"ტორპედოს" ლოგო ქალაქის დროშის ფერებსა და სიმბოლიკას უნდა შეეფერებოდეს!"

ქუთაისის "ტორპედოში" მომხდარი საკადრო ცვლილების შედეგად, აღმასრულებელი დირექტორის პოსტი იურიდიული სამსახურის ხელმძღვანელმა ზურაბ ჩაკვეტაძემ დაიკავა. მან კლუბთან დაკავშირებულ გეგმებზე, ხედვებსა და პრიორიტეტებზე ილაპარაკა.

"ტორპედოს" ოფიციალურ ვებგვერდზე მითითებულია, რომ ჩაკვეტაძემ და მისმა მეგობრებმა 1999 წელს დაარეგისტრირეს "ტორპედოს" გულშემატკივართა კავშირი, რომელიც საქართველოში ქომაგთა ერთ-ერთი პირველი გაერთიანებაა იურიდიული სტატუსით. ჩაკვეტაძემ 4 წლის განმავლობაში კლუბში იურისტად იმუშავა, მერე კი უცხოეთში წავიდა და ამდენივე დრო დაჰყო მოსკოვის ტურისტული სააგენტოს გენერალურ მენეჯერად; მერე ერთი წელი იყო მილანში, ხუთიც - ბარსელონაში, სადაც სამშენებლო ბიზნესში ჩაერთო. პარალელურად, ბარსელონაში სპორტული ორგანიზაციების მართვისა და ორგანიზების სპეციალობით სწავლობდა.

საქართველოში 2011 წელს დაბრუნდა, 2014 წლის 1-ელ დეკემბერს კი "ტორპედოში" ისევ იურისტად მიიწვიეს, პლუს, ლიცენზირების მენეჯერიც გახდა.

ჩაკვეტაძე ამბობს, რომ კლუბის განვითარებაზე მუშაობას დეტალებით იწყებს:

"ქუთაისისთვის "ტორპედო" არის ბრენდი. ამიტომ არასწორად მიმაჩნია ლოგოს ფერებისა და ატრიბუტიკის სისტემატური შეცვლა. ის მუდმივი და შეჯერებული უნდა იყოს.

კომუნისტების ეპოქაში "ტორპედო" თეთრ-წითელი ფერის მაისურებით თამაშობდა. ფერების მუდმივი ცვლა დამოუკიდებლობის შემდეგ დაიწყო და ამ კუთხით გაურკვევლობაა.

ჩვენ გამოვაცხადებთ კონკურსს ლოგოზე, გულშემატკივართა დროშასა და გუნდის ძირითადი და სათადარიგო სათამაშო ფერის მაისურის დიზაინზე. ეს ყველაფერი ქალაქის დროშის ფერებსა და სიმბოლიკას უნდა შეეფერებოდეს.

"ტორპედოს" სტადიონის ადმინისტრაციულ შენობაში კი კლუბის მუზეუმი მოეწყობა, სადაც გულშემატკივრებს ცალკე კუთხე ექნებათ. თბილისის "დინამოს" შემდეგ "ტორპედო" საქართველოს ყველაზე ტიტულოვანი კლუბია და ჩვენ მიერ მოპოვებულ თასებსა და მედლებს მუზეუმში გამოვფენთ", - ამბობს ჩაკვეტაძე.

ქუთაისელთა აღმასრულებელმა დირექტორმა საფეხბურთო სკოლის აუცილებლობაზეც ილაპარაკა:

"ჩვენი ერთ-ერთი პრიორიტეტი ბავშვთა ფეხბურთი იქნება. შესაძლოა, ამ ეტაპზე, სპორტსკოლის ნორმალური მუშაობისთვის სათანადო საშუალება არ არის, თუმცა ის რაც შეიძლება მალე უნდა დავაფუძნოთ. ბევრი პროცედურაა გასავლელი, ოღონდ ეს პროცესი არ შეფერხდება და სკოლა მთავარი სტადიონის ტერიტორიაზე ამოქმედდება".

ჩაკვეტაძის თქმით, გუნდის მიზანი ევროთასებზე გასვლა და შემოსავლების წყაროების გაზრდაა:

"თანხების განაწილებისას არჩევანის წინაშე ვიდექით - ან ინფრასტრუქტურაზე უნდა გვეზრუნა, ან - შედეგზე. ამ ეტაპზე უპირატესობას მეორეს ვანიჭებთ, რადგან გულშემატკივრებისთვის სუსტი გუნდი მიუღებელია. შედეგი კი შესაძლებლობებზეა დამოკიდებული.

საქართველოში საბიუჯეტო კლუბი ფინანსურად კერძოსავით ხელგაშლილი ვერ იქნება. თუმცა ოქროს შუალედის გამონახვა შეიძლება. ქალაქის ხელმძღვანელობის წყალობით გაგვაჩნია რესურსი. ამით საქართველოს ჩემპიონატში დადებითი შედეგი უნდა გვქონდეს, ყოველ წელს კი პროგრესი ვაჩვენოთ და პირველობისთვის ვიბრძოლოთ.

მაგრამ სამეულში მოხვედრაც არ იქნება ურიგო. ამიტომ მომავალ სეზონში ჩვენი მიზანი ევროტურნირებზე მოხვედრა იქნება, რაც გარკვეულ შემოსავლებს მოგვიტანს. ინფრასტრუქტურის სრულყოფაზე შემდეგ უფრო ვიფიქრებთ, თუმცა გარკვეული სამუშაოები ამ კუთხით ამჟამადაც მიმდინარეობს.

ამ ყველაფერთან ერთად, ვეცდებით, კლუბმა გარკვეული შემოსავალი რეკლამითაც მიიღოს. გვეყოლება სარეკლამო აგენტი და კომპანიების მოზიდვაზე ვიმუშავებთ. რეკლამები კი განთავსდება საიტზე, სტადიონზე და ასე შემდეგ".

ქუთაისელთა აღმასრულებელი დირექტორი სახელმწიფო დახმარების აუცილებლობაზეც ლაპარაკობს:

"ვისაც ფეხბურთი არ უყვარს, მათთვის ქალაქის ბიუჯეტიდან კლუბის დაფინანსება რთული თემაა და ურჩევნიათ, ეს ფული სოციალურ პრობლემებს მოხმარდეს. მაგრამ ფეხბურთიც სოციალური მოვლენაა და მასზეც ბევრი რამაა მიბმული.

არის კლუბი, ახალგაზრდული და ჭაბუკთა გუნდები, სადაც ბავშვები იზრდებიან და პროფესიონალ ფეხბურთელებად ყალიბდებიან. მთავარია, არსებული საშუალებები სწორად გამოვიყენოთ".

ჩაკვეტაძის თქმით, ახალ სეზონში "ტორპედოს" ბიუჯეტი ჯერ არ განსაზღვრულა:

"როცა კლუბი მერიას გადაეცა, ქუთაისის წლიური ბიუჯეტი უკვე შედგენილი იყო. ახალი ბიუჯეტი დეკემბერში გაიწერება, რომელშიც "ტორპედოსაც" გაითვალისწინებენ. ამჟამად, ჩვენ რა საჭიროებაც გვაქვს, ქალაქის ხელმძღვანელობა ყველანაირად გვეხმარება".

ყოველდღიური სპორტული გაზეთი "ლელო"