უმაღლესი ლიგა. XVII ტურის წინ: მალე გაზაფხული მოვა!

საინტერესო ტური გველოდება: შაბათის ორი მატჩით ზამთარს გავაცილებთ, კვირის დარჩენილი ექვსი შეხვედრით კი გაზაფხულს შევეგებებით!

თუმცა, ამ "საფეხბურთო ლირიკის" გარდა ბევრად უფრო მნიშვნელოვანი იქნება უმაღლესი ლიგის გუნდების მზადყოფნის შემოწმება ჩემპიონატის საგაზაფხულო ეტაპისათვის. ანუ, სწორედ მარტში უნდა გამოჩნდეს, თუ რამდენად ნაყოფიერი შეკრება გაიარეს ჩვენმა გუნდებმა ზამთრის მოსამზადებელ ეტაპზე: გაზაფხულის პირველ თვეში ჩემპიონატის ხუთი ტურია, პლუს თასის საპასუხო მოეთხედფინალური მატჩები!

მოკლედ, სწორედ ამ თვეში გამოიკვეთება გარკვეული "სატურნირო კონტურებიც" და, დიდი ალბათობით, ის გუნდები აღმოჩნდებიან მეტ-ნაკლებად პრიორიტეტულ მდგომარეობაში, ძირითადი შემადგენლობის როტაციის საშუალება რომ ექნებათ.

იმის იმედიც დავიტოვოთ, რომ თითქმის ყველა გუნდის უამრავი ახალწვეულიც, რაც შეიძლება, მალე გადაჭრის ახალ პარტნიორებთან შეთამაშების პრობლემას და, საერთოდაც, გაზაფხულის პირველი თვის მატჩებიც საინტერესოდ, დამაინტრიგებლად და, რაც მთავარია, უსკანდალოდ ჩაივლის...


ძველი მეტოქეები უმაღლეს ლიგას ერთწლიანი პაუზის მერე დაუბრუნდნენ, თუმცა, მიმდინარე სეზონში სხვადასხვა მიზნები აქვთ: "კოლხეთი" გასავარდნი (გნებავთ, საპლეიოფე) ზონის სიახლოვეს იმყოფება, ბათუმელები კი მესამე ადგილამდე აღზევდნენ.

სხვათა შორის, ამ ზამთრის მოსამზადებელ პერიოდში ყველაზე უმნიშვნელო ცვლილებები სწორედ ბათუმის "დინამოში" მოხდა და გამოცდილი სპეციალისტის, შოთა ჭეიშვილის დამოძღვრილი გუნდის სტაბილურობა პირდაპირპროპორციულად არის ასახული სატურნირო ცხრილში.

აი, "კოლხეთში" კი ბევრად უფრო მეტი სიახლეებია და ყველაზე აქტუალურიც, ალბათ, ის იქნება, თუ რამდენად მოხდება პირველ წრეში გუნდის საუკეთესო ბომბარდირის დათა სიჭინავას "უმტკივნეულოდ" ჩანაცვლება სხვა შემტევი (გნებავთ - გოლიადორი) ფეხბურთელით. მით უფრო, რომ ზაზა ინაშვილის გუნდი დიდი შედეგიანობით ნამდვილად ვერ გამოირჩევა: 16 მატჩი და მეტოქეთა კარში გატანილი 13 გოლი...

...არავინ იცის, "კოლხეთის" სატურნირო მდგომარეობა როგორი იქნებოდა, გუნდს საშინაო მატჩები ფოთში, მშობლიურ "ფაზისზე" რომ ჩაეტარებინა; თუმცა, ამ ყველაფრის მიუხედავად, შავიზღვისპირელთა "დერბი" მაინც დიდ ინტერესს იწვევს, თანაც, ამ გუნდების ურთიერთდაპირისპირებათა ისტორიაში ხომ, ფაქტობრივად, სრული თანაფარდობაა!..


ამ გუნდების დაპირისპირებას "დერბის" ვერ დავარქმევთ, თუმცა, მეზობლების პაექრობა კი ნამდვილად უნდა ვუწოდოთ. თანაც, ვიდრე მშობლიური ლანჩხუთის სტადიონზე თამაშის უფლებას მიიღებდა, თავის საშინაო მატჩებს "გურია" ხომ სწორედ ქობულეთში, "ჩელე არენაზე" ატარებდა...

მეორე წრე მეტოქეებმა სხვადასხვაგვარად დაიწყეს; "გურიამ" უმნიშვნელოვანესი 3 ქულა მოიპოვა და მეტად კომფორტულ და, რაც მთავარია, უხიფათო პოზიციაზეც (მერვე ადგილზე) იმყოფება; აი, "შუქურასათვის" კი კვლავაც დაუძლეველ ბარიერად რჩება სტუმრად ჩატარებული მატჩები - ისე, როგორც "ჩიხურასა" და "სიონს", ქობულეთელთა გუნდსაც გასვლითი შეხვედრა ჯერ არ მოუგია.

სამაგიეროდ, საყოველთაო აზრია, რომ "შუქურა" ქულების უმეტესობას სწორედ საშინაო სარბიელზე აგროვებს და მასპინძელთათვის ისიც დამატებითი ფაქტორი იქნება, რომ ახალი მწვრთნელის, გელა სანაიას ხელმძღვანელობით პირველი მატჩი უნდა ჩაატარონ ქობულეთში.

აღარაფერს ვამბობთ ფართოდ დაანონსებულ (გნებავთ - რეკლამირებულ) ახალწვეულთა მოსალოდნელ გამოჩენაზეც, მით უმეტეს, რომ, როგორც გვარწმუნებენ, თურმე "შუქურას" ბრაზილიელი ახალწვეულები, წლების წინ რუსთავის "ოლიმპში" ანდერსონ აკინო თუ ალექს ფრაგა რომ ბრწყინავდნენ, იმათზე ნაკლები დონის არ არიანო! ვნახოთ, ვნახოთ..


კიდევ ერთი "დერბი" (ამჯერად იმერული), სადაც ერთიანად განახლებული "ზესტაფონი" ამბიციურ "ჩიხურას" უნდა დაუპირისპირდეს.

მოდი, ჯერ "ჩიხურაზე" ვთქვათ, რამეთუ სოსო ფრუიძის გუნდმა პირველი წრის ბოლო ტურსა და მეორე წრის დასაწყისში მოპოვებული ზედიზედ ორი მოგებით სატურნირო მდგომარეობაც მკვეთრად გაიუმჯობესა და "ევროზონასაც" მიუახლოვდა.

თანაც, ამ ზამთრის მოსამზადებელ ეტაპზე "ჩიხურა", საგრძნობლად გაძლიერდა და საჩხერელთა გუნდს, ჩვენი აზრით, რეალურად ხელეწიფება ზედიზედ მესამედ მიიღოს მონაწილეობა ევროტურნირებზე. ოღონდ, ამ მიზნის მისაღწევად, ალბათ, უკვე დროც მოუვიდა, რომ "ჩიხურამ"... სტუმრადაც შეძლოს გამარჯვებ(ებ)ის მოპოვება: 8 გასვლით შეხვედრაში მოპოვებული 3 (!) ქულა, დაგვეთანხმებით, ძალიან უარყოფითი შედეგია ამბიციური გუნდისათვის.

"ზესტაფონის" ახალ თავკაცს, გიორგი მიქაძეს (რომელსაც თავის დროზე "ჩიხურაში" უთამაშია - საჩხერელთათვის სადებიუტო, 2006/07 წლების სეზონში) კი სერიოზული ფიქრი მოუწევს, თუ როგორი ოპტიმალური შემადგენლობით დაუპირისპირდეს ერთობ ძლიერ მეტოქეს. თანაც, "ჩიხურას" თუ, ფაქტობრივად, სამი ახალწვეული ჰყავს, "ზესტაფონში", პირიქით - მხოლოდ ერთი-ორი ფეხბურთელიღა შემორჩა პირველი წრის შემადგენლობიდან.

აქვე, იმასაც გაგახსენებთ, რომ ამ გუნდებს შორის ჩატარებული პირველი წრის მატჩი ერთობ საინტერესო და დრამატული გამოდგა; ამას გარდა, "ჩიხურამ" თასის მერვედფინალშიც მოახერხა "ზესტაფონის" ბარიერის დაძლევა.


იმის მიუხედავად, რომ ამ მატჩში ერთმანეთის პირისპირ უმაღლესი ლიგის ფინანსურად გაჭირვებული ("მეტალურგი") და ამ ბოლო დროს ყველა ასპექტში მოძლიერებული ("ზუგდიდი") უნდა წარსდგნენ, მაინც ძნელია, ასე ხელაღებით უპირატესობა სტუმრებს მივანიჭოთ.

რა თქმა უნდა, იმ ფაქტს ვერ გავექცევით, რომ ბესიკ შეროზიას მისვლის მერე "ზუგდიდმა" წაუგებლადაც "ისწავლა" და, რაც მთავარია, მოგებებიც "გაიხსენა" (თანაც, არცთუ სუსტ მეტოქეებთან).

ამას გარდა, ნუ დაგვავიწყდება, რომ "ზუგდიდს" ადგილობრივი გამგეობაც ეხმარება (რისი დასტურიც ნაყოფიერი უცხოური შეკრება იყო) და შემადგენლობაც გვარიანად გაძლიერებული ჰყავს (თანაც, ახალწვეულთა უმრავლესობა გარკვეული პაუზის მერე დაუბრუნდა მშობლიურ გუნდს).

თუმცა, ეს იმას არ ნიშნავს, რომ ფაქტობრივად, ენთუზიაზმზე მოასპარეზე "მეტალურგი" უბრძოლველად რაიმეს დათმობს: ვარლამ კილასონიას ახალგაზრდული კრებული (წინა ტურში დუბლებიდან დაწინაურებულ კიდევ ოთხ რუსთაველ ჭაბუკს ჰქონდა დებიუტი უმაღლეს ლიგაში) "საჩუქარი" არავისთვის იქნება, ოღონდ, ის არის საკითხავი, სადამდე და როდემდე ეყოფათ ძალები ელემენტარულ პირობებს მოკლებულ "მეტალურგის" ფეხბურთელებს.


ათმატჩიანი მოუგებელი სერიიდან გამომდინარე, "ვიტ ჯორჯია" ცხრილის ბოლო საფეხურზე აღმოჩნდა და ახალგაზრდა "ვეტერინარებს" ამიერიდან დიდი ძალისხმევა დასჭირდებათ სატურნირო მდგომარეობის გამოსასწორებლად.

არადა, ზურაბ ბერიძის დამოძღვრილ გუნდს ვერც ბრძოლისუნარიანობას დაუწუნებს ვინმე, ვერც მონდომებას, მაგრამ ფეხბურთელთა გამოუცდელობა ჩვენს ჩემპიონატშიც ერთობ სეროზულ ფაქტორად უნდა მივიჩნიოთ.

უფრო ზუსტად, მეტოქე გუნდის ფეხბურთელთა გამოცდილებაა ხოლმე ხშირ შემთხვევაში წარმატების მომტანი. აი, ამ მხრივ კი, "სამტრედია" ვფიქრობთ, უკონკურენტოა - ზაზა ზამთარაძის გუნდში ხომ არაერთი ისეთი ფეხბურთელია, ჩვენთან თუ უცხოეთში, წლების განმავლობაში არაერთი წარმატებული სეზონი რომ ჩაუტარებია.

ეგაც რომ არ იყოს, ამ მატჩში ერთ-ერთი აუტსაიდერი და ერთ-ერთი ლიდერი ხვდებიან ერთმანეთს და, აქედან გამომდინარე, წყვილის ფავორიტად სტუმრები უნდა მივიჩნიოთ. მით უფრო, რომ ჩემპიონატის ბოლო ორ მატჩში მოპოვებული ერთადერთი ქულის შემდეგ "სამტრედია" პირველ სამეულსაც ჩამოსცილდა.

თუმცა, "ვიტ ჯორჯიამ" ხომ ამ სეზონში უკვე რამდენჯერმე შემოგვთავაზა სიურპრიზი...

ამ ორივე გუნდის ასპარეზობა პირველი წრის მთავარ (და სასიამოვნო) მოულოდნელობ(ებ)ად მივიჩნიეთ: მოკრძალებული რესურსის მიუხედავად, "მერანმაც" და აწ უკვე "ცხინვალმა" (პირველ წრეში "სპარტაკმა") რამდენიმე მართლაც გამორჩეული მატჩი შემოგვთავაზეს და ბევრი რომ არ ელოდა, ზამთრის პაუზასაც ერთობ კომფორტულ სატურნირო მდგომარეობაში შეხვდნენ.

თუმცა, ამ ბოლო დროს, "ცხინვალს" გარკვეული უიღბლობაც დასჩემდა, ცალკე, ალბათ, სხვა მიზეზებიც (მსაჯობასთან დაკავშირებით) უნდა ვახსენოთ, მაგრამ იმ ფაქტს კი გვერდს ვერ ავუვლით, რომ კახა კაჭარავას გუნდმა სათასო მეოთხედფინალის ჩათვლით, უკვე ზედიზედ სამი მატჩი წააგო.

ამას საკადრო პრობლემებიც ემატება: "მერანთან" სტუმრად ჩასატარებელ მატჩში გუნდს ვერ დაეხმარება მთავარი "დამრტყმელი ძალა" ნიკა კაჭარავა.

"მერანი" უმაღლეს ლიგაში როცა გამოჩნდა (2011/12 წლების სეზონი) იმის მერე, როგორც წესი, "სახლის გუნდად" მოვიხსენიებდით ხოლმე. ჰო, მარტვილიდან ქულ(ებ)ის წამოღება ხომ ყველა გუნდს უჭირდა, თუმცა, ამის შემდეგ "მერანს" სხვა ქალაქებში უწევდა საშინაო მატჩების ჩატარება და აი, გვარიანი პაუზის მერე, კალენდარულ შეხვედრას მარტვილმა უნდა უმასპინძლოს.

ანუ, ეს იქნება უკრაინელი სპეციალისტის ვლადიმირ ლობასის პირველი ნაღდი საშინაო მატჩი მარტვილელი ქომაგების წინ!


"ვიტ ჯორჯიას" მსგავსად, ასევე ათმატჩიანი მოუგებელი სერია აქვს ჩემპიონატში "ტორპედოსაც" და ამის გამოცაა, რომ ქუთაისელები ძალიან ახლოს იმყოფებიან სახიფათო ზონასთან. თუმცა, არამხოლოდ ჩვენი აზრია, რომ ახალი მწვრთნელ გიორგი დარასელიას ხელმძღვანელობით მოასპარეზე "ტორპედოს" საკმარისზე მეტი პოტენციალი გააჩნია სატურნირო მდგომარეობის გამოსასწორებლად.

თუმცა, ქუთათურთა ახალმა თავკაცმა რაც შეიძლება მალე უნდა შეძლოს გუნდის უამრავი ახალწვეულის ერთმანეთთან შეთამაშების პრობლემის აღმოფხვრა. აი, "დილა" კი კვლავაც წარმატებით აგრძელებს ორივე "ფრონტზე" ასპარეზობას და კვლავაც კვალში უდგას ლიდერ თბილისის "დინამოს".

ადრეც არაერთხელ აღვნიშნეთ, რომ "დილას" ახალგაზრდა თავკაც უჩა სოსიაშვილს უმაღლეს ლიგაში ყველაზე დაბალანსებული შემადგენლობა ჰყავს და, რაც ყველაზე მთავარია, გორელთა გუნდში გამოცდილ და ახალგაზრდა ფეხბურთელთა მშვენიერი "სინთეზიც" ჩამოყალიბდა.

დაბოლოს, ისევ გიორგი დარასელიაზე: შეგახსენებთ, რომ ამ სპეციალისტის ხელმძღვანელობით მიაღწია "დილამ" თავის საუკეთესო შედეგს (II ადგილი) საქართველოს ჩემპიონატების ისტორიაში (2012/13 წლების სეზონში)...


"საკუთარი კედლების" ფაქტორი ჩვენს ჩემპიონატში მთლად გადამწყვეტი თუ არა, გარკვეულად მნიშვნელოვანი ფაქტორია; სამწუხაროდ, "სიონი" უკვე 2 წელიწადია საშინაო მატჩებს ბოლნისში ვერ ატარებს და ამ სეზონში ქვემოქართლელთა არასტაბილური ასპარეზობის ერთ-ერთი მიზეზი ესეც უნდა იყოს.

უმტკივნეულდ ვერ ჩაივლიდა "სიონის" შემადგენლობაში მომხდარი "საკადრო რევოლუციაც": წინა სეზონში (და, ნაწილობრივ - მიმდინარე ჩემპიონატის პირველ წრეშიც) ლადო ბურდულის გუნდი ძირითადად 30-ს წელს გადაცილებული ფეხბურთელებით იყო დაკომპლექტებული. ზამთრის პაუზის მერე კი ისინი ერთი-მეორეზე პერსპექტიულმა ახალგაზრდა ახალწვეულებმა ჩაანაცვლეს. თანაც მეორე წრის სტარტზე ყველაზე "კოშმარული" კალენდარი ხომ "სიონს" აქვს: პირველ ტურში "ჩიხურა", ახლა - "დინამო თბილისი", მერე კი - "სამტრედია"!..

წინა ტურში "დინამომ" უმნიშვნელოვანესი მატჩი მოიგო, როცა სტუმრად ერთ-ერთი უშუალო კონკურენტი "სამტრედია" დაამარცხა. დინამოელთა ქომაგთათვის ნამდვილად არ იქნებოდა უმნიშვნელო ის ფაქტი, რომ გუნდის ყველა ახალწვეულმა ლეგიონერმა ის მატჩი მაღალ დონეზე ჩაატარა.

ვნახოთ, როგორ შეხვდებიან ეს ახალწვეულები კიდევ ერთ გასვლით მატჩს (ზამთრის პაუზის მერე... ზედიზედ მესამეს!); თანაც, არასახარბიელო სატურნირო მდგომარეობაში მყოფ "სიონთან" რთული მატჩი რომ იქნება, ეს დინამოელთა თავკაც კახა გოგიჩაიშვილსაც კარგად მოეხსენება; მით უფრო, რომ დისკვალიფიკაციის გამო "დინამოს" ორივე ფლანგის მცველი (ოთარ კაკაბაძე, ლაშა თოთაძე) არ ეყოლება.

(იბეჭდება მცირე ცვლილებით)
ყოველდღიური სპორტული გაზეთი "ლელო"