გორის "დილამ" სერიოზული შენაძენი გააკეთა - უჩა სოსიაშვილის გუნდის დაცვას 34 წლის ლაშა სალუქვაძე გაამაგრებს. გამოცდილი უნივერსალი, ვისაც საქართველოს ეროვნულ ნაკრებში 38 მატჩი უთამაშია (1 გოლი), ბოლო დროს უკლუბოდ იყო. სხვადასხვა დროს კი მას თბილისის "ლოკომოტივში", "დინამოში", ყაზანის "რუბინში", ნიჟნი ნოვგოროდის "ვოლგაში", გორის "დილაში", "სკა ენერგიასა" და ბაქოს "ინტერში" უთამაშია.
"დილა" საქართველოს ნაკრების ყოფილი მცველისთვის უცხო გუნდი არ არის. სალუქვაძე გორულ კლუბში 2012/13 წლების სეზონში თამაშობდა და გუნდთან ერთად საქართველოს თასიც მოიგო.
ყველაფერს რომ თავი დავანებოთ, ყაზანის "რუბინის" შემადგენლობაში ის
- შეგვიძლია ვთქვათ, რომ გორის "დილას" ფეხბურთელი ხართ?
- დიახ, უკვე ყველაფერზე მოვილაპარაკეთ. ახლა, თქვენ რომ გესაუბრებით, გორში ვარჯიშზე მივდივარ...
- გორი თქვენთვის ნაცნობი ქალაქია...
- ნამდვილად. მართალია, მას შემდეგ "დილაში" ბევრი რამ შეიცვალა, ახალი ფეხბურთელები მოვიდნენ, მაგრამ ადაპტაციის პრობლემა არ უნდა იყოს. გორელი გულშემატკივრისგან პატივისცემასა და სიყვარულს მუდამ ვგრძნობდი.
- როგორ ფორმაში ხართ?
- ინდივიდუალურად კი ვვარჯიშობდი, მაგრამ ვერ ვიტყვი, რომ ოპტიმალურ ფორმაში ვარ. ვეცდები, რაც შეიძლება მალე აღვიდგინო ძველი კონდიციები.
- როგორც ჩანს, გორში ამბიციური გუნდი კეთდება...
- მეც ამის იმედი მაქვს. როგორც ვიცი, რამდენიმე ლეგიონერის დამატებასაც აპირებენ.
* * *
გორში მართლაც მნიშვნელოვანი ამბები ხდება. საინტერესოა, რომ ერთ-ერთი ებრაელი ინვესტორი უკვე შეხვდა და ესაუბრა "დილას" ხელმძღვანელებსა და გუნდის მთავარ მწვრთნელს.გორში მიმდინარე საინტერესო ამბებზე "ლელოს" უახლესი ინფორმაცია თავად "დილას" მთავარმა მწვრთნელმა უჩა სოსიაშვილმა მიაწოდა:
- როგორც იცით, "დილას" სპონსორობა გადაწყვიტა ებრაელ ბიზნესმენთა ოთხკაციანმა ჯგუფმა.
ამათგან ერთ-ერთი უკვე ჩამოვიდა გორში და კლუბის ხელმძღვანელობას ესაუბრა. შემიძლია გითხრათ, რომ ამ კვირის ბოლომდე საბოლოოდ და სასიკეთოდ გადაწყდება "დილას" გადაფორმების საკითხი.
- სხვა რა ითქვა სპონსორთან შეხვედრის დროს?
- გუნდს არ ექნება არანაირი პრობლემა. ანგარიშზე დაიდება თანხა. ანუ იქნება სტაბილურობა. აქ ლაპარაკია ხელფასებზე, პრემიებზე, აღდგენით საშუალებებზე, ეკიპირებაზე... მოკლედ, ყველაფერ იმაზე, რაც სჭირდება თანამედროვე გუნდს ნორმალური არსებობისთვის.
- ახალ ინვესტორებს ინფრასტრუქტურული გეგმებიც აქვთ?
- აქვთ და საკმაოდ სერიოზულიც. "დილასთვის" გორში აშენდება საწვრთნელი ბაზა, რომელშიც იქნება საცხოვრებელი კომპლექსი 40 საძინებლით. აუზი, სატრენაჟორო დარბაზი... ერთი სიტყვით, ყველაფერი ექნება "დილას" იმისთვის, რომ ნორმალურად იარსებოს.
- რა შედეგს ითხოვს ახალი ინვესტორი?
- მომავალი ჩემპიონატი იოლი რომ არ იქნება, ეს ყველამ კარგად ვიცით. ბევრი წამყვანი ფეხბურთელი დავკარგეთ. ახალი ინვესტიცია კი იმ დროს წამოგვეშველა, როცა თითქმის ყველა ქართველი ფეხბურთელი დაბინავებულია. აქედან გამომდინარე, გარდამავალ ჩემპიონატში ჩვენთვის პროგრამა-მინიმუმი ათ საუკეთესო გუნდს შორის მოხვედრა იქნება. მაგრამ ჩვენ ყველა თამაშში მაქსიმუმისთვის ვიბრძოლებთ. აი, გარდამავალის შემდგომ პირველობაზე კი "დილას" მხოლოდ უმაღლესი მიზნები ექნება.
- და მაინც, არის რამდენიმე საინტერესო ქართველი ფეხბურთელი. შევიტყვეთ, რომ ლაშა სალუქვაძის, ირაკლი ძარიასა და ზურაბ არზიანის გადაბირებით ხართ დაინტერესებული...
- ირაკლი ძარია და ზურაბ არზიანი ჩვენთვის ყველანაირად მისაღები ფეხბურთელები არიან. უბრალოდ, ამ ეტაპზე მათთან არ გვქონია მოლაპარაკება. რაც შეეხება ლაშა სალუქვაძეს, უკვე შემიძლია გითხრათ, რომ ის "დილაში" ითამაშებს და ეს ძალიან მახარებს. წესით, სამშაბათს პირველად უნდა ივარჯიშოს კიდეც გუნდთან ერთად.
- ვიცით, რომ ლეგიონერების დამატებას აპირებთ. უფრო კონკრეტულად ხომ ვერ გვეტყვით, რომელი ფეხბურთელები შეარჩიეთ?
- კონკრეტულად ვერა, მაგრამ ზოგადად გეტყვით, ამ ეტაპზე ვაპირებთ ოთხი ლეგიონერის დამატებას. ესენი არიან ფეხბურთელები ბრაზილიიდან, პორტუგალიიდან, სერბეთიდან და, თუ არ ვცდები, განიდან. ბრაზილიელი და პორტუგალიელი გარემარბები არიან, სერბი და განელი კი - საყრდენი ნახევარმცველები.
* * *
ისე, კარგი იქნებოდა, გორულ კლუბს სპონსორი ევროპალიგაზე სომხურ "შირაქთან" დაპირისპირებამდე გამოსჩენოდა. სამწუხაროდ, ურემი რომ გადაბრუნდა, გზა მხოლოდ ამის შემდეგ გამოჩნდა. მაგრამ ნათქვამია - სჯობს გვიან, ვიდრე არასდროს!შეგახსენებთ, რომ "დილა" სეზონთაშორის პერიოდში არაერთმა ფეხბურთელმა დატოვა, მათ შორის, ლიდერებმა - ოთარ მარცვალაძემ, გუგა ფალავანდიშვილმა და ირაკლი ძარიამ.
ვფიქრობთ, თუნდაც მხოლოდ ამ ფეხბურთელებთან ერთად სოსიაშვილის გაწვრთნილი გუნდი შეძლებდა სომხური ბარიერის გადალახვას...
(იბეჭდება მცირე ცვლილებით)
ყოველდღიური სპორტული გაზეთი "ლელო"
ყოჩაღ შენ :) რა ლამაზად და კოხტად დაალაგე დასახარჯად სხვისი ფული ა? :) გეხერხება :)
ახლა ჩამოვწერ რის გამოსწორებას ვისურვებდი კლუბში, რომელთაგან ზოგი ადვილი მოსაგვარებელია, ზოგიც დიდ დროსა და ფინანსებს ითხოვს:
* კლუბის რებრენდინგი (ახალი, ორიგინალური, გორული ფეხბურთის ტრადიციებზე შექმნილი ლოგო პირველ რიგში)
* ახალი, თანამედროვე ვებ გვერდი
* აქტიურად და ოპერატიულად მომუშავე პრესსამსახური (ინტერვიუები, გამოკითხვები, სტატისტიკები, კითხვა-პასუხი ქომაგებთან)
* მაღალი ხარისხის ფოტო-ვიდეო გადაღება
* დილას თამაშების მაღალი ხარისხის პირდაპირი რეპორტაჟები
* კლუბის თანამედროვე ბაზა
* სტადიონის რეკონსტრუქცია (შეკვრა ერთ მთლიანობად და არა სეტკებით გამიჯვნა ქუჩისგან)
* სტადიონზე განათების სისტემის მონტაჟი
* ბილეთების გაყიდვა (თუნდაც სიმბოლურ ფასად)
* ბავშვთა ფეხბურთის მიმართულების გაძლიერება და თანამედროვე აკადემიის ჩამოყალიბება, შესაბამისი მენეჯმენტითა და მწვრთნელებით
* კლუბის ფართო რეკლამირება-პიარი
* ფან-კლუბის განვითარების ხელშეწყობა
* მოთამაშეების ძირითად ნაწილთან გრძელვადიანი, მინიმუმ 2-3 წლიანი კონტრაქტები
* მედიასთან აქტიური თანამშრომლობა და მაქსიმალური გახსნილობა
* აქტიური მუშაობა კომპანიებთან რეკლამების მოსაზიდად (თავიდან თუნდაც სიმბოლურ ფასად)