კახა ცხადაძის სანაკრებო სია: აბსოლუტურად ოპტიმალური!

საქართველოს ეროვნული ნაკრების მთავარმა მწვრთნელმა კახა ცხადაძემ დაასახელა შემადგენლობა, რომელიც 3 ივნისს ავსტრიულ შეკრებაზე გაემგზავრება.

9 ივნისს ცხადაძის შეგირდები ავსტრიულ ქალაქ ლინცში, საერთაშორისო ამხანაგურ შეხვედრაში დაუპირისპირდებიან უკრაინას, 13 ივნისს კი, ვარშავაში, პოლონეთის უპირველეს გუნდთან ევროშესარჩევ შეხვედრას ჩაატარებენ.

ამ ორი მატჩისთვის ცხადაძემ ეროვნულ გუნდში 24 ფეხბურთელს უხმო. პირდაპირ უნდა ვთქვათ - დღეს არსებულ სიტუაციაში სანაკრებო სია ოპტიმალურია. აქ ყველა ის ფეხბურთელია, რომელთა იმედიც ამ ეტაპზე შეიძლება გვქონდეს.

რა არის ამ ფორმაციის სანაკრებო სიის თავისებურება? უპირველეს ყოვლისა, უნდა გამოვარჩიოთ გოგიტა გოგუასა და

კახა ალადაშვილის დაბრუნება. ორივე ხაბაროვსკის "სკა ენერგიის" ფეხბურთელია.

გოგუას სხვადასხვა პოზიციაზე შეუძლია თამაში და ამით ძალიან ფასეულია საქართველოს ნაკრებისთვის. ის ახლა იმ ასაკშია (31 წლის), როცა ოდინდელი ჭირვეულობა დავიწყებული უნდა ჰქონდეს.

თითქმის გოგუას კბილა ალადაშვილი კი ისეთი მარჯვენა მცველია, შეტევაში ჩართვა რომ უყვარს და ცხადაძის ხედვებს, წესით, ზედმიწევნით უნდა მოერგოს. ამას გარდა, ალადაშვილს "სტანდარტულების" კარგად შესრულებაც შეუძლია.

აღვნიშნავდით ნაკრებში გამოცდილი ლაშა სალუქვაძის ყოფნასაც, ბაქოს "ინტერის" უკანახაზელს ცხადაძე ხომ კარგად იცნობს...

თვალში გვხვდება ის, რომ ამ ეტაპზე საქართველოს ნაკრებში არ არიან ეროვნულ ჩემპიონატში მოასპარეზე ფეხბურთელები. ჩვენს პირველობაზე მოთამაშეთაგან, ვინც ასე თუ ისე პასუხობს სანაკრებო მოთხოვნებს, ყველა ახალგაზრდაა. ისინი მშვიდად უნდა იყვნენ - მათი დროც მალე დადგება; და მეორეც - ისინი ახლა საქართველოს 21-წლამდელთა ნაკრებს სჭირდებიან სან მარინოსთან ევროშესარჩევ მატჩში.

სიაში არ არის გიორგი მერებაშვილი, ვინც სამომავლოდ ასევე უნდა გამოადგეს ეროვნულ გუნდს. დღეს ის უკლუბოდაა.

დაბოლოს, საქართველოს ნაკრების შემადგენლობასაც გავეცნოთ:

მეკარეები: გიორგი ლორია ("ოლიმპიაკოსი", საბერძნეთი), ნუკრი რევიშვილი ("ტოსნო", რუსეთი), როინ კვასხვაძე ("ოთელოსი", კვიპროსი);
მცველები: ალექსანდრე ამისულაშვილი, ლაშა სალუქვაძე (ორივე - "ინტერი", აზერბაიჯანი), გურამ კაშია ("ვიტესი", ჰოლანდია), სოლომონ კვირკველია ("რუბინი", რუსეთი), უჩა ლობჟანიძე ("ომონია", კვიპროსი), კახა ალადაშვილი ("სკა ენერგია", რუსეთი), გიორგი ნავალოვსკი ("ტოსნო", რუსეთი), ლაშა დვალი ("ქასიმფაშა", თურქეთი);
ნახევარმცველები: მურთაზ დაუშვილი ("კარპატი", უკრაინა), კახა მახარაძე ("ფახთაქორი", უზბეკეთი), ჯანო ანანიძე ("სპარტაკი", რუსეთი), ალექსანდრე კობახიძე ("ვოლინი", უკრაინა), ვალერი ყაზაიშვილი ("ვიტესი", ჰოლანდია), გოგიტა გოგუა ("სკა ენერგია", რუსეთი), ლევან ყენია ("სლავია", ჩეხეთი), თორნიკე ოქრიაშვილი ("გენკი", ბელგია), ჯაბა კანკავა ("დნიპრო", უკრაინა);
თავდამსხმელები: ლევან მჭედლიძე ("ემპოლი", იტალია), მათე ვაწაძე ("ორჰუსი", დანია), გიორგი ჭანტურია ("კლუჟი", რუმინეთი), ბაჩანა ცხადაძე ("ინტერი", აზერბაიჯანი).

ბოლოს კი დავძენთ, რომ საქართველოს ნაკრების ორივე მატჩის პირდაპირ ტელერეპორტაჟს "პირველი არხი" შემოგვთავაზებს.

(იბეჭდება მცირე ცვლილებით)
ყოველდღიური სპორტული გაზეთი "ლელო"