ჩვენი ინფორმაციით, ლანჩხუთის "გურიაში" ცვლილებებია მოსალოდნელი. საუბარია უკრაინელი მთავარი მწვრთნელის, მისი თანაშემწისა და ფეხბურთელების ჩამოყვანაზე. ერთი უკრაინელი მობურთალი უკვე ჩამოსულია.
ოთხშაბათს, ლანჩხუთის გამგეობაში პრესკონფერენციაა დაგეგმილი და, სავარაუდოდ, იქ გაირკვევა, რატომ გახდა საჭირო ამჟამინდელი მთავარი მწვრთნელის, დავით მახარაძის შეცვლა. მან ხომ, ფაქტობრივად, დაშლილი და ჩემპიონატის სტარტზე შეკოწიწებული გუნდით შეუძლებელი შეძლო - ორივე საშინაო შეხვედრაში გაიმარჯვა, მათ შორის, დაამარცხა მოქმედი ჩემპიონი თბილისის "დინამო".
წაგებულ შეხვედრებშიც მახარაძის შეგირდებს ცუდი შთაბეჭდილება ნამდვილად არ დაუტოვებიათ.
შეგახსენებთ, რომ მახარაძემ "გურია" მას შემდეგ ჩაიბარა, რაც კლუბში საკადრო
ვინ შეცვლის მახარაძეს? კულუარული ინფორმაციით, ეს ადამიანი შეიძლებოდა სსრკ-ის ნაკრებისა და კიევის "დინამოს" ყოფილი ფეხბურთელი ანდრეი ბალი ყოფილიყო, თუმცა ბოლო მომენტში სიტუაცია შეიცვალა და მას ახლა სამწვრთნელო შტაბში მოიაზრებენ.
ჩვენთვის ცნობილი გახდა ერთი საკადრო ცვლილების შესახებაც - ლანჩხუთელთა დუბლშემადგენლობას "გურიისა" და ეროვნული ნაკრების ყოფილი მცველი გოჩა გუჯაბიძე გაწვრთნის. ის ამ პოსტზე დავით იმნაძეს შეცვლის.
რაც შეეხება ფეხბურთელებს, კიდევ სამი უკრაინელის ჩამოყვანა იგეგმება, თუმცა მწვრთნელებთან ერთად ამჟამად მხოლოდ ერთს ელიან.
ამ ინფორმაციების გადამოწმება ლანჩხუთის გამგებელ ზაზა ურუშაძესთან ვცადეთ. თუ გახსოვთ, ის ჯერ კიდევ თვეების წინ აანონსებდა "გურიაში" უკრაინელების ჩამოყვანას:
"ოთხშაბათს გვექნება პრესკონფერენცია და, ცხადია, "ლელოც" იქნება მოპატიჟებული. ყველაფერს ამ პრესკონფერენციაზე გაიგებთ.
ანდრეი ბალი? არა, ის მთავარი მწვრთნელი კი არა, შესაძლოა, მისი თანაშემწე იყოს.
ერთი ფეხბურთელი ჩამოვიყვანეთ, ერთსაც ველოდებით. ახლა გვარებს ვერ დაგიკონკრეტებთ. ერთს გეტყვით მხოლოდ - მთავარი მწვრთნელი, რა თქმა უნდა, ცნობილი სპეციალისტია.
სპონსორები? დიახ, აქაც გვაქვს სიახლეები და ამაზეც ოთხშაბათს მოგახსენებთ", - გვითხრა ურუშაძემ.
ყოველდღიური სპორტული გაზეთი "ლელო"
