საქართველოს ეროვნულ ნაკრებს ჯერაც არ ჰყავს ახალი მწვრთნელი. სანამ ეროვნული გუნდის დამრიგებლის პოსტი ვაკანტურია, ჩვენი მთავარი საფიქრალიც ესაა."ლელოს" ერთ-ერთ წინა ნომერში საქართველოს ფეხბურთის ფედერაციის გენერალურმა მდივანმა რევაზ არველაძემ ნაწილობრივ ისაუბრა ეროვნული გუნდის მწვრთნელთან დაკავშირებულ საკითხებზე, თუმცა სიტუაცია ყოველ წამს შეიძლება შეიცვალოს.
20 ნოემბერს კიდევ ერთხელ მოგვიხდა რევაზ არველაძის შეწუხება...
- მომავალი კვირიდან მეტი კონკრეტიკა იქნება მწვრთნელის საკითხში. ახლა კიევში უეფას ეგიდით ტარდება შეხვედრა. მას უეფას პრეზიდენტიც დაესწრება. მომავალი კვირიდან კი უკვე თბილისში ვიქნებით და გაგრძელდება მუშაობა ამ საკითხზე. ამავე
- ქართველი თუ უცხოელი? შეიძლება ამ ეტაპზე დაკონკრეტება?
- შეიძლება, ჩვენ რაღაცას ვფიქრობდეთ, რაღაც გვინდოდეს, მაგრამ ამ ეტაპზე დაკონკრეტებას მოვერიდები. ცოტაც მოვიცადოთ.
- რა ვადით უნდა გაფორმდეს ხელშეკრულება საქართველოს ნაკრების ახალ დამრიგებელთან?
- ჩემი აზრით, კონტრაქტი სამწლიანი უნდა იყოს. ახალმა მწვრთნელმა უნდა ჩაამთავროს ევროპის ჩემპიონატის მიმდინარე შესარჩევი ციკლი და, ამავე დროს, საქართველოს ნაკრებს უხელმძღვანელოს მსოფლიოს 2018 წლის ჩემპიონატის შესარჩევშიც.
იანვარში საქართველოს ნაკრებს უნდა ჰყავდეს ახალი მთავარი მწვრთნელი. ეს ჩემი აზრია. ასევე, უნდა გამოვიყენოთ გერმანიასთან თბილისურ საკვალიფიკაციო მატჩამდე უეფას მიერ გამოყოფილი სანაკრებო დღე - 25 მარტი.
- თქვენ საქართველოს ფეხბურთის ფედერაციის მომავალ საპრეზიდენტო არჩევნებში აპირებთ მონაწილეობის მიღებას. ალბათ, ელოდით, რომ ლევან კობიაშვილიც წამოაყენებდა საკუთარ კანდიდატურას. სამაგიეროდ, ბევრისთვის მოულოდნელი იყო ზვიად სიჭინავას ბოლოდროინდელი განცხადება, რომლის თანახმადაც, შეიძლება, კენჭი მანაც იყაროს. რას იტყვით ამაზე?
- ჩემი პასუხი იქნება ასეთი: ყველა ადამიანი აბსოლუტურად თავისუფალია თავის არჩევანში. კიდევ იმას ვიტყვი, რომ ჩემთვის უცნაური და მოულოდნელი არაფერი მომხდარა.
აქვე, მინდა შევეხო ბოლო დროს გაკეთებულ განცხადებებს, რომ, თურმე, სახელმწიფო საქართველოს ფეხბურთის ფედერაციის პრეზიდენტის არჩევნებში დაეხმარება მხოლოდ სუფთა წარსულის მქონე კანდიდატს.
ჩემს თავზე მივიღე ეს ნათქვამი - ეს ხუმრობით. სერიოზულად კი, ყველას ვთხოვ, გადაამოწმოს და გამოიკვლიოს ჩემი და ჩემი ოჯახის წარსული, აწმყო. დღეს ამ თემაზე საუბარს ამით დავამთავრებ.
ყოველდღიური სპორტული გაზეთი "ლელო"
