თურქეთის სუპერლიგაში შოთა არველაძის მიერ გაწვრთნილი "ქასიმფაშა" სტუმრად "ანთალიასფორთან" დამარცხდა, რითაც სუპერლიგაში მესამე საფეხური დაკარგა. "ქაშიმფაშასთვის" არც მატჩის მიმდინარეობა იყო სახარბიელო - არველაძის გუნდი ჯერ 0:2-ს, შემდეგ კი 1:3-ს აგებდა.
* * *
უკრაინის პრემიერლიგაში "ზარია" შინ "ჩერნომორეცს" 1:1 დაუზავდა. ჯაბა ლიპარტია მასპინძელთა სათადარიგოთა სკამზე იჯდა.
* * *
დანიის სუპერლიგაში "ორჰუსი" საკუთარ მოედანზე "ესბიერგთან" 0:1 დამარცხდა. ორჰუსელმა მათე ვაწაძემ, როგორც იცით, კოჭი მოიტეხა და ფეხბურთს ხანგრძლივი ვადით ჩამოშორდა, მისი თანაგუნდელები, დავით დევდარიანი და დავით სხირტლაძე კი სასტარტო შემადგენლობაში იყვნენ.
* * *
გერმანიის მეორე ბუნდესლიგაში "ბოხუმი" საკუთარ კედლებში 0:3 განადგურდა "აუესთან" და საქმე კიდევ უფრო გაირთულა.
ალექსანდრე იაშვილი "ბოხუმის" ძირითად შემადგენლობაში იყო და შესვენებისას შეცვალეს, მისი თანაგუნდელი ნიკოლოზ გელაშვილი კი 18-კაციან განაცხადშიც არ შეუყვანიათ.
* * *
საფრანგეთის ლიგა 2-ში გიორგი მაკარიძის "ლე მანმა" "ტურს" უმასპინძლა და 1:0 მოუგო, ქართველმა მეკარემ კი გუნდის ძირითადში დაბრუნების შემდეგ ზედიზედ მეორე მატჩი ჩაატარა.
* * *
აზერბაიჯანის პრემიერლიგაში გიორგი ჩიხრაძის "სიმურგი" სტუმრად "გაბალას" 1:1 დაუზავდა და ევროპის ლიგის საგზურისთვის ბრძოლას განაგრძობს.
* * *
სამხრეთაფრიკულ პრემიერლიგაში "მოროკა სვოლოვსი" საკუთარ კედლებში "ვიტს უნივერსიტის" დაუზავდა - 1:1. მასპინძელთა რიგებში გიორგი ნერგაძემ შეუცვლელად ითამაშა.
(იბეჭდება მცირე ცვლილებით)
ყოველდღიური სპორტული გაზეთი "ლელო"
