ბიზნესის ჩემპიონთა ლიგის 2014/15 წლების, რიგით მეშვიდე სეზონი ისტორიის კუთვნილება გახდა. 5 ივლისს, ჯ. ცერცვაძის სახელობის ხელბურთის აკადემიამ წლევანდელი გათამაშების ბოლო სათამაშო დღეს უმასპინძლა. სეზონის მთავარ ფინალად დაანონსებულ, სუპერლიგის ფინალურ დაპირისპირებაში ერთმანეთის პირისპირ "პროგრეს ბანკი" და პსპ წარდგნენ. ჩემპიონატში მონაწილეობის ხუთი წლის თავზე "ფარმაცევტების" პირველი ფინალი მათივე გაჩემპიონებით დასრულდა!
ფინალამდე კი, ბიზნესის ჩემპიონთა ლიგის წლევანდელი სეზონის ყველა ვარსკვლავთა მატჩი გაიმართა.
ჩემპიონატის ორგანიზატორების და ლიგის ნაკრების მთავარი მწვრთნელის, ბესიკ ზოიძის გადაწყვეტილებით, საუკეთესო 24 ფეხბურთელი I და II გუნდებად დაიყო, რომლებსაც მთავარი
საწვრთნელ პროცესში მონაწილეობდა ასევე რუსული მფკ "გაზ პრომ -იუგრას" ქართველი ლეგიონერი, წლევანდელი ჩემპიონი და საუკეთესო მეკარედ აღიარებული ზვიად კუპატაძე, რომელიც მეკარეებს ამზადებდა.
"ყველა ვარსკვლავთა" შემადგენლობა ასე გამოიყურებოდა:
ALL STAR I: ამირან გვენცაძე (შსს), ლევან ბუბუტეიშვილი (სნიკერსი), ლაშა დონდოლაძე (საქართველოს ფოსტა), მამუკა მენთესაშვილი (სნიკერსი), ნოდარ მაჭავარიანი (ვითიბი), შოთა უშარაული (შსს), რევაზ ინჯგია (შსს) გიორგი სეფერთელაძე (ნატახტარი), ლაშა ჯოხაძე (საქართველოს ბანკი), კახაბერ გოგოხია (ნატახტარი), მიხეილ გოგბერაშვილი (GM ჭიათურა), ლევან კახობერაშვილი (მფკ გუჯარი)
ALL STAR II: დათა ფარაჯანიშვილი (საქართველოს ბანკი), დავით ღლონტი (სკ ჯვაროსნები), დავით დარჩია (მფკ ნატახტარი), დიმიტრი მაყიშვილი (მფკ ნატახტარი), გიორგი ჯობავა (ვითიბი), ლაშა თურმანიძე (GWP), ნიკა თურმანიძე (დინამო ბთ), გოგლა ჭოხონელიძე (UG), ლევან კოპალიანი (ევროპაბეთი), გიორგი პირველი (მფკ ტატიშვილი), გიორგი აფციაური (GWP), დავით იობიძე (სდსს)
შეხვედრა საკმაოდ საინტერესოდ წარიმართა და პირველი გუნდის გამარჯვებით, 3-2 დასრულდა. გამარჯვებულთა რიგებში დუბლით გამოირჩა გიორგი სეფერთელაძე, ერთი გოლიც მამუკა მენთესაშვილის ანგარიშზეა. საპასუხო გოლები ნიკა თურმანიძემ და გიორგი პირველმა გაიტანეს.
შესვენებისას გაიმართა 10-მეტრიანი საჯარიმო დარტყმების კონკურსი, რომელშიც გამარჯვება ლევან კოპალიანმა (ევროპაბეთი) მოიპოვა. მას ესპანური სპორტული ბრენდ JOMA-სგან 200-ლარიანი ვაუჩერი გადაეცა. მატჩის დასრულების შემდეგ ორივე გუნდის შემადგენლობიდან გამოვლინდნენ ყველაზე სასარგებლო ფეხბურთელები - გიორგი სეფერთელაძე და დავით დარჩია, რომლებსაც ასევე გადაეცათ 200-ლარიანი ვაუჩერები JOMA-სგან.
სეზონის დასკვნითი საღამო სუპერლიგის ფინალური დაპირისპირებით გაგრძელდა, რომელიც გულშემატკივართა სრული ანშლაგის ფონზე წარიმართა.
"პროგრეს ბანკი" და პსპ მიმდინარე სეზონში მესამედ შეხვდნენ ერთმანეთს. პირველ წრეში გამართული დაპირისპირება საკმაოდ უხვგოლიანი და დრამატული გამოდგა და საბოლოოდ ფრედ, 5-5 დასრულდა. რაც შეეხება მეორე შეხვედრას, აქ "ფარმაცევტებმა" იოლად მოახერხეს "ვარსკვლავების" ძლევა.
"ბანკირები" ფინალს სერიოზული საკადრო პრობლემებით შეხვდნენ. გუშინდელ შეხვედრაში ტრავმის გამო ვერ ითამაშა კახა კალაძემ. საკუთარ გუნდს მხოლოდ სათადარიგო სკამიდან ეხმარებოდა ლევან კობიაშვილიც.
რაც შეეხება პსპ-ს, ისინი ზამთრიდან მოყოლებული, მოისაკლისებენ საკუთარ კაპიტანს, გივიკო კაციტაძეს, რომელსაც ურთულესი ოპერაციის გადატანა დასჭირდა და ახლა სარეაბილიტაციო პროცესს გადის.
თუმცა, მიუხედავად ყველაფრისა, დარბაზში შეკრებილმა 1000-ზე მეტმა გულშემატკივარმა ნამდვილი საფეხბურთო ზეიმი იხილა და თამამად შეიძლება ითქვას, რომ სეზონის დასასრული შედგა.
მატჩი პსპ-ს უპირატესობით დაიწყო, თუმცა მე-4 წუთზე "პროგრეს ბანკი" ზურა ცერცვაძემ დააწინაურა, რომელმაც გიორგი დემეტრაძის შორეულ დარტყმულს ერთი შეხებით მიმართულება შეუცვალა - 1-0. ზუსტად შვიდ წუთში კი დავით მუჯირმა მეტოქის მცველების უყურადღებობით ისარგებლა და თავისი გუნდის უპირატესობა ორბურთიანი გახადა - 2-0.
პსპ უტევდა და მიუხედავად არაერთი საგოლე ეპიზოდისა, ანგარიში პირველ ტაიმში არ შეცვლილა. ცალკე საუბრის თემაა "პროგრესის" კიპერის, გიორგი ვეშაპიძის თამაში, რომელმაც მატჩის განმავლობაში არაერთი საოცარი სეივი განახორციელა და თამამად დაიმსახურა მატჩის საუკეთესო მოთამაშის ტიტული.
მეორე ტაიმში პსპ-ს ფეხბურთელებმა ტემპს მოუმატეს, რამაც შედეგიც მალევე გამოიღო. მანამდე კი გიორგი დემეტრაძეს უმტყუნა მიზანმა, რომელმაც ლამაზი სამსვლიანი კომბინაცია ვერ აქცია გოლად.
პირველი გოლი ბესო არველაძის შეგირდებმა 28-ე წუთზე გაიტანეს. თავი თემო კვირკელიამ გამოიჩინა, რასაც მალევე ლევან სარდანაშვილის გამათანაბრებელი დარტყმა მოჰყვა - 2-2.
მატჩის დასრულებამდე ორ წუთზე ოდნავ მეტი იყო დარჩენილი, როდესაც ზუკა გარსევანიშვილმა მცველებს შეცდომა არ აპატია და როგორც შემდგომ გაირკვა, საჩემპიონო გოლიც გაიტანა - 3-2. თუმცა მატჩის დასრულებამდე 30 წამით ადრე დავით მუჯირმა ანგარიშის გათანაბრების თითქმის იდეალური შანსი გაუშვა ხელიდან, როდესაც 10-მეტრიანი საჯარიმო დარტყმის გატანა ვერ მოახერხა. მოწოდების სიმაღლეზე აღმოჩნდა "ფარმაცევტების" კარის დარაჯი, ნიკოლოზ ფხაკაძე.
ამის შემდეგ ანგარიში არ შეცვლილა და საფეხბურთო კლუბი პსპ სრულიად დამსახურებულად დაეუფლა სუპერლიგის 2014/15 წწ. ჩემპიონის ტიტულს.
მატჩის დასრულების შემდეგ გაიმართა დაჯილდოების ცერემონიალი. ჩემპიონ-პრიზიორები, ექსკლუზიური მედლებით და სპეციალური თასებით "ვითიბი ბანკის" ვიცე-პრეზიდენტმა გიორგი ბარკალაიამ და სფფ-ის პრეზიდენტობის კანდიდატმა, ვეტერანმა ფეხბურთელმა ლევან კობიაშვილმა დააჯილდოვეს.
ჩემპიონატის საუკეთესო ფეხბურთელად დავით მუჯირი დასახელდა, რომელსაც ლიგის პარტნიორ "ეფლსითისგან" Iphone 5c-ის მოდელის ტელეფონი გადაეცა.
საუკეთესოები გამოვლინდნენ სხვადასხვა ნომინაციაშიც:
1. საუკეთესო მეკარე - ამირან გვენცაძე (შსს)
2. საუკეთესო მცველი - გიორგი დემეტრაძე (პროგრეს ბანკი)
3. უნივერსალი - ნიკოლოზ კოპლატაძე (FC PSP)
4. საუკეთესო თავდამსხმელი - შალვა ფირცხალავა (სკ ჯვაროსნები)
5. გუნდისთვის სასარგებლო - დიმიტრი მაყიშვილი (მფკ ნატახტარი)
6. გუნდის წარმატებაში შეტანილი განსაკუთრებული წვლილისთვის - გივიკო კაციტაძე (FC PSP)
7. საუკეთესო ბომბარდირი - რევაზ ინჯგია (შსს) - 26 გოლი
8. საუკეთესო ასისტენტი - კახა კალაძე (პროგრეს ბანკი) – 12 პასი
9. ფინალის საუკეთესო მოთამაშე - გიორგი ვეშაპიძე (პროგრეს ბანკი)
10. სუპერლიგის საუკეთესო ფეხბურთელი - დავით მუჯირი (პროგრეს ბანკი)
ბიზნესის ჩემპიონთა ლიგის გენერალური პარტნიორია "ვითიბი ბანკი". ჩემპიონატის სპონსორია ფეხსაცმლის დანიური ბრენდი "ECCO". ჩემპიონატის ტექნიკური პარტნიორია ესპანური სპორტული ბრენდი JOMA.
ღონისძიების პარტნიორები და მხარდამჭერები არიან: სამაუწყებლო კომპანია "რუსთავი 2", იურიდიული ჯგუფი "ერისთავი და პარტნიორები", სასტუმრო "ჰოლიდეი ინი", Apple City, ვერცხლის ნაკეთობები "შემოინახე მემკვიდრეობა", "მედი ქლაბ ჯორჯია", NS STUDIO, Cleaning Service Group, დაცვის სამსახური "ომეგა", თაფლი "მეფუტკრე", ყვავილების მაღაზია "flowers.ge" და მუსიკალური მაღაზია "GURU music".
რაც შეეხება მედიაპარტნიორებს: რადიოები, "იმედი", "კომერსანტი", "ჯაკო", ვებ პორტალები, geosports.ge, sportall.ge, worldsport.ge, goal.ge, fanebi.com, adami.ge, news.ge, myvideo.ge და სპორტული ჟურნალები "OFFSIDE" და "ლელო week".
სპორტული სააგენტო SBM-ის პრესსამსახური
