ცხინვალის "სპარტაკის" პირველი გამარჯვება თურქულ შეკრებაზე

თურქეთში შეკრებაზე მყოფმა ცხინვალის "სპარტაკმა" მესამე საკონტროლო მატჩი ჩაატარა და წინა ორი სპარინგისგან განსხვავებით, კახა კაჭარავას გუნდმა ამჯერად გაიმარჯვა.

შეგახსენებთ, რომ პირველ ამხანაგურ შეხვედრაში "სპარტაკი" რუმინულ "კორონასთან" დამარცხდა (0:1), მერე ასეთივე ანგარიშით წააგო სერბულ (კრაგუევაცი) "რადნიჩკისთან"; ახლა კი მეტოქედ ჰყავდა რუმინეთის მეორე ლიგის წარმომადგენელი "იასი", რომლის მთავარი მწვრთნელიც 90-იანი წლების რუმინული ფეხბურთის ერთ-ერთი ვარსკვლავი მარიუშ ლეკეტუში გახლავთ.

მატჩი "სპარტაკის" უპირატესობით წარიმართა და მე-12 წუთზე, ლაშა ჩაფიძის გადაცემის შემდეგ ირაკლი ეხვაიამ ანგარიში გახსნა. ცოტა ხანში ჩაფიძემ ეფექტური დარტყმით მეორე გოლი გაიტანა.

კაჭარავას გუნდს კიდევ შეეძლო გატანა, მაგრამ თორნიკე თუხარელმა ორი ხელსაყრელი მომენტი ვერ გამოიყენა.

ამას კი მოჰყვა ის, რომ მეორე ტაიმის 6-წუთიან მონაკვეთში რუმინელებმა ანგარიში გაათანაბრეს. თუმცა "სპარტაკმა" მაინც შეძლო თამაშში გარდატეხის შეტანა და შეცვლაზე შესულმა ლაშა კემუხტაშვილმა საჯარიმო დარტყმით გამარჯვების გოლი გაიტანა - 3:2.

"სპარტაკმა" ასეთი შემადგენლობით ითამაშა: ნადირაძე - ჭაფოძე, კაკუბავა, მგელაძე, იოსელიანი - შონია, პარუნაშვილი - ჩაფიძე, თექთურმანიძე, თუხარელი - ეხვაია. შეცვლაზე შევიდნენ: ცერცვაძე, ქურდაძე, კ. ხიზანეიშვილი, მაისაშვილი, გაგნიძე, მეტრეველი, მაქაცარია, მოსაშვილი, ბურძენაძე, კემუხტაშვილი.

"სპარტაკის" პრესატაშე დავით ცაბაძის ინფორმაციით, კაჭარავას გუნდი მორიგ საკონტროლო მატჩს 10 თებერვალს, მაკედონიის "რაბოტნიჩკისთან" გამართავს.

ყოველდღიური სპორტული გაზეთი "ლელო"