ფეხბურთელის პასპორტში არ ვიყურები -კობა ჟორჟიკაშვილი ბათუმის "დინამოშია"

ბათუმის "დინამოს" ახალი მთავარი მწვრთნელი ჰყავს - კობა ჟორჟიკაშვილი.

წინა სეზონში ბათუმელებმა უმაღლეს ლიგაში ადგილის შებარჩუნება ვერ მოახერხეს და პირველ ლიგაში დაქვეითდნენ. "ბათუმი" დატოვა გია გურულმა და გუნდი უმთავარმწვრთნელოდ დარჩა. "ბათუმიდან" რამდენიმე გამოცდილი ფეხბურთელიც წავიდა.

სულ რამდენიმე დღეა, რაც "ბათუმში" ჟორჟიკაშვილი მივიდა. მას არაერთი გუნდი გაუწვრთნია საქართველოში, ბოლოს რუსთავის "მეტალურგს" თავკაცობდა და მისი ხელმძღვანელობით ეს გუნდი შარშან საქართველოს ჩემპიონატში ჯერ პირველ ადგილზე გავიდა, მერე კი ფედერაციის აღმასკომის გადაწყვეტილებით ჩემპიონობა "ზესტაფონს" მიაკუთვნეს.

ჟორჟიკაშვილს საქართველოს სხვადასხვა ასაკობრივი ნაკრებებიც გაუწვრთნია და ახალგაზრდული ფეხბურთის ერთ-ერთ ყველაზე ძლიერ სპეციალისტადაც ითვლება. ჟორჟიკაშვილი მონაწილეობს მწვრთნელთა განათლების პროგრამებშიც.

ერთი სიტყვით, "ბათუმში" ცნობილი, გამოცდილი და საკმაოდ მაღალკვალიფიციური კადრი მივიდა.

- ბათუმის "დინამოს" ხელმძღვანელის, სულხან გოგიბერიძის ინიციატივით მოვხდი ამ გუნდში. ჩვენთან იმუშავებს გელა შეყილაძეც, რომელიც სპორტული დირექტორი იქნება და ახალგაზრდული ფეხბურთის განვითარებაც მის კომპეტენციაში შევა. ჩემი თანაშემწეები კი ლევან ხომერიკი და ბორის გონჩაროვი იქნებიან.

- რა გეგმები ექნება ბათუმის "დინამოს"? დამდეგ სეზონში უმაღლეს ლიგაში დაბრუნებისთვის იბრძოლებთ?
- სულხან გოგიბერიძეს გრძელვადიანი გეგმა აქვს. მოგეხსენებათ, ბათუმის "დინამოს" არ გააჩნია ბაზა და სტადიონი, ანუ გრძელვადიანი გეგმა ინფრასტრუქტურის განვითარებასაც ითვალისწინებს.

გუნდი ახლა ბათუმში ვარჯიშობს ფიზიკური კონდიციების ასამაღლებლად, იქითა კვირიდან კი ბურთთან ვარჯიშზე გადავალთ ქობულეთში, "ჩელე არენაზე", ამავე სტადიონზე გამართავს "ბათუმი" საშინაო მატჩებსაც. ინფრასტრუქტურული პროექტების შემდეგ კლუბის გეგმა ითვალისწინებს იმ სისტემის შექმნას, რომლის საშუალებითაც ახალგაზრდა ფეხბურთელები უნდა დაწინაურდნენ ბათუმის "დინამოსთვის" და საქართველოს ნაკრებებისთვისაც.

რაც შეეხება მომავალ სეზონს, რა თქმა უნდა, ჩვენი მიზანი უმაღლეს ლიგაში დაბრუნება იქნება, მერე კი ევროსაგზურისთვის ბრძოლა. ბათუმში ასეთი გეგმისთვის ჩამოვედი.

- როგორი იქნება გუნდის კონტინგენტი? უფრო ადგილობრივ კადრებს დაეყრდნობით თუ მოწვეულ ფეხბურთელებს?
- უმეტესად ადგილობრივ მოთამაშეებს დავეყრდნობით, ზოგ მათგანს კარგად ვიცნობ, ზოგიც კი ვიდეოჩანაწერებზე ვნახე. შანსი ყველას მიეცემა.

რაც შეეხება მოწვეულ ფეხბურთელებს, ბათუმის "დინამოში" დარჩებიან უკრაინელი მეკარე ივან პიცანი, მცველი გიგა ჟვანია და თავდამსხმელი ბესიკ ჩიმაკაძე. გუნდის შექმნა და დაბალანსება უნდა მოხდეს გამოცდილი და ახალგაზრდა ფეხბურთელების სინთეზით. ახალგაზრდა ფეხბურთელში მხოლოდ ასაკი არ იგულისხმება. მთავარია, ის პერსპექტივა და პოტენციალი, რომლის განვითარება უმაღლეს ლიგაშიც შეიძლება.

მაქსიმალურად ვეცდებით ადგილობრივი კადრების დაწინაურებას, თუ აუცილებელი გახდა, მერე ვიფიქრებთ სხვა მოთამაშეების მოწვევაზე.

- რა სტილის, რა სათამაშო კონცეფციის გუნდი იქნება კობა ჟორჟიკაშვილის "ბათუმი"?
- ეს დამოკიდებული იქნება ფეხბურთელების კონტინგენტზე. "ბარსელონას" და ესპანეთის ნაკრების სტილი მომწონს, თუმცა გააჩნია, როგორი იქნება გუნდის შემადგენლობა.

- 25 წლის თავდამსხმელი მიხეილ ჯორბენაძე ისევ ბათუმის "დინამოში" ითამაშებს?
- კი, ტარვმის შემდეგ მან უკვე დაიწყო ვარჯიში და ვნახოთ, როდის შეძლებს დიდი დატვირთვების მიღებას.

- 39 წლის ამირან მუჯირი დარჩება გუნდში?
- რა თქმა უნდა, რადგან ეს ფეხბურთელი კვლავაც მაგალითის მიმცემია სხვებისთვის. მე არ ვიყურები ფეხბურთელის პასპორტში, ჩემთვის მთავარია, თუ როგორ მოძრაობს მოთამაშე მოედანზე. მუჯირი ისევ საკვანძო ფეხბურთელი იქნება ბათუმის "დინამოში".

ყოველდღიური სპორტული გაზეთი "ლელო"

ასევე იხილეთ:
ბათუმის "დინამო" - უიღბლო დაბრუნება
კობა ჟორჟიკაშვილი: სჯობს, უმაღლესი ლიგა თექვსმეტგუნდა გავხადოთ
კობა ჟორჟიკაშვილი: ქართველებში არის ნიჭი, გვჭირდება გუნდურობა
კობა ჟორჟიკაშვილი: გამოჩნდება, რამდენად სწორი იყო ჩემი გაშვების გადაწყვეტილება
კობა ჟორჟიკაშვილი: საქართველოს ნაკრებს არც შედეგი აქვს და არც სანახაობა