რატომ ამჯობინა ბექა ტუღუშმა დანიასა და ისრაელში წასვლას "ტორპედოში" დარჩენა

იყო შესაძლებლობა, ქუთაისის "ტორპედო" ერთ-ერთ ლიდერს, თასის ფინალის საუკეთესო მოთამაშედ დასახელებულ ბექა ტუღუშსაც დაეტოვებინა. შევიტყვეთ, რომ მას ევროპაში თამაშს სთავაზობდნენ, მაგრამ გუშინ ვითარება შეიცვალა.

"კლუბთან კონტრაქტი 0,6+1 წლით მქონდა გაფორმებული, რაც "ტორპედოს" ნახევარი წლის შემდეგ კონტრაქტის შემოთავაზების უპირატესობას ანიჭებდა, მაგრამ მითითებული გვქონდა, რომ ახალი ხელშეკრულება პირობების გაუმჯობესების შემთხვევაში გაფორმდებოდა. დღეს დამიკავშირდნენ და სიტყვიერად შევთანხმდით, რომ "ტორპედოში" კიდევ ერთი წელი ვითამაშებ", - ამბობს ტუღუში.

27 წლის შემტევი ნახევარმცველი ადასტურებს, რომ ევროპაში წასვლას სთავაზობდნენ:

"სეზონის დასრულების შემდეგ "ტორპედოსგან" ახალი არაფერი ისმოდა და ვიფიქრე, ხელშეკრულების გახანგრძლივება აღარ მოხერხდებოდა.

სეზონის დასრულებისთანავე ორი ვარიანტი გამოჩნდა. პირველი დანიაში - როგორც მითხრეს, ერთ-ერთი კლუბი კონტრაქტს გასინჯვის გარეშე გამიფორმებდა. მეორე ვარიანტი კი ისრაელში შემომთავაზეს. იქ ლაპარაკი სინჯებზე იყო".

ტუღუში განმარტავს, რატომ მიიღო გადაწყვეტილება ქუთაისელთა სასარგებლოდ:

"გასინჯვაზე წასვლა არც ისე სასიამოვნოა, ხოლო დანიური კლუბისგან კონკრეტული აღარაფერი ისმოდა. ქუთაისის "ტორპედოში" კი ყველაფერი გაირკვა და ხელშეკრულების გახანგრძლივება შემომთავაზეს.

ამ კლუბში გამოვჩნდი, მწვრთნელებთან და თანაგუნდელებთან კარგი ურთიერთობა მაქვს, მაყურებელმაც კარგად მიმიღო და რაც არანაკლებ მნიშვნელოვანია, ზაფხულში ევროპის ლიგაზე ვითამაშებ. ამიტომ ისევ ნაცნობ გარემოში დარჩენა ვამჯობინე, სადაც თავს კარგად ვგრძნობ".

(იბეჭდება მცირე ცვლილებით)
ყოველდღიური სპორტული გაზეთი "ლელო"