ჩიხურა-ზესტაფონი 1:0 - გამარჯვებულს არ ასამართლებენ [VIDEO]

-ზესტაფონი 1:0 - გამარჯვებულს არ ასამართლებენ [VIDEO]" width="180" style="border: 0px none; float: left; margin: 5px;" />საჩხერელებმა პირველივე სახიფათო შეტევა გოლით დაასრულეს - მარჯვენა ფრთიდან ბესიკ დეკანოიძემ საჯარიმოში გააკეთა გადაცემა, რატი წინამძღვრიშვილმა ბურთი კარგად გაატარა და გიორგი დათუნაიშვილმა თითქმის პენალტის ნიშნულიდან ნომინალური მასპინძლები დააწინაურა.

სწრაფი გოლის შემდეგ "ჩიხურამ" ორჯერ მწვავედ შეუტია, მაგრამ რეალურ საგოლე მომენტამდე საქმე არ მისულა.

ამასობაში სტუმრებიც გააქტიურდნენ. ირაკლი ქობალიამ საჯარიმოს გარედან საჩხერელთა კარის მიმართულებით დააქუხა. მეკარე რევაზ თევდორაძეს ბურთი აეჭრა, მაგრამ გაუმართლა და ხარიხას ოდნავ გადასცდა.

მომდევნო 10-წუთიან მონაკვეთში თამაში გამოცოცხლდა და შეხვედრა ორმხრივი იერიშებით გაგრძელდა. ჯერ მასპინძლებმა შეუტიეს კარგად. გიგა ბეჭვაიას ფლანგური გადაცემის შემდეგ წინამძღვრიშვილი ურტყამდა სახიფათოდ, მაგრამ ბურთი კარს ოდნავ ასცდა.

საპასუხოდ, ზესტაფონელთა ბრაზილიელმა ლეგიონერმა რენე ფერეირამ ჯარიმის გათამაშების შემდეგ ძალზედ სახიფათოდ დაარტყა საჩხერელთა კარის მიმართულებით, თუმცა ფრუიძის შეგირდები ამ ეპიზოდში ძელმა იხსნა.

შეტევების გასაძლიერებლად დოსტანიჩმა ლევან შარიქაძის ნაცვლად მოედანზე გამოცდილი ალექსანდრე გურული შეიყვანა, თუმცა ზესტაფონელთა შეტევებს სიმწვავე არ მომატებია. თამაში დაწყნარდა და ბურთი ძირითადად მოედნის ცენტრში ტრიალებდა. გუნდები შეტევების განხორციელებას კი ცდილობდნენ, მაგრამ პირველი ტაიმის დარჩენილ დროში დასამახსოვრებელი აღარაფერი მომხდარა.

ზესტაფონელთა სერბი მწვრთნელი, ფაქტობრივად, ვა-ბანკზე წავიდა, როცა მეორე ტაიმის დაწყებისთანავე მოედანზე ლევან კუტალია შეიყვანა. სტუმრებმა დიდი ძალებით შეუტიეს. ისინი ბურთს აკონტროლებდნენ და ტერიტორიულ უპირატესობას ფლობდნენ, მაგრამ შეტევები კარში დარტყმით იშვიათად სრულდებოდა.

დასამახსოვრებელი იყო ნაემეკა აჯურუს უძლიერესი შორეული დარტყმა, რომელიც ხარიხას გადასცდა.

"ზესტაფონის" ნიგერიელმა ლეგიონერმა კიდევ ერთ ეპიზოდში იაქტიურა, როცა მის ფლანგურ გარღვევასა და ჩაწოდებას ქობალიას თავური მოჰყვა, თუმცა ბურთი ამჯერადაც ასცდა მიზანს. 70-ე წუთზე ზესტაფონელებს ანგარიშის გათანაბრების ყველაზე რეალური შანსიც მიეცათ - გურულმა გიორგი ადამია გაიყვანა მეკარესთან პირისპირ, თუმცა თევდორაძემ კარი დროულად დატოვა და დარტყმა მოიგერია.

ხუთიოდე წუთში ზესტაფონელები უმცირესობაში დარჩნენ. მსაჯმა უხეშობისთვის ვახტანგ ჭანტურიშვილი გააძევა. 10 კაცით დარჩენილი "ზესტაფონი" კვლავ აგრძელებდა შეტევებს, მაგრამ საქართველოს ორგზის ჩემპიონებს კომბინაციური თამაში არ გამოსდიოდათ, მათი შეტევები საკმაოდ იოლად იკითხებოდა.

საჩხერელთა იშვიათი საპასუხო შეტევებიდან დავით ოდიკაძის ძლიერი დარტყმაა გამოსარჩევი, როცა ჯიღაურის ჩაწოდების შემდეგ შეუჩერებლად დაარტყა, თუმცა ხარიხას გადააცილა.

ეს იყო და ეს, დარჩენილ დროში საინტერესო აღარაფერი მომხდარა. "ჩიხურამ" თამაში გამარჯვებამდე მიიყვანა და პირველ ადგილზე მოკალათდა.


მატჩის შემდეგ
რატკო დოსტანიჩი ("ზესტაფონის" მწვრთნელი):
"თამაში ძალიან ცუდად დავიწყეთ და სწრაფი გოლი მივიღეთ. ამის შემდეგ "ჩიხურა" მთელი ძალებით იცავდა თავს და ანგარიშის გათანაბრება ვეღარ მოვახერხეთ. მარცხის მიუხედავად, მჯერა ჩემი გუნდის... თუმცა ისიც უნდა ვთქვა, რომ მე უფრო მჯერა მათი, ვიდრე მათ - საკუთარი თავის. ახალი გუნდი გვყავს, ფეხბურთელები მზადების სხვადასხვა ეტაპზე არიან, შესათამაშებლად და მდგომარეობის გამოსასწორებლად დრო გვჭირდება".

უმაღლესი ლიგის IV ტური


სატურნირო ცხრილი


დერბი უღიმღამო სცენარით (იბეჭდება მცირე ცვლილებით)
ყოველდღიური სპორტული გაზეთი "ლელო"