უეფა-ს ნორვეგიელი დელეგატი კიმ რობინ ჰაუგენი მართალი აღმოჩნდა, რომელმაც მოლდოვა-მალტას თამაშამდე ივარაუდა, რომ ჰოლანდიაში გასამართავი ელიტრაუნდის საგზურს საქართველო მოიპოვებდა.მალტაზე ევროპის ჩემპიონატის შესარჩევი ციკლი ქართული ფუტსალისთვის ფეხბედნიერი აღმოჩნდა. სამგუნდიან ჯგუფში საქართველოს ნაკრებმა ასპარეზობა მეტოქეებზე ადრე დაასრულა.
ჩვენებმა მასპინძელ მალტას 9:0 მოუგეს. მოლდოვასთან საქართველოს რომ მოეგო, ჯგუფის გამარჯვებული ვადამდე გახდებოდა, მაგრამ უმძიმეს შეხვედრაში ანგარიში მხოლოდ ბოლოს გაათანაბრეს - 5:5.
ასე რომ, ყველაფერი მოლდოვა-მალტას დაპირისპირებას უნდა გაერკვია. თუ მოლდოვა 8 და ნაკლები ბურთით მოიგებდა, შემდეგ ეტაპზე საქართველო გავიდოდა. 9 ან მეტი ბურთით
საბედნიეროდ, მალტელებმა მეტოქეს თავი შეაკლეს. მოლდოვამ ანგარიში მხოლოდ მე-14 წუთზე გახსნა (ანდრიან ლაშკუ). მე-16 წუთზე მასპინძელთა კარი ანდრეი ვიკოლაშმაც აიღო, მაგრამ ერთ წუთში ლაშკუმ პენალტი ვერ გამოიყენა და მოლდოვამ ტაიმი 2:0 მოიგო.
მეორე ტაიმის 27-ე წუთზე სერგეი მუნტიანუმ სხვაობა გაზარდა - 3:0. თუმცა ოთხ წუთში მალტელმა დენიელ ბრინკატმა მოლდოველთა კარი აიღო (3:1). 37-ე წუთზე დორინ კოჩებანის გოლს მხოლოდ სტატისტიკური მნიშვნელობა ჰქონდა, მოლდოვამ 4:1 გაიმარჯვა და ელიტრაუნდში ავთანდილ ასათიანის შეგირდები გავიდნენ.
ჰოლანდიაში ელიტრაუნდის მატჩები 27-30 მარტს გაიმართება. ჩვენი გუნდი ჰოლანდიის, ჩეხეთისა და ბელორუსის ნაკრებებს დაუპირისპირდება. ევროპის ჩემპიონატის ფინალური ეტაპი, 12 საუკეთესო გუნდის მონაწილეობით, 2014 წელს ბელგიაში გაიმართება.
აღსანიშნავია, რომ საქართველოს დელეგაციის წევრებმა მალტა ამ მატჩამდე დატოვეს და შეხვედრის ტექსტურ რეპორტაჟს თვალს რომის აეროპორტში ადევნებდნენ. 6-საათიანი ლოდინი სიხარულის მომტანი აღმოჩნდა და ქართველების ყიჟინამ აეროპორტი კინაღამ დაანგრია.
ჯერ ღირსება, მერე კარიერა
ფუტსალის ნაკრები საქართველოში 27 იანვარს, გამთენიისას დაბრუნდა და გუნდის მთავარ მწვრთნელ ავთანდილ ასათიანს ინტერვიუ ჩამოვართვით.
საქართველოს ფუტსალის ნაკრები ევროპის ჩემპიონატის ელიტრაუნდში მეორედ გავიდა და კვლავ ასათიანისა და ბესო არველაძის წინამძღოლობით, რომლებიც ნაკრებში ხუთი თვის წინ დაბრუნდნენ.
- უკვე ვიცით, რომ ბოლო შეხვედრას (მოლდოვა-მალტას) აეროპორტში, ინტერნეტით ადევნებდით თვალს.
- ის საათნახევარი ჩვენთვის კოშმარი იყო. ვერ წარმოვიდგენდი, ევროპის ერთ-ერთი ყველაზე დიდი ქალაქის აეროპორტში ინტერნეტი ასე საშინლად თუ იმუშავებდა... მიხარია, რომ ელიტრაუნდში მოვხვდით, რისთვისაც თითოეულ ჩემს ფეხბურთელს მადლობას ვუხდი.
- ბევრი ფიქრობდა, რომ მალტა თავს აღარ მოიკლავდა...
- მესმის, ეს ფიქრები მალტის სისუსტიდან გამომდინარეობდა, მაგრამ წლებია, მათ მთავარ მწვრთნელს, კევინ მიფსუდს ვიცნობ და დამიჯერეთ, მაგარი კაცია. რომ მოვდიოდი, მითხრა, მშვიდად იფრინე, მოლდოვას თავს შევაკლავთ და ბოლომდე ვეომებითო. ასეც მოხდა, მიფსუდმა სიტყვა შეასრულა.
- ეს მოლდოვა რა მოუგებელი გაგვიხდა?..
- გეთანხმებით, რომ მოლდოვას უნდა ვუგებდეთ, მაგრამ ისეც ნუ ვიტყვით, რომ სუსტი გუნდია. ჩვენ კი გვწყინს, მაგრამ მათ რომ პირობები აქვთ, ისეთი ჩვენ არც დაგვესიზმრება. დასაცინი მაშინ ვიქნებოდით, მალტისთვის რომ არ მოგვეგო.
ვაღიარებ, მოლდოვასთან გაგვიჭირდა. რაღაც მომენტში მოვეშვით და დავისაჯეთ. მატჩის დასრულებამდე მცირე ხნით ადრე 3:5 ვაგებდით, მაგრამ ბიჭებმა უზომოდ მოინდომეს და შეხვედრის ბედი შემოატრიალეს. დამეთანხმებით, ეს ქართველებს ყოველთვის გვიჭირდა.
- ალბათ, საქმე აქამდე რომ მივიდა, შეცდომებიც დაუშვით...
- რა თქმა უნდა, იყო შეცდომები, მაგრამ ბიჭებმა ისეთი თავდადებით ითამაშეს, არ შეიძლება, ეს დავუკარგოთ. არ ვიცი, მომავალში მე ვიქნები ნაკრების მწვრთნელი თუ სხვა, მაგრამ ამ ბიჭებს დიდი მომავალი აქვთ.
იმედია, ამ შემადგენლობას ფეხბურთის ფედერაცია და სპორტის სამინისტრო მიხედავენ და ეს ფეხბურთელები ქვეყანას უკეთ წარმოაჩენენ. აეროპორტში ისხდნენ და სიხარულისგან ტიროდნენ. წარმოუდგენელია, ასეთმა ადამიანებმა ქვეყნისთვის თავი არ დადონ.
გოგა ალთუნაშვილს ფეხი სტკიოდა და მალტასთან ამიტომ დავასვენე. მოლდოვასთან ტრავმა გაუმიზეზდა, მაგრამ მოედანზე ნამდვილი მეომარი იყო, დასვენება არც მოუთხოვია. ასე იყო ყველა. მე კი მოთამაშეებს არა მხოლოდ კლასით, არამედ თავდადებითაც ვაფასებ.
- რატომ თქვით ფრაზა - არ ვიცი, მომავალში ვიქნები თუ არა ნაკრების მწვრთნელი?
- მოლდოვასთან ფრის შემდეგ დაიწერა, ასათიანი უნდა წავიდესო. მე ადგილს არასოდეს ვეპოტინებოდი, რადგან ჩემი პრინციპია - ჯერ ღირსება, მერე კარიერა, მაგრამ წინა ციკლის ჩავარდნას მე რომ მაბრალებენ, ამაზე მეცინება, ნაკრებში ხომ ხუთი თვის წინ დამაბრუნეს.
ეტყობა, ჰგონიათ, რომ მოლდოვას წინა ციკლში რომ ვერ ვაჯობეთ, ამ პოსტზე მაშინაც მე და ბესო არველაძე ვმუშაობდით.
- ალბათ, ელიტრაუნდამდე საკონტროლო შეხვედრებს დაგეგმავთ...
- ეს აუცილებელი იქნება. იქნებ მარტის დასაწყისში "იბერია სტარს" შევხვდეთ. არც ერთ ნაკრებზე ნაკლები გუნდი არ არის, თანაც ისინიც ევროპის ოთხთა ფინალისთვის ემზადებიან და მიმაჩნია, რომ სპარინგები ორივეს ძალიან წაგვადგება. ჩვენ კი ნაკრების კანდიდატებს კიდევ დავაკვირდებით.
ყველამ იცოდეს, რომ ნაკრებში მოხვდებიან მხოლოდ საუკეთესო ფორმაში მყოფი ფეხბურთელები.
- ცოტა ხნის წინ ბრძანეთ, რომ ბრაზილიელების მიწვევას არ აპირებთ. ვითომ ელიტრაუნდში ნაკრებს გაძლიერება აწყენდა?
- მე ის ვთქვი, რომ უკრაინაში წავიდა რონი, რომელიც საქართველოს მოქალაქეა. მალტაზე მისი წაყვანა მინდოდა, მაგრამ რონის იმედად რომ ვიყო და კლუბმა არ გამოუშვას, მერე სად მივდივართ?! თუ ჩამოვა, სიამოვნებით დავიმატებდი.
(იბეჭდება მცირე ცვლილებით)
ყოველდღიური სპორტული გაზეთი "ლელო"
