ბოლნისის "სიონი": ყველა ფეხბურთელი თავისუფალია!

როგორი შემადგენლობით შეხვდება ბოლნისის "სიონი" საქართველოს ეროვნული ჩემპიონატის განახლებას? ეს საკითხი, ჯერჯერობით, გაურკვეველია.

როგორც გუნდის მთავარმა მწვრთნელმა ლადო ბურდულმა გვითხრა, კლუბთან კონტრაქტის ვადა ყველა ფეხბურთელს ამოეწურა.

"ჯერჯერობით, ნამდვილად არ ვიცი, რა კონტინგენტით შევხვდებით ჩემპიონატის განახლებას. ახლა ასეთი სიტუაციაა: კლუბთან კონტრაქტი ყველა ფეხბურთელს დაუმთავრდა. შესაბამისად, ისინი თავისუფალი აგენტები გახდნენ", - გვითხრა ბურდულმა.

ერთადერთი ფეხბურთელი, რომელსაც ამ დროისთვის ბოლნისურ კლუბთან ხელშეკრულება აკავშირებს, ზვიად ლობჟანიძეა.

"სიონს" ისეთი კონტინგენტი ჰყავს, საქართველოს კვალობაზე რომ არ დაიწუნება და ცხადია, სხვა ქართული გუნდები უარს არ იტყვიან კვალიფიციურ კადრებზე.

თუ რა შემადგენლობით განაახლებს "სიონი" საქართველოს ჩემპიონატს, ეს ისევ და ისევ კლუბის ბიუჯეტზე იქნება დამოკიდებული, ბიუჯეტი კი, ჯერჯერობით, არ დამტკიცებულა. შესაბამისად, უცნობია, სად გაივლის ბოლნისური კლუბი წინასასეზონო მოსამზადებელ შეკრებას.

ერთადერთი ფეხბურთელი, ვინც ოფიციალურად განაცხადა "სიონიდან" წასვლის შესახებ, გურამ გურეშიძეა. მისი გადაბირება რამდენიმე ქართულ და აზერბაიჯანულ კლუბს სურს.

ამ დროისთვის, საქართველოს ჩემპიონატში "სიონს" 14 ქულით მე-14 ადგილი უკავია.

(იბეჭდება მცირე ცვლილებით)
ყოველდღიური სპორტული გაზეთი "ლელო"