ნიკა ფილიევი: მიხარია, საქართველოს ასეთი დონის კლუბი რომ ჰყავს

გორის "დილას" ახალწვეულებზე "ლელომ" უკვე გაცნობათ. დღეს ერთ-ერთი მათგანის, თბილისში დაბადებული რუსეთის მოქალაქე ნიკა ფილიევის მცირე ინტერვიუს შემოგთავაზებთ.

სხვათა შორის, რესპონდენტი ქართულად გვესაუბრა. არადა, ნიკა 5 წლის იყო, როცა მშობლებთან ერთად რუსეთში დასახლდა...

ამბობენ - რომ არა ტრავმა, 22 წლის ნახევარმცველი გაცილებით მეტს მიაღწევდა. იყო შთამბეჭდავი დებიუტი მოსკოვის "დინამოსა" და ცსკა-ს მატჩში, მერე 2009-10 წლების სეზონის ჩემპიონთა ლიგა, სადაც ფილიევმა 3 მატჩი ჩაატარა, მათ შორის - "ვოლფსბურგისა" და "მანჩესტერის" წინააღმდეგ. 2009 წელს კი, რუსეთის ახალგაზრდული ნაკრების შემადგენლობაში, გრანატკინის სახელობის ტრადიციული ტურნირის საუკეთესო ბომბარდირი გახდა (3 გოლი).

მოკლედ, "დილას" მთავარ მწვრთნელს გიორგი დევდარიანს თუ დავესესხებით, ფილიევი საინტერესო ფეხბურთელია და როგორც კი ფორმას აღიდგენს, გუნდს საგრძნობლად გააძლიერებს.

ახლა კი დაპირებული ინტერვიუ...

- ყველა საერთაშორისო ცნობარში საქართველოს მოქალაქედ ხართ მოხსენიებული...
- ეს შეცდომაა. 5 წლის ვიყავი, როცა რუსეთში, კერძოდ, სოჭში გადავედით საცხოვრებლად. მას შემდეგ რუსეთში ვცხოვრობ და ცხადია, იქაური პასპორტი მაქვს.

- ცოტა უცნაური კი არის, რომ რუსეთში გაზრდილი ქართულად საკმაოდ გამართულად ლაპარაკობთ...
- ბებია დღემდე ნაძალადევში, უიარაღოს ქუჩაზე ცხოვრობს და ხშირად ჩამოვდიოდით. ბუნებრივია, ქართულიც ვიცი, რადგან მეზობლებთან და ოჯახის წევრებთან სხვა ენაზე არც მილაპარაკია.

- რუსეთის ერთ-ერთ იმედისმომცემ ფეხბურთელად ითვლებოდით. ამიტომაცაა მოულოდნელი საქართველოში თქვენი ჩამოსვლა...
- ცხოვრებაში ბევრი მოულოდნელობა ხდება. ბოლოს ასტრახანის "ვოლგარში" ვთამაშობდი და პრემიერლიგაში დაბრუნება მსურდა, მაგრამ ეს არ გამოვიდა. ამ დროს, მამუკა ჯუღელმა "დილაში" შემომთავაზა თამაში. გუნდი ევროპის ლიგის პლეი-ოფამდე გავიდა და ჩავთვალე, რომ საინტერესო წინადადება იყო.

- როგორც ვიცით, ცსკა-ს ლიდერი ალან ძაგოევიც საქართველოში, კერძოდ, გურჯაანში იზრდებოდა...
- დიახ, ასეა. ჩვენ ვმეგობრობთ. ნიჭიერი მოთამაშე და კარგი ადამიანია. საქართველოში გაზრდილი ბიჭები რუსეთში სხვებიც არიან. მაგალითად, მოსკოვის "დინამოს" თავდამსხმელი ალან კასაევი, რომელიც მანამდე "რუბინში" თამაშობდა.

- "დილაში" როდემდე დარჩებით?
- კონტრაქტი ექვსთვიანია, ანუ დეკემბრამდე გავჩერდები. გუნდში უკვე ვივარჯიშე, "დილას" თამაშები ვნახე და ძალიან გამიხარდა, საქართველოში ასეთი დონის კლუბი რომ არსებობს.

კარგი ფეხბურთელები არიან, საინტერესო მწვრთნელი გვყავს და ბიჭებიც კარგად დამხვდნენ.

ყოველდღიური სპორტული გაზეთი "ლელო"