ცხინვალი-სიონი 2:1 - როცა სიახლეები ჭარბობს

უკვე ცნობილია, რომ "სპარტაკი" 2015 წლიდან "ცხინვალის" სახელწოდებით იასპარეზებს. გუნდმა II წრისთვის მზადება სხვებთან შედარებით ბევრად ადრე, 20 დეკემბერს დაიწყო. ამ თვის ბოლოს კი კახა კაჭარავას დამოძღვრილი გუნდი თურქულ შეკრებაზე გაემგზავრება, სადაც ოთხ საკონტროლო მატჩს ჩაატარებს.

მანამდე კი "ცხინვალმა" უკვე მეორე სპარინგ-მატჩი ჩაატარა ეროვნული ნაკრების ტექნიკურ ცენტრ "ბასაზე": "მეტალურგთან" გამარჯვებას (4:0) 21 იანვარს კიდევ ერთ უმაღლესლიგელთან, "სიონთან" მოგება მოჰყვა - 2:1.

ამ სპარინგში ანგარიში "ცხინვალის" ახალწვეულმა, 21 წლის რატი ცაცკრიალაშვილმა გახსნა, რასაც პირველ ტაიმშივე გელა ჯინჭარაშვილის საპასუხო გოლი მოჰყვა. მატჩის მიწურულს კი "ცხინვალელთა" პოტენციურმა ახალწვეულმა, 18 წლის თენგიზ მაკასარაშვილმა საბოლოო ანგარიში დააფიქსირა.

ისე, როგორც წინა სპარინგ-შეხვედრაში, კახა კაჭარავამ ამჯერადაც ორი შემადგენლობით ათამაშა თავისი გუნდი:

I ტაიმი: ს. ნანიევი - ბაჩიაშვილი, კაჭკაჭიშვილი, მაისაშვილი, ნ. ჯიშკარიანი - ბურძენაძე, იმედაშვილი - მარკოზაშვილი, ცაცკრიალაშვილი, მუმლაძე - შინდაგორიძე;
II ტაიმი: ნადირაძე - მთივლიშვილი, გიორგაძე, მაისაშვილი, ცერცვაძე - ს. მალანია, მახარობლიძე - ინჯიბაშვილი, ახვლედიანი, თავაძე - მაკასარაშვილი.

აი, რაც შეეხება "სიონს", ბოლნისურმა გუნდმა, ობიექტურ მიზეზთა გამო, მზადება სულ ახლახან დაიწყო და ეს პირველი საკონტროლო მატჩი იყო; თანაც, "სიონის" მთავარმა მწვრთნელმა ლადო ბურდულმა "ცხინვალის" წინააღმდეგ ის ფეხბურთელები ათამაშა, რომელთაგანაც ზოგი დუბლშემადგენლობაში ასპარეზობს, ზოგი კი სინჯებზეა.

"სიონი": მაღრაძე, ჯაფარიძე, ქურდაძე, ბურნაძე, გიორბელიძე, გ. ჯინჭარაშვილი, გოგოლაძე, გ. ოქროპირიძე, ჩაფიძე, სტეფანია, ლ. ჯინჭარაშვილი.
შეცვლაზე შევიდნენ: ხუმარაშვილი, ს. გურეშიძე, ჩიფჩიური, ჯაყელი, ცაბოლაშვილი, ქებურია, ბ. ოქროპირიძე.

მომდევნო საკონტროლო მატჩს "სიონი" 25 იანვარს "სამტრედიასთან" ჩაატარებს, ოღონდ ლადო ბურდული ამჯერად ძირითად შემადგენლობას დაეყრდნობა. აქვე იმასაც ვიტყვით, რომ 27 იანვარს "სიონი" გორის "დილას" წაესპარინგება, 28 იანვარს - "ვიტ ჯორჯიას", 30 იანვარს კი - "საბურთალოს".

(იბეჭდება მცირე ცვლილებით)
ყოველდღიური სპორტული გაზეთი "ლელო"