ბოლო ორი კვირის განმავლობაში საქართველოში რუსეთის პირველლიგელი ნალჩიკის "სპარტაკის" ორი ყოფილი ფეხბურთელი ჩამოვიდა. პირველის შესახებ უკვე ცნობილია - რომან პოკორამ "გურიას" მთავარი მწვრთნელის პოსტზე დანიშვნისთანავე უკრაინელი ცენტრალური მცველი ვიტალი შუმეიკო მიიწვია.
შუმეიკო წლების განმავლობაში თამაშობდა ნალჩიკის "სპარტაკში" და ტურის სიმბოლურ ნაკრებშიც ბევრჯერ მოხვედრილა. ერთი ხანობა ის საუკეთესო მცველის ნომინაციაშიც ერთ-ერთი მოწინავე გახლდათ. აქედან გამომდინარე, საქართველოში მისი გამოჩენა, გარკვეულწილად, მოულოდნელიც იყო.
რატომ ჩამოვიდა ჩვენს ქვეყანაში? ამის შესახებ ჩვენი მოკლე ინტერვიუდან შეიტყობთ.
- 2012 წლის მაისამდე მოსკოვის "ტორპედოში" თამაშობდით და გუნდის კაპიტანიც
- "ტორპედო" ცნობილი კლუბი კი არის და, შესაძლოა, აქედან ამ ნაბიჯის ახსნა გაგიჭირდეთ, მაგრამ რეალურად, კლუბს ფინანსური პრობლემები ჰქონდა, მისი ძველი დიდებისგან აღარაფერი დარჩა. რომ არ წამოვსულიყავი, სხვა გზაც არ მრჩებოდა. კლუბს ფეხბურთელების დავალიანება დაუგროვდა და კონტრაქტი ორმხრივი შეთანხმების საფუძველზე გავწყვიტეთ.
- თქვენი მაშინდელი ინტერვიუ წავიკითხე ერთ-ერთ რუსულ ინტერნეტ-გამოცემაში, სადაც ამბობდით - რუსეთის პირველ ლიგაში ღირსეულ კლუბს მოვნახავო. დღეს ლანჩხუთის "გურიაში" ხართ...
- კარიერაში ჩავარდნა ყველა ფეხბურთელს აქვს. მეც ასე მომივიდა, რუსეთში ვერაფერი მოვძებნე და უგუნდოდ დავრჩი. ამ დროს დამიკავშირდა "გურიას" მწვრთნელი რომან პოკორა, რომელიც პატარაობიდან მიცნობს და საქართველოში თამაში შემომთავაზა.
- როგორც მან გვითხრა, ნალჩიკის "სპარტაკში" გაუწევია თქვენთვის რეკომენდაცია...
- ასე იყო. მას ყოველთვის ვემადლიერებოდი...
- ალბათ, ვერ წარმოიდგენდით, რომ მორიგ რეკომენდაციას პოკორა საქართველოშიც გაგიწევდათ...
- (იცინის) გეთანხმებით, მაგრამ ასეთია ფეხბურთელის ბედი და სპორტის ეს სახეობა ამითაც არის საინტერესო.
- იყო დრო, რუსეთის პრემიერლიგაში ალეკო ამისულაშვილის, დავით სირაძის, ლევან გვაზავასა და გოგიტა გოგუას თანაგუნდელი იყავით...
- მაშინ ნალჩიკის "სპარტაკი" ძლიერი გუნდი იყო და ბევრი ლიდერიც გაგვიმწარებია. სხვათა შორის, ქართველებთან ვმეგობრობდი, კარგი ბიჭები არიან.
- ახლა თავისუფალი აგენტი ხართ?
- დიახ, "ტორპედოსთან" კონტრაქტი გავწყვიტე.
- მაშინ "გურიაში" თამაშს დღემდე რატომ ვერ ახერხებთ?
- გათავისუფლების ფურცელს ველოდები, თორემ სხვა მხრივ პრობლემა არ არის. სავარაუდოდ, მომდევნო ტურში უნდა ვითამაშო.
* * *
საქართველოში კარიერის გაგრძელებას ნალჩიკის "სპარტაკის" კიდევ ერთი მოთამაშე იმედოვნებს - ახალგაზრდა ჟანტის მამიშევი, რომელიც შემთხვევით თბილისის "დინამოს" საფეხბურთო აკადემიაში ვნახეთ:
- მოხდა ისე, რომ საქართველოში მომიწვიეს. რუსეთში დუბლებში ყოფნას ისევ საქართველოს ჩემპიონატის უმაღლეს ლიგაში გამოსვლა ჯობია და ამიტომაც ჩამოვედი.
- სად თამაშობდით?
- ნალჩიკის "სპარტაკის" დუბლშემადგენლობაში, მაგრამ ეს მაშინ იყო, როცა გუნდი პრემიერლიგაში გამოდიოდა. პირველი ლიგის გუნდების სათადარიგოთა შორის ჩემპიონატი კი არ იმართება და ვფიქრობდი, სად შეიძლებოდა, მეთამაშა. და სწორედ ამ დროს მომიწვიეს საქართველოში.
- რა პოზიციაზე თამაშობთ?
- ცენტრალურ მცველად, თუმცა საყრდენ ნახევარმცველადაც ხშირად მითამაშია.
- რადგან "დინამოს" აკადემიაში ხართ, ესე იგი, "დინამომ" მოგიწვიათ?
- არა, აქ ახლობელს გამოვყევი. ჩემით კი რუსთავის "მეტალურგია" დაინტერესებული.
- ამ კლუბში თქვენი ჩარიცხვა გადაწყვეტილია?
- ეს საკითხი ახლა წყდება და იმედია, კონტრაქტს გავაფორმებ.
- საქართველოს ჩემპიონატზე რაიმე წარმოდგენა თუ გაქვთ?
- ყველა შემთხვევაში, ეს ჩემთვის საინტერესო გამოცდილება იქნება. ვიცი, რომ საკმაოდ რთული ჩემპიონატია.
(იბეჭდება მცირე ცვლილებით)
ყოველდღიური სპორტული გაზეთი "ლელო"
