5 მარტს საქართველოს ეროვნული საფეხბურთო ჩემპიონატის XVIII ტურის ექვსი მატჩი გაიმართა. ქობულეთში, ბათუმის "დინამოსთან" სტუმრად გამართულ მატჩში დამარცხდა სატურნირო ცხრილში ამ ტურის წინ გალიდერებული გორის "დილა". შეხვედრის ერთადერთი გოლი 63-ე წუთზე თეიმურაზ შონიამ გაიტანა. შესაბამისად, თუკი ამ ტურში თბილისის "დინამო" "ზესტაფონთან" მოიგებს, ცხრილში "დილა" პირველობას დათმობს.
საკუთარ მოედანზე გამარჯვება იზეიმა "სამტრედიამ", რომელმაც ბოლნისის "სიონი" ანგარიშით 3:1 დაამარცხა. ანგარიში ზურაბ ხიზანიშვილმა გახსნა (40), რევაზ გეწაძემ კი უპირატესობა ორბურთიანი 47-ეზე გახადა. ბოლნისელებმა მხოლოდ ერთი ბურთი გაქვითეს - 68-ე წუთზე ცოტნე ქებურიამ გაიტანა,
ბევრისთვის მოულოდნელად, ივაწმინდაში გამარჯვება იზეიმა ქობულეთის "შუქურამ", რომელმაც საჩხერის "ჩიხურასთან" მატჩის ბედი ბოლო ხუთ წუთში, გიორგი გურულისა (86) და გიორგი კუხიანიძის (90) გოლით გადაწყვიტა.
თავ-თავიანთი შეხვედრები მინიმალური ანგარიშით მოიგეს "გურიამ" და "ცხინვალმა". ლანჩხუთში, ევგრაგი შევარდნაძის სახელობის სტადიონზე "გურიამ" რუსთავის "მეტალურგს" თორნიკე მოსიაშვილის (18) გოლით სძლია, ხოლო "ცხინვალს" თბილისში "ვიტ ჯორჯიასთან" ლაშა შინდაგორიძემ (80) გაამარჯვებინა.
გამარჯვებული ვერ გამოვლინდა ქუთაისში გამართულ მატჩში (1:1), რომელშიც "ტორპედომ" მარტვილის "მერანს" უმასპინძლა. სტუმრები საბა ლომიას (32) გოლით იგებდნენ, თუმცა 45-ე წუთზე ნიკოლოზ საბანაძემ გაიტანა და ქუთათურებს ქულა გადაურჩინა.
დინამო (ბთ)-დილა 1:0 (0:0)
სამტრედია-სიონი 3:1 (1:0)
ჩიხურა-შუქურა 0:1 (0:0)
გურია-მეტალურგი 1:0 (1:0)
ცხინვალი-ვიტ ჯორჯია 1:0 (0:0)
ტორპედო-მერანი 1:1 (1:1)
დღის ერთი მატჩი, რომელშიც თბილისის "დინამო" "ზესტაფონს" მასპინძლობს, მოგვიანებით დასრულდება.
