ამ საფეხბურთო სეზონში "დილას" და "ჩიხურას" ერთმანეთთან თამაში დაებედათ. მეექვსედ დაუპირისპირდნენ ეს გუნდები ერთმანეთს საქართველოს ჩემპიონატისა და თასის გათამაშების ფორმატში. თუმცა ამ შეხვედრების უმრავლესობაზე სიტყვა "დაპირისპირების" თქმა ცოტა ხმამაღალი ნათქვამია, რადგან მათ მატჩებს დაძაბულობა აკლდა, განსხვავებით გოლებისგან, რომელიც 20-ჯერ გაუტანეს გუნდებმა ურთიერთს.
დაძაბულობის სიმცირე კი იმან მოიტანა, რომ ერთს ქვეყნის თასის მოპოვებაზე ჰქონდა განსაკუთრებული აქცენტი გადატანილი, ხოლო მეორეს პირიქით თასი არ აინტერესებდა, იქ ძირითად შემადგენლობას ასვენებდა და ჩემპიონობისთვის ბრძოლას ანიჭებდა უპირატესობას.
საბოლოოდ "დილა" ან დუბლიორებით ეთამაშებოდა "ჩიხურას" (საქართველოს თასზე), ან შაბათის მატჩში ჟუნიორმა პირველი გოლი მე-10 წუთზე გაიტანა - დასარტყმელ პოზიციაზე გასულმა ბრაზილიელმა ლეგიონერმა ადვილად აჯობა გოლკიპერს.
აქამდე ორიოდ წუთით ადრე გოგიტა გოგუას შეეძლო ეხეირა. გოლიდან რამდენიმე წუთში კი საპირისპირო კართან რევაზ გოცირიძესაც მიეცა საგოლე შანსი, თუმცა ზურაბ მამალაძემ იხსნა მასპინძლები, კარგად დარტყმული თავური კუთხურზე გადააგდო.
ასეთმა დასაწყისმა მაყურებელს ლოგიკურად თავიდანვე შეუქმნა შთაბეჭდილება, რომ უხვგოლიანი შეხვედრის მოწმე გახდებოდა და არც შემცდარა. თუმცა მხოლოდ "დილამ" გაამართლა პუბლიკის ვარაუდი. გორელებმა ოთხჯერ გაუტანეს გამოცდილ გიორგი სომხიშვილს, ხოლო საჩხერელებმა ერთხელაც ვერ აიღეს მასპინძლების კარი.
არადა, მაგალითად, 57-ე წუთზე მეტად სახეირო მომენტი ვერ გამოიყენა ბესიკ დეკანოიძემ. თავის მხრივ "დილას" ფეხბურთელებს მიზანი "გასწორებული" ჰქონდათ და ჯერ რამოსმა გაზრდა ანგარიში, შემდეგ ჟუნიორმა კვირკველიას მიერ ჩაწოდებულ ბურთს ბადეში მიუჩინა ადგილი.
ვერცხლის მედლის ფაქტობრივმა მფლობელებმა, გატანილი გოლებით, საზეიმო დაჯილდოების წინ ეფექტური ფონის შესაქმნელად კიდევ ჩათვალეს საჭიროდ ანგარიშში სხვაობის გაზრდა და გოგუამ მეოთხეც გაიტანა.
მატჩის მიწურულს კი გიორგი ილურიძეს საოცარი მომენტი რომ არ გაეფლანგა, გორელების გამარჯვება კიდევ უფრო შთამბეჭდავი გამოვიდოდა. თუმცა კლუბის ისტორიაში საუკეთესო შედეგი ხომ "დილას" უამისოდაც უკვე განაღდებული ჰქონდა. სფფ-ს ვიცე-პრეზიდენტები ალექსანდრე ჩივაძე და გია ფირცხალავაც უკვე მზად იყვნენ მათ დასაჯილდოებლად.
იხილეთ ვიდეო
მსაჯის საფინალო სასტვენის შემდეგ "დილას" ვერცხლის მედლებით დაჯილდოების ცერემონია გაიმართა. ადგილობრივმა გულშემატკივრებმა ტაშით და ოვაციებით გადაუხადეს მადლობა ისტორიული შედეგის შემოქმედ ფეხბურთელებს და მწვრთნელებს განვლილი სეზონისთვის.
გუნდის ფანკლუბის ჭაბუკი წევრები კი დაჯილდოების მერე კარგა ხანს "ნადირობდნენ" საყვარელი ფეხბურთელების მაისურების მოსაპოვებლად.
მატჩის შემდეგ:
დავით კვირველია ("დილას" კაპიტანი):
"იქიდან მოყოლებული, რაც მე "დილაში" გადმოვედი, უკმაყოფილო ვერ ვიქნები. შარშან ევროტურნირებზე ნორმალურად გამოვედით, წლეულს უმაღლესი მიზნისთვის ვიბრძოდით. მართალია, მას ვერ მივაღწიეთ, რადგან "დინამოსთან" კონკურენცია ცოტა არ იყოს ძნელია, მაგრამ ჩვენ ღირსეულად ვიბრძოლეთ და მიუხევადავად იმისა, რომ ბოლოს პრობლემები დაგროვდა გუნდში, მაინც საკმაოდ კარგი შედეგი ვაჩვენეთ. ვულოცავ გორის "დილას" თითოეულ გულშემატკივარს ამ წარმატებას! მოგეხსენებათ, სახელმწიფო დაგვპირდა თანადგომას, იმედი გვაქვს, რომ გუნდს არ მიატოვებენ და ევროტურნირებზეც წარმატებით გამოვალთ".
ვალდას ივანაუსკასი ("დილას" მთავარი მწვრთნელი):
- პირველ რიგში, გილოცავთ ვერცხლის მედლებს. საინტერესოა, როგორ შეაფასებთ თქვენ მიერ გაწეულ სამუშაოს გორის "დილაში"?
- ყველაფერი გავაკეთეთ ჩვენი შესაძლებლობებიდან და არსებული პრობლემებიდან გამომდინარე. ვფიქრობ, მთლიანობაში შესანიშნავი სეზონი გამოვიდა. დავამტკიცეთ, რომ ქართული ფეხბურთი ერთ ადგილზე არ დგას. არიან ტალანტები და პერსპექტიული ფეხბურთელები. კმაყოფილი ვარ სამწვრთნელო შტაბის მუშაობითაც. მეტის სურვილიც გვქონდა, მაგრამ არსებული პრობლემებიდან გამომდინარე ეს მაქსიმუმი იყო რაც მოხერხდებოდა. მთელ გუნდს ვულოცავ წარმატებას. საქართველომ უნდა იამაყოს ამ კლუბით.
- გუნდის ევროტურნირებისთვის სამზადისზე რას გვეტყვით?
- მომავალზე ვერაფერს გეტყვით, რადგან პრობლემები სულ რაღაც გუშინ გადაიჭრა. ეს უფრო ადრე უნდა მომხდარიყო, ახლა გამიჭირდება იმაზე საუბარი, თუ რა და როგორ იქნება მომავალში.
- თქვენი კავშირი "დილასთან" სამომავლოდ თუ გაგრძელდება?
- ამაზე საუბარი საერთოდ არ ყოფილა. გუნდის პრობლემაც ამაშია, რომ ასეთი საკითხები ჯერ არაა გარკვეული. მე და ფიზმომზადების მწვრთნელმა თომას კლიმეკმა ყველაფერი გავაკეთეთ და დანარჩენს ჩვენ არ ვწყვეტთ.
- რეალური წინადადების შემთხვევაში თუ დარჩებოდით "დილაში"?
- ამ კითხვას კომენტარის გარეშე დავტოვებ.
(იბეჭდება მცირე ცვლილებით)
ყოველდღიური სპორტული გაზეთი "ლელო"
