ზესტაფონი, დ.აბაშიძე, 4500 მაყურებელიზესტაფონი-ტორპედო 0:1
0:1 დიღმელაშვილი (66)
ზესტაფონი ტორპედო
4-4-2 4-4-1-1
მამალაძე მიგინეიშვილი
ალადაშვილი დ.ფოფხაძე
ონიანი თოდუა
საჯაია გამეზარდაშვილი
ელიავა გურული
აფციაური დოლიძე
გორგიაშვილი დიღმელაშვილი
ძარია გ.დათუნაიშვილი
გრიგალაშვილი თარხნიშვილი
დვალი ბოლქვაძე
გელაშვილი გოცირიძე
მწვრთნელი: მწვრთნელი:
გ. ჭიაბრიშვილი გია გეგუჩაძე
ზესტაფონი
67. გორგიაშვილი-ბენაშვილი
77. დვალი-წინამძღვრიშვილი
77. აფციაური-ბაბუნაშვილი
სათადარიგოები: მეშველიანი, ღონღაძე, კობახიძე, ფიფია
ტორპედო
62. ბოლქვაძე-იოსელიანი
64. გოცირიძე-მეგრელაძე
77. დოლიძე-საბანაძე
სათადარიგოები: ქვილითაია, ფარულავა, ჩიკვილაძე, კუხიანიძე
გაფრთხილება: გ. დათუნაიშვილი (19), საჯაია (81), გელაშვილი (83)
არბიტრი: თ. გვანცელაძე
იმერულ დერბის ინტრიგა არასდროს ჰკლებია, მაგრამ, მიზეზთა გამო, გუშინდელი მატჩი განსაკუთრებულ ინტერესს იწვევდა. ჯერ ერთი, ერთმანეთს სატურნირო ცხრილში პირველ-მეორე
მოგეხსენებათ, "ტორპედოს" დამრიგებელი გია გეგუჩაძე წლების განმავლობაში ედგა სათავეში "ზესტაფონს" და გასულ სეზონში ზემოიმერული გუნდი ჩემპიონიც გახადა. მას ყოფილი კლუბისა და თანაშემწის გია ჭიაბრიშვილის წინააღმდეგ პირველად უწევდა დაპირისპირება და ეს დუელი ადგილობრივ გულშემატკივრებშიც ძალიან დიდ ინტერესს აღძრავდა. ბარემ აქვე ვიტყვით, რომ მწვრთნელთა დუელში გამარჯვებული გაცილებით გამოცდილი გეგუჩაძე დარჩა, რომელმაც "ტორპედოს" ზედიზედ მეხუთედ მოაგებინა და ცხრილის შუა ნაწილიდან მეორე პოზიციამდე დააწინაურა. თანაც, ქუთათურებმა ამ მატჩის შემდეგ ლიდერ "ზესტაფონთან" ჩამორჩენა ერთ ქულამდე შეამცირეს.
ტურის ცენტრალურ შეხვედრას ზესტაფონი საკადრისი საფეხბურთო ატმოსფეროთი დაუხვდა. თამაშს დარიც დაერთო და, მიუხედავად იმისა, რომ მატჩი ტელევიზიით გადაიცემოდა, "დავით აბაშიძეზე" 4000-ზე მეტმა მაყურებელმა მოიყარა თავი. ადგილობრივი გულშემატკივრების სასახელოდ უნდა ითქვას, რომ გეგუჩაძეს "ზესტაფონში" ნაღვაწი არ დაუვიწყეს და მატჩის წინ გულთბილად დაუხვდნენ.
შეხვედრამ ავანსები სრულად გაამართლა. მაყურებელმა ძალზე დაძაბული და საინტერესო თამაში იხილა. ბურთის ფლობაში მასპინძლებს დიდი უპირატესობა ჰქონდათ, მაგრამ "ტორპედომ"კონტრშეტევებზე ააწყო თამაში და შანსიც უკეთ გამოიყენა.
საწყისი წუთები "ტორპედოს" აქტიურობით წარიმართა. პირველი რეალური მომენტიც სტუმრებმა შექმნეს, თარხნიშვილის ფლანგური გადაცემის შემდეგ დავით ბოლქვაძემ მეორე ცდაზე მცველების გარემოცვაში რთული პოზიციიდან სახიფათოდ დაარტყა, მაგრამ მამალაძემ შეძლო მდგომარეობის განმუხტვა. მომდევნო შეტევისას კი გურულის ფლანგურ ჩაწოდებას გოცირიძე თავური დარტყმით გამოეხმაურა და ამჯერადაც მამალაძემ იყოჩაღა. ამის შემდეგ უპირატესობა ფეროელთა ხელში გადავიდა და გია ჭიაბრიშვილის გუნდმა მეტოქე ტაიმის ბოლომდე დაძაბულობაში ამყოფა.
ყველაზე დიდ პრობლემებს სტუმრებს გრიგალაშვილი და დვალი უქმნიდნენ. კარგად ირჯებოდა თორნიკე აფციაურიც, რომელმაც მე-16 წუთზე მცველის მოტყუების შემდეგ საჯარიმოს მისადგომებიდან ყუმბარისებურად გაისროლა და ბურთი ხარიხას ოდნავ გადააცილა. შემდეგ ისევ გრიგალაშვილი მოექცა ყურადღების ცენტრში, ალადაშვილის ბრწყინვალე, 50-მეტრიანი გადაცემის შემდეგ საქართველოს ნაკრების ნახევარმცველი ფოფხაძეს გასცდა და კარისკენ უხერხული ტრაექტორიით გაგზავნა ბურთი, თუმცა ომარ მიგინეიშვილმა აკრობატული ნახტომით მოიგერია ბურთი. გრიგალაშვილმა იქვე, მეორედაც მოჭრილი დარტყმით შეაწუხა მეკარე, მაგრამ ქუთაისელთა კიპერი ისევ მოწოდების სიმაღლეზე იყო.
ზესტაფონელები მეტოქეზე დაწოლას განაგრძობდნენ, ქუთათურებმა კი კონტრშეტევებზე ააგეს თამაში. მასპინძლები ორჯერ იყვნენ ახლოს გატანასთან, ჯერ ონიანის სახიფათო საჯარიმოს დვალი ვერ გამოეხმაურა, გორგიაშვილის დარტყმის შემდეგ კი ტორპედოელები ძელმა იხსნა. 35-ე წუთზე საკამათო ეპიზოდი იყო, დვალი თოდუასთან ორთაბრძოლისას მეტოქის საჯარიმოში დაეცა და მასპინძლები პენალტს ითხოვდნენ, მაგრამ გვანცელაძემ წესების დარღვევა არ დააფიქსირა.
"ტორპედომ" მეტოქის შეტევებს გაუძლო და კარი მშრალად შეინახა. შესვენების შემდეგ კი შეხვედრა სტუმართა სახიფათო იერიშით განახლდა, თარხნიშვილის აქტიურობის შემდეგ დოლიძემ საჯარიმოს მისადგომებიდან უძლიერესად დაარტყა და მამალაძეს ბურთის მოსაგერიებლად მთელი თავისი ოსტატობის ჩვენება დასჭირდა. მასპინძლებმა უმალვე შტურმით უპასუხეს, გრიგალაშვილს და გორგიაშვილს შეეძლოთ გატანა, პირველ შემთხვევაში ბურთი მიზანს ასცდა, მეორე ეპიზოდისას კი ბრწყინვალე ფორმაში მყოფმა მიგინეიშვილმა იყოჩაღა და მდგომარეობა განმუხტა. ზესტაფონელები ტერიტორიულ უპირატესობას ფლობდნენ, მაგრამ გოლი საკუთარ კარში მიიღეს.
მოედანზე რამდენიმე წუთის გამოსულმა გივი იოსელიანმა მარჯვენა ფლანგიდან საჯარიმო შეასრულა, მამალაძე გამოსვლისას შეცდა და საჯარიმოში უყურადღებოდ დატოვებულმა დიღმელაშვილმა დაუცველი კარი დალაშქრა - 0:1.
ზესტაფონელები ბევრს ეცადნენ ანგარიშის გათანაბრებას, მაგრამ "ტორპედოს" დაცვა უშეცდომოდ თამაშობდა. ფეროელებს ორჯერ საჯარიმოთი მიეცათ გატანის შანსი, გელაშვილის უძლიერესი დარტყმისას ქუთაისელთა კიპერმა საოცარი რეაქცია გამოავლინა, გრიგალაშვილის საჯარიმო კი სულ მცირედით ასცდა კარს.
ქუთათურებს უფრო სოლიდური სხვაობით გამარჯვებაც შეეძლოთ, მაგრამ საბანაძის პასით მეკარესთან პირისპირ გასულმა იოსელიანმა შანსი ვერ გამოიყენა. მალე მატჩიც დასრულდა და ტრიბუნებზე მრავლად მყოფმა ქუთაისელმა გულშემატკივარმა სტადიონი "გეგუჩაძე, გეგუჩაძის" სკანდირებით დატოვეს.
მატჩის შემდეგ
გია გეგუჩაძე: "მადლობა მინდა გადავუხადო ზესტაფონელ გულშემატკივრებს გულთბილი დახვედრისთვის. საინტერესო და დაძაბული თამაში იყო, "ზესტაფონს" ბურთის ფლობის მხრივ დიდი უპირატესობა ჰქონდა, მაგრამ ჩვენ კონტრშეტევებისა და თავდადებული თამაშის ხარჯზე გავიმარჯვეთ. მნიშვნელოვანი სამი ქულა მოვიპოვეთ და ამ მხრივ ფეხბურთელების გარჯით კმაყოფილი ვარ, თუმცა ჯერ კიდევ ბევრი გვაქვს სამუშაო"
გიორგი ჭიაბრიშვილი: "ვიცოდით, რომ რთული მეტოქე გვყავდა და მძიმე მატჩი გველოდა. თანაბარი თამაში იყო. გოლის გატანის შანსები გვქონდა და, მეტოქისგან განსახვავებით, ვერ გამოვიყენეთ. ვეცდებით, დაშვებული შეცდომები გავაანალიზოთ და მომავალ მატჩებში უკეთ ვითამაშოთ. რაც შეეხება იმას, იყო თუ არა დვალის წაქცევის მომენტში თერთმეთმეტრიანი, ამას გადამწყვეტი მნიშვნელობა არ აქვს. თუ თამაშის მოგება გინდა, უნდა გაიტანო და ერთ დანიშნულ თუ არდანიშნულ თერთმეტმეტრიანს მნიშვნელობა არ უნდა მიანიჭო... რადგან მსაჯმა პენალტი არ დანიშნა, ალბათ, არც იყო."
უმაღლესი ლიგა. XII ტური
სატურნირო ცხრილი
გ თ მ ფ წ ბ ქ
ზესტაფონი 12 8 2 2 25-14 26
ტორპედო 12 8 1 3 15-7 25
დინამო 12 8 1 3 25-12 25
მეტალურგი 12 6 3 3 17-13 21
მერანი 12 6 2 4 14-12 20
ბაია 12 6 1 5 15-10 19
ვიტ ჯორჯია 12 4 3 5 11-15 15
გაგრა 12 4 1 7 12-17 13
კოლხეთი 12 3 3 6 11-18 12
დილა 12 3 2 7 16-19 11
სპარტაკი 12 2 4 6 8-18 10
სიონი 12 1 3 8 8-22 6
ყოველდღიური სპორტული გაზეთი "ლელო"
