ქუთაისის "ტორპედომ" მათე კვირკვია და დავით ხურციძე დაიმატა

ქუთაისის "ტორპედოში" საინტერესო ტრანსფერები განხორციელდა. ინფორმაციას კლუბის პრესსამსახური ავრცელებს.

პირველი შენაძენი მათე კვირკვიაა - 20 წლის სწრაფი და ტექნიკური თავდამსხმელი, ბოლო პერიოდის უდავოდ ერთ-ერთი უნიჭიერესი ახალგაზრდა, რომელიც საქართველოს ასაკობრივი ნაკრებების წევრი გახლდათ.

მან კარიერა "ვიტ ჯორჯიაში" დაიწყო, უთამაშია "ზესტაფონსა" და "დილაში". მაგრამ უცნაურია, რომ 2016 წლის 1-ლი  ივნისის შემდეგ, როცა გორული კლუბი დატოვა, კვირკვია უგუნდოდ დარჩა, არადა, ჩამოსაწერი მოთამაშე ნამდვილად არ არის...

"ტორპედოს" მეორე ახალწვეული დავით ხურციძეა. 24 წლის ნახევარმცველი რუსეთის პასპორტს ფლობს და მოსკოვის ცსკა-ს აღზრდილია. გამოდიოდა რუსი არმიელების დუბლშემადგენლობასა და 19-წლამდელთა გუნდში, რომლის შემადგენლობაშიც იუნიორების ჩემპიონთა ლიგაში ულამაზესი გოლი აქვს გატანილი.



შემდეგ ხურციძე ცსკა-დან განათხოვრებით წავიდა პენზის "ზენიტში", სამი წლის წინ კი ქუთაისის "ტორპედოში" ჩაირიცხა, სადაც 5 მატჩში 2 გოლი გაიტანა. საქართველოში დიდხანს არ გაჩერებულა და სომხური "ულისეს" ფორმით ევროპალიგაზე ითამაშა. მერე ხურციძე რუსეთში დაბრუნდა და "არმავირში" გამოდიოდა, საიდანაც პრემიერლიგის "ამკარში" აღმოჩნდა...

(იბეჭდება მცირე ცვლილებით)
ყოველდღიური სპორტული გაზეთი "ლელო"