შარშან, როცა სეზონის პირველი ეტაპის დასრულებას ბევრი აღარაფერი აკლდა, დავით მუჯირი და ზაზა ზამთარაძე საკუთარი ნებით წამოვიდნენ "ზესტაფონიდან", რადგან კლუბის ხელმძღვანელობამ მათთან კონსულტაციის გარეშე გამოუწერა ფეხბურთელებს საჯარიმო სანქციები. მწვრთნელთა ეს დუეტი შემდეგ კახა კაჭარავამ შეცვალა "ზესტაფონში".
ზამთარაძეს მანამდეც გაუწვრთნია უმაღლესი ლიგის არაერთი გუნდი გიორგი კიკნაძესთან ერთად. ახლა კი ჯერჯერობით არც ერთ გუნდში არ მუშაობს მწვრთნელად.
ზამთარაძეს აქეთურ-იქითურზე ვესაუბრეთ...
- ახლანდელი გადმოსახედიდან როგორ ფიქრობთ, სწორი იყო "ზესტაფონიდან" წამოსვლის გადაწყვეტილება? დამეთანხმებით, საქართველოში მწვრთნელისთვის იდეალური გარემო ძნელად მოსაძებნია...
- "ზესტაფონიდან"
- მას შემდეგ უმუშევარი ხართ თქვენც და დავით მუჯირიც....
- ცხადია, ამ გადაწყვეტილებამ ჩემთვის ზიანიც მოიტანა, მაგრამ არსებობს უფრო მნიშვნელოვანი ფაქტორებიც. თბილისის "ლოკომოტივს" რომ ვწვრთნიდით მე და გიორგი კიკნაძე, მაშინაც საკუთარი ნებით დავტოვეთ გუნდი, რადგან კლუბში ფინანსური სიტუაცია გაუარესდა და "ლოკომოტივს" აღარ შეეძლო მაღალი მიზნებისთვის ბრძოლა. ძალიან კარგი ურთიერთობა გვქონდა "ლოკომოტივის" პრეზიდენტ ლექსო თოფურიასთან, თანამოაზრეები ვიყავით და მასთან ახლაც ვმეგობრობთ.
- კლუბი, მენეჯმენტი, მწვრთნელი და ფეხბურთელები - ამ მხრივ ყველაზე კარგად რომელ კლუბს აქვს საქმე აწყობილი საქართველოში? რომელ გუნდს ეტყობა საქმისადმი კონცეპტუალური მიდგომა, ყველაზე უფრო რომელი ქართული კლუბის მიმართულებაა საინტერესო?
- ქუთაისის "ტორპედოს" ეტყობა მწვრთნელის ხელი, საკუთარი ხელწერა, თამაშის ხარისხი... რაც შეეხება შედეგს, ესეც მოვა, თუ შესაბამისი ფინანსური ზურგიც იქნება, ანუ თუ მოხერხდება ისეთი ფეხბურთელებით გაძლიერება, რომ გუნდმა ევროსარბიელზეც ღირსეულად წარმოაჩინოს თავი.
აქვე მსურს ვისარგებლო შემთხვევით და გიორგი ონიანს, როგორც ადამიანსა და სპორტსმენს, თანადგომა გამოვუცხადო.
- საინტერესო ძვრები სხვა გუნდებშიც შეინიშნება...
- თბილისის "დინამო" მიმდინარე ჩემპიონატში პირველ ადგილზეა, მაგრამ რა ფინანსური და ინფრასტრუქტურული პირობებიც აქვს ამ კლუბს, გაცილებით წინ უნდა იყოს ქულებითაც და თამაშის ხარისხითაც. ყოველ შემთხვევაში, მე გაცილებით მეტს ველოდი "დინამოსგან".
- უნდა იყოს თუ არა ლიმიტი ლეგიონერთა რაოდენობაზე საქართველოში - ამ საკითხზე როგორია თქვენი პოზიცია? ფაქტია, არაერთ ქართულ გუნდში ლეგიონერები სათადარიგოთა სკამზე სხედან...
- ქართულ კლუბს თუ ლეგიონერი ჩამოჰყავს, ის აქაურებზე ათი თავით მაღლა უნდა იდგეს. უცხოელი ფეხბურთელები ქართულმა კლუბმა იმისთვის უნდა გამოიყენოს, რომ ჩემპიონთა ლიგის ან ევროპალიგის ჯგუფში გასვლაში მოეხმაროს. როცა ლეგიონერი იმისთვის მოგყავს, რომ უმაღლესი ლიგიდან არ გავარდე, არ ვიცი, რამდენად გამართლებულია ასეთი ნაბიჯი...
- ჩისკოს გარდა, კიდევ ვის ხედავთ ისეთ ლეგიონერს, ქართულ გუნდს ევროსარბიელზე მნიშვნელოვნად რომ დაეხმარება?
- ჩისკო "დინამოში" მართლაც საკვანძო ფეხბურთელია. მისი დონის სხვა ლეგიონერს მე საქართველოში ვერ ვხედავ.
- ჩემპიონობას ვის უწინასწარმეტყველებთ?
- გადამწყვეტი "დილა"-"დინამოს" მატჩი იქნება, თუმცა, ვფიქრობ, როგორც უნდა დასრულდეს ეს შეხვედრა, ჩემპიონი მაინც "დინამო" გახდება. არ დავმალავ, "დინამოს" ვგულშემატკივრობ, "დინამო" ჩემში მართლაც განსაკუთრებულ ემოციებს იწვევს.
- გაერთიანებული ჩემპიონატი აზერბაიჯანთან და ყაზახეთთან - ამ იდეაზე რას ფიქრობთ?
- კატეგორიული წინააღმდეგი ვარ გაერთიანებული ჩემპიონატის. თუ იქნება სახელმწიფოს დახმარება ქართული საკლუბო ფეხბურთისთვის, თუ გაუმჯობესდება ინფრასტრუქტურა, თუ უფრო მეტი ფული გაუჩნდებათ ქართულ კლუბებს და აღარ იქნება აღებ-მიცემობა, მსაჯზე გასვლა და სხვა მაიმუნობა, გარწმუნებთ, რომ მალე ძალიან მაგარ ჩემპიონატს ჩავატარებთ.
- ეროვნულ ნაკრებზე იმასღა გკითხავთ, თუ ხედავთ საშუალებას, რომ ამ ეტაპზე მნიშვნელოვნად გამოკეთდეს საქართველოს უპირველესი გუნდის თამაში?
- ბოლო განცხადებებიდან ჩანს, რომ ფეხბურთის ფედერაციის ხელმძღვანელობა და ეროვნული ნაკრების სამწვრთნელო შტაბი კმაყოფილნი არიან გუნდში მიმდინარე პროცესებით. მწვრთნელმაც გვითხრა, თუ შემდეგ შესარჩევში ფინალურ ეტაპზე გასვლის შანსი არ გვექნება, გადავდგებიო. მოკლედ, ხელმძღვანელობასა და მწვრთნელს მიაჩნიათ, რომ სწორი გზით მიდიან და ღმერთმა ქნას, ასე იყოს სინამდვილეშიც.
- ორი შესარჩევი ციკლი არის იმის სამზადისი, რომ მესამეში ფინალურ ეტაპზე გასვლისთვის ვიბრძოლოთ - ეს გამართლებული პოლიტიკაა?
- ვინც არის ამ ყველაფერზე პასუხისმგებელი, ვაცალოთ მათ მუშაობა. ხელს ნუ შევუშლით, დაველოდით, რა შედეგამდე მივალთ ამ გზით.
(იბეჭდება მცირე ცვლილებით)
ყოველდღიური სპორტული გაზეთი "ლელო"
ასევე იხილეთ:
ზაზა ზამთარაძე: გამოჩნდა, რომ ამ ნაკრებში ლევან ყენია ძალიან დიდი ძალაა
მოთამაშეთა პროფკავშირები: დროა, საქმეს მივხედოთ
კოკაიას მუჯირი და ზამთარაძე ფიზკულტურის მასწავლებლები ეგონა?
ზაზა ზამთარაძე: მე და დავით მუჯირი თანამოაზრეები ვართ
იმათ არ იციან, ამან იცის...