ქვეყნის ვიცე-ჩემპიონ გორის "დილას" მალე ევროტურნირზე მოუწევს ასპარეზობა. მოგეხსენებათ, გუნდს უმაღლესი ლიგის დასრულებამდე ლიტველი სპეციალისტი ვალდას ივანაუსკასი წვრთნიდა, რომელთან კონტრაქტი აღარ გაგრძელდა. გარკვეული ხნის ძიების შემდეგ კი "დილას" ხელმძღვანელებმა მწვრთნელად გიორგი დევდარიანი დანიშნეს.
4 ივნისს ის მასმედიასა და ქომაგებს წარუდგინეს. შეხვედრაზე ჟურნალისტთა კითხვებს, ახალ მწვრთნელთან ერთად, კლუბის სპორტული დირექტორი ვანო ხორგუაშვილი, გორის რაიონის საკრებულოს თავმჯდომარე დავით რაზმაძე და ქალაქის გამგებელი პაპუნა კობერიძე პასუხობდნენ.
ვანო ხორგუაშვილი:
- წარმოგიდგენთ "დილას" მთავარი მწვრთნელს, ახალგაზრდას, მაგრამ საკმაოდ გამოცდილ, ქართული ფეხბურთისთვის კარგად ნაცნობ სპეციალისტს გიორგი
ვფიქრობ, რომ მასთან ერთად შევასრულებთ გუნდისთვის დასახულ ამოცანებს. მისი ხელმძღვანელობით წარმატებების მოპოვების დიდი იმედი გვაქვს.
გიორგი დევდარიანი:
- დიდი მადლობა გორის მუნიციპალიტეტს, რომელმაც ნდობა გამომიცხადა. ეს ჩემთვის დიდი პასუხისმგებლობა და ტვირთია, რომელიც ღირსეულად უნდა ვზიდო.
პირველ ყოვლისა, გეტყვით, რომ რამდენიმე თვეა, გორში არ ვყოფილვარ და ინფრასტრუქტურამ, რაც ამ სტადიონზე დამხვდა, ყოველგვარ მოლოდინს გადააჭარბა. ბევრი რამ სასიკეთოდაა შეცვლილი.
ვიცი, რომ გორში ფეხბურთი სულ უფრო პოპულარული ხდება. თამაში, რომელსაც გუნდი აქ მომუშავე სპეციალისტების ხელმძღვანელობით აჩვენებდა, საკმაოდ მაღალი დონის არის, მაგრამ შევეცდები, გავაუმჯობესო იგი და სანახაობრივი შტრიხები შევმატო, რაც სულაც არ არის იოლი საქმე. თუმცა იმედი რომ არ მქონოდა, არც ჩამოვიდოდი.
როგორც ახალგაზრდული ნაკრების მწვრთნელს, გარკვეული წარმოდგენა მაქვს ახალგაზრდა გორელ ფეხბურთელებზეც. "დილა" ჭაბუკთა ლიგაშიც კარგად გამოდის.
შევეცდებით, მათ გავუხსნათ ასპარეზი ჯერ დუბლებში, შემდეგ, ვინც დაიმსახურებს, ძირითად გუნდში და შემდგომ ღირსეული ცვლა გავუზარდოთ ქვეყნის ნაკრებს.
- თქვენი სიტყვები იმას ხომ არ ნიშნავს, რომ გუნდის უმთავრესი აქცენტი ახალგაზრდებსა და ადგილობრივ ფეხბურთელებზე იქნება გადატანილი?
- მოგეხსენებათ, ევროპალიგაზე მოგვიწევს თამაში. პირველ რიგში, ჩვენი ამოცანაა, იქ ღირსეულად ვიასპარეზოთ. ბუნებრივია, მე განსაკუთრებულ შედეგს, თასის აღებას და ა. შ. ვერ შეგპირდებით, მაგრამ მჯერა, რომ ევროპულ არენაზე თავს არ შევირცხვენთ.
რაც შეეხება ახალგაზრდებს, უწინარესად, მათზეა დამოკიდებული, დავაწინაურებთ თუ არა დიდ გუნდში. ჩვენ შევეცდებით, მათ ხელი შევუწყოთ. ადგილობრივებს უპირატესობა ექნებათ გუნდში მოხვედრისას იმ შემთხვევაში, თუ სხვა ქალაქიდან ჩამოყვანილი მათ ვერ აჯობებს. საერთოდ კი, ითამაშებს ის, ვინც მოცემული მომენტისთვის უკეთაა მომზადებული.
აქაური გულშემატკივარი მიეჩვია "დილასგან" გამარჯვებებს და მე ჩემს თავს არ მივცემ უფლებას, რომ მათ ეს სიხარული მოვაკლო. მით უფრო, რომ კლუბის ხელმძღვანელობა ითხოვს ევროპულ ტურნირზე ღირსეულ გამოსვლას და ეროვნულ ჩემპიონატში წამყვანი პოზიციის შენარჩუნებას.
- სამწვრთნელო შტაბში თანაშემწეებად სხვა სპეციალისტების მოყვანას ხომ არ გეგმავთ?
- "დილაში" საკმაოდ კარგი სპეციალისტები მუშაობენ. ვაპირებ, მათთან ერთად ვიმუშაო. ვცდილობთ, ისევ დარჩეს ფიზმომზადების მწვრთნელი თომას კლიმეკი, რომელიც ივანაუსკასთან ერთად მუშაობდა. ამ საკითხზე მასთან მიმდინარეობს მოლაპარაკება.
- რამდენად აქვს კლუბს იმის რესურსი, რომ ნაყოფიერი მოსამზადებელი შეკრება გაიაროს ევროპალიგისთვის, რათა ღირსეულად წარსდგეს საერთაშორისო არენაზე?
- რამდენადაც ჩემთვის ცნობილია, კლუბს აქვს რესურსი, მოსამზადებელი ეტაპი კარგად გაიაროს. იცით, რომ "დილაში" არაერთი ძლიერი ფეხბურთელია, რომელთა თავისთან გადაიყვანის სურვილი უცხოურ კლუბებს აქვთ. ფეხბურთელების გარკვეული ჯგუფი აუცილებლად დარჩება გუნდში. ამ ეტაპზე ნამდვილად ვერ გიპასუხებთ, კონკრეტულად რომლები რჩებიან ან ვინ ტოვებს "დილას" - ეს ყველაფერი უახლოეს მომავალში გაირკვევა.
ვანო ხორგუაშვილი:
- პრობლემები, რომლებიც იდგა კლუბის წინაშე, მოგვარებულია. მეტიც, საკრებულოს და გამგეობის თანადგომით, საკმაოდ სერიოზული მიზნების შესრულება გვინდა. ამ მომენტში კი შეგიძლიათ თავადაც ნახოთ, რომ ადგილობრივი ხელისუფლების მხარდაჭერით, მაგალითად, სტადიონზე სამუშაოები განუწყვეტლივ მიმდინარეობს.
დავით რაზმაძე:
- მივულოცავ "დილას" ვერცხლის მედლებს! მესამე ათწლეულია, რაც ეროვნული ჩემპიონატი იმართება და გორის გუნდს ადრე არასოდეს ჰქონია ასეთი შედეგი. ჩვენ ორიენტირი ნამდვილად გვაქვს აღებული "დილას" გაძლიერებაზე. სურვილია, იგი ევროპის ლიგაზე შარშანდელზე უკეთაც გამოვიდეს.
მადლობას გადავუხდი ცენტრალურ ხელისუფლებას და კონკრეტულად ბატონ ბიძინა ივანიშვილს, რომელმაც გულთან მიიტანა აქ არსებული პრობლემები და სრული მხარდაჭერა გამოგვიცხადა. კლუბში არსებული კრიზისის დროს დიდი როლი შეასრულა აგრეთვე ვითარების გამოსწორებაში გორელი გულშემატკივრის აქტიურობამ. ისინი მთელი სეზონი ყოველმხრივ გამოირჩეოდნენ.
აქვე კმაყოფილებას გამოვხატავ ბატონი გიორგი დევდარიანის "დილას" მთავარ მწვრთნელად დანიშვნასთან დაკავშირებით. ფეხბურთის დიდი ქომაგი ვარ და კარგად ვიცნობ ამ სპეციალისტის სამწვრთნელო კარიერას, მინახავს მისი გაწვრთნილი გუნდების ასპარეზობა. შესაბამისად, მიხარია, რომ იგი ამიერიდან ჩვენი გუნდის თავკაცია.
(იბეჭდება მცირე ცვლილებით)
ყოველდღიური სპორტული გაზეთი "ლელო"
ასევე იხილეთ:
არამხოლოდ ახალგაზრდული ჟინით - გიორგი დევდარიანი გორის "დილაში"
გორის "დილა" - მოვერცხლილი ისტორია
