პერუველზის" წინააღმდეგ, სადაც გოლის გატანა და 2 საგოლე გადაცემის გაკეთება მოვახერხე. გუნდის მწვრთნელებს მოვეწონე და ჩემით ძალიან კმაყოფილები იყვნენ.

კონტრაქტზე ვერაფერს გეტყვით, რადგან ჯერ საბუთებს ვაგვარებ. თანაც, 18 დეკემბრამდე სინჯებზე ვარ აქ.

ნაკრებს რაც შეეხება, ამ ბიჭებმა უკვე დავამტკიცეთ, რომ ჩვენს ასაკში ძლიერი გუნდი არ არსებობს, გამარჯვება ყველასთან შეგვიძლია. ამიტომაც ვარ დარწმუნებული, რომ ჯგუფიდან გასვლას შევძლებთ. ჩვენს კედლებში თამაში ორმაგ მოტივაციას გვმატებს", - გვითხრა ბექამ.