საბა ლობჟანიძე: ეს სეზონის მატჩია

გარდამავალი ჩემპიონატის საჩემპიონო პლეი ოფის საპასუხო მატჩში საჩხერის "ჩიხურა" "სამტრედიას" თბილისში, "დინამო არენაზე" დაუპირისპირდება. ამ შეხვედრაში საჩხერის "ჩიხურას" შედეგი ბევრად იქნება დამოკიდებული მისი საკვანძო ფეხბურთელების თამაშზე. ერთ-ერთი ასეთი საბა ლობჟანიძეა - თბილისის "დინამოდან" იჯარით დამატებულმა 22 წლის ფეხბურთელმა სეზონი უმაღლეს დონეზე ჩაატარა და ბომბარდირებში მეორე ადგილზე გავიდა.

- პირველი მატჩიდან გასული რამდენიმე დღე საკმარისი იქნებოდა იმის გასააზრებლად, რაში შეცდით და რა არ გამოგივიდათ...
- სამტრედიელებმა უპირატესობა თავიდანვე სწრაფი თამაშის ხარჯზე მოიპოვეს. მათგან განსხვავებით, ჩვენ თავდაჯერებულობაც გვაკლდა. ამას დაემატა შეცდომები და არაფრიდან 2 გოლი გავუშვით. წაგებაზე გული დამწყდა, მაგრამ წინ მეორე მატჩია.

- პირადად თქვენ ისეთი გამორჩეული არ იყავით, როგორც მთელი სეზონის განმავლობაში...
- როცა გუნდი ვერ თამაშობს, ცხადია, მეც ვერ გამოვჩნდები. მოედნის ცენტრში სამტრედიელებმა აშკარად დაგვჩაგრეს. მაგრამ ეს არაფერი! იმედია, 11 დეკემბერს სეზონის მატჩს ჩავატარებთ.

- საამისოდ, რა კოზირები გაქვთ?
- რა კოზირები და... ეს 11 დეკემბერს გამოჩნდება. ჩვენი უპირატესობა შეტევაში სწრაფი გადასვლაა და ეს უნდა გამოვიყენოთ. უბრალოდ, გეტყვით, რომ 2:0 კატასტროფული სხვაობა არ არის. აქედან გამომდინარე, ჩვენ ავანტიურისტულად შეტევას და დაცვის მოშიშვლებას არ ვაპირებთ.

- მეტოქის პლუსებზე რას იტყვით?
- ტაქტიკურად გამართული გუნდია, ბურთს კარგად იჭერენ, ფეხბურთელები სულ მოძრაობენ და კონტრშეტევაზე ძალიან კარგად თამაშობენ...

- გულწრფელად თქვით: გჯერა, რომ სასურველი შედეგით მოიგებთ?
- გულწრფელად ვამბობ: მჯერა! ჩვენ ნაღდად არ ვართ ის გუნდი, რომელიც ხელებს ჩამოუშვებს და მოედანზე გასვლისას მოგების არ სჯერა.

ყოველდღიური სპორტული გაზეთი "ლელო"