ტორპედო-სამტრედია 3:1 - ღირსეული რევანში [VIDEO]

საგაზაფხულო ეტაპზე "ტორპედო" და "სამტრედია" მესამედ წარდგნენ ერთმანეთის პირისპირ. თასის მეოთხედფინალში, ორი მატჩის ჯამში, სამტრედიელებმა იმარჯვეს (2:1, 0:0), თუმცა ისიც უნდა ითქვას, რომ გიორგი დარასელიას გუნდი ამ შეხვედრებში მეტოქეს თუ არ სჯობდა, არც არაფერში ჩამოუვარდებოდა.

ახლა კი ჩემპიონატში ზედიზედ ორი მატჩის მომგებ ქუთათურებს "სამტრედიასთან" რევანშის საშუალება ეძლეოდათ. ბუნებრივია, თავიანთი გეგმები ჰქონდათ სამტრედიელებსაც. ასე რომ, იმერული დერბი მორიგ დაძაბულ და საინტერესო ბრძოლას გვპირდებოდა...

საწყისმა წუთებმა თანაბარ ბრძოლაში ჩაიარა. პირველად კარში სამტრედიელებმა დაარტყეს - რევაზ გეწაძემ საჯარიმოს ხაზიდან "დააქუხა", მაგრამ ბექა შეყრილაძემ ბურთი მუშტებით მოიგერია.

ცოტა ხანში სამტრედიელებმა იძულებითი ცვლილება განახორციელეს - დავით კვირკველიამ ტრავმა მიიღო და მის ნაცვლად მოედანზე გიორგი თევზაძე შევიდა.

ტაიმის შუაწელში ბექა ტუღუშმა და ალექსანდრე გურულმა უზუსტო დარტყმები "გაცვალეს". ქუთაისელთაგან ყველაზე მეტად მარჯვენაფლანგელი დავით კირკიტაძე აქტიურობდა. ტაიმის მიწურულს, სწორედ მისი შესანიშნავი თამაშისა და ზუსტი გადაცემის შემდეგ ოთარ კვერნაძემ ქუთაისელები ახლო მანძილიდან დააწინაურა.

სხვათა შორის, დარასელიამ, "ცხინვალთან" მოგებული თამაშის შემდეგ, ძირითად შემადგენლობაში მხოლოდ ერთი ცვლილება განახორციელა - ნიკა საბანაძის ნაცვლად ცენტრფორვარდად კვერნაძე დააყენა, რომელმაც მწვრთნელის ნდობა გაამართლა.

მეორე ნახევარი გაცილებით დაძაბული და თვალსასეირო გამოდგა. სამტრედიელებმა აქტიურად განაახლეს თამაში, თუმცა ისინი მეტოქის საჯარიმოში ვერ ახერხებდნენ შეღწევას და შორეული დარტყმებით ცდილობდნენ ანგარიშის გათანაბრებას.

გიგა ბეჭვაიასა და გეწაძის "ნასროლი" ბურთები ხარიხას გადასცდა, თუმცა სამტრედიელთა გარჯას უკვალოდ არ ჩაუვლია - გეწაძის ფლანგური გარღვევისა და საჯარიმოში ჩაწოდების შემდეგ გიორგი ქიმაძემ თავით საკუთარ კარში ჩაჭრა ბურთი და ასე აღდგა წონასწორობა.

სამტრედიელთა სიხარულმა მხოლოდ ორ წუთს გასტანა - ქუთაისელთა ერთ-ერთმა გამორჩეულმა ფეხბურთელმა ირაკლი კლიმიაშვილმა დაახლოებით 27-30 მეტრიდან დიდებულად შეასრულა მახვილი კუთხით დანიშნული საჯარიმო და "ტორპედო" მეორედაც დაწინაურდა.

ბუნებრივია, სამტრედიელებმა მთელი აქცენტი შეტევაზე გადაიტანეს, რამაც ზურგის მოშიშვლება გამოიწვია, ქუთათურებს კი მწვავე კონტრშეტევების განხორციელების საშუალება მიეცათ.

სტუმრებს განსაკუთრებით ბექა ტუღუშმა გაუშრო სისხლი - ჯერ მისი შორეული დარტყმა გადასცდა ხარიხას, ხოლო შემდეგ მეკარესთან პირისპირ გასული ვახტანგ კვარაცხელიასგან კარგი გადაცემა მიიღო და უძლიერესი დარტყმით ძელისგან ასხლეტილი ბურთი რევაზ თევდორაძის კარის ბადეში გაახვია.

ზაზა ზამთარაძის შეგირდები დანებებას არ აპირებდნენ. თორნიკე კაპანაძემ ქუთაისელთა კარის ძელი შეაზანზარა. გამოვარდილ ბურთზე ალექსანდრე იაშვილი ამატებდა, მაგრამ წინ ბაქარ მირცხულავა გადაეღობა და გუნდი გოლისგან იხსნა.

საბოლოოდ, დარასელიას გუნდმა დამსახურებული რევანში აიღო და ზედიზედ სამი მოგებით სატურნირო მდგომარეობაც მნიშვნელოვნად გაიუმჯობესა.

"სამტრედიას" კი ასეთი თამაშით დასახული მიზნების მიღწევა გაუჭირდება.

საქართველოს ეროვნული ჩემპიონატი. უმაღლესი ლიგა. XXI ტური
22.03. ქუთაისი. ცენტრალური. 1 500 მაყურებელი
ტორპედო-სამტრედია 3:1
გოლები: 1:0 კვერნაძე (40. კირკიტაძის პასით), 1:1 ქიმაძე (56-საკ. კარში), 2:1 კლიმიაშვილი (58), 3:1 ტუღუში (75. კვარაცხელიას გადაცემით)

ტორპედო (4-2-3-1): შეყრილაძე - იოსელიანი, ადამაძე, მირცხულავა, ქიმაძე - ჭელიძე, მამასახლისი - კირკიტაძე (73. ბაბუნაშვილი), კლიმიაშვილი (78. გოგუაძე), ტუღუში - კვერნაძე (63. კვარაცხელია).
სათადარიგოები: შევჩენკო, მახვილაძე, ქებაძე, ჩიკვილაძე
მწვრთნელი: გიორგი დარასელია
სამტრედია (4-1-4-1): თევდორაძე - ბეჭვაია, ხიზანიშვილი, კაკუბავა, კვირკველია (12. თევზაძე) - დათუნაიშვილი - დოლიძე, გორგიაშვილი (79. კერძევაძე), გურული (71. გურული), გეწაძე - კაპანაძე.
სათადარიგოები: მუჯრიშვილი, შალიკაშვილი, ბოლქვაძე, რამოსი
მწვრთნელი: ზაზა ზამთარაძე
გაფრთხილება: დათუნაიშვილი (23), ბეჭვაია (25), ქიმაძე (36), კლიმიაშვილი (63)
არბიტრი: ლ. სილაგავა.

მომდევნო (XXII) ტური
3 აპრილი, პარასკევი
გურია-ვიტ ჯორჯია
ზუგდიდი-ცხინვალი
სამტრედია-შუქურა
ზესტაფონი-მეტალურგი
ჩიხურა-მერანი
სიონი-კოლხეთი
დინამო (ბთ)-ტორპედო
დინამო (თბ)-დილა.

ბომბარდირები:
ი. მოდებაძე (დილა) 10
ჯ. დვალი (ზესტაფონი)* 10
ო. კვერნაძე (ტორპედო) 8
დ. სიჭინავა (კოლხეთი/სიონი) 8
ნ. კვეკვესკირი (დილა) 7
გ. პაპუნაშვილი (დინამო თბ) 7
ნ. საბანაძე (დინ. თბ/ტორპ) 7
თ. მუმლაძე (ჩიხურა) 7
შენიშვნა: * - ჯაბა დვალი კარიერას მოლდოვის "დაჩიაში" განაგრძობს.