"სხვაგვარად ნარკოტიკი ორგანიზმში ვერ მოხვდებოდა, "ანჟის" თავს არ დავაჩაგვრინებ!"

მახაჭყალის "ანჟი" გია გრიგალავას აკრძალული პრეპარატის მიღებაში ადანაშაულებს, საქართველოს ნაკრების 25 წლის მცველი კი კლუბს ბრალს შავი "პიარის" აგორებაში სდებს.

მტყუან-მართალზე გარკვეულ წარმოდგენას ის ფაქტიც შეგიქმნით, რომ სკანდალურ დაპირისპირებაზე რუსულ მედიას ინფორმაცია თავად გრიგალავამ მიაწოდა. მან შეიტყო, რომ კლუბი "რაღაცას" უმზადებდა. თავად კლუბის მესვეურებმაც გაიგეს, რომ ქართველი პრესასთან აპირებდა ამ თემაზე საუბარს და სასწრაფოდ ოფიციალური განცხადება გაუშანშალა...

"2015 წლის 4 თებერვალს რუსეთის ფედერაციის დაღესტნის რესპუბლიკის ანტინარკოტიკულ ფედერალურ სამსახურში შევიდა ანონიმური ზარი. წყარო იტყობინებოდა, რომ "ანჟი არენის" ტერიტორიაზე დაფიქსირდა ნარკოტიკების გამოყენების ფაქტი, სავარაუდოდ, "ანჟი 2"-ის ფეხბურთელების მიერ.

ფაქტის გადამოწმების მიზნით, ბიუროს თანამშრომლები "ანჟი არენაზე" მოვიდნენ. მათ მთავარი მწვრთნელის, რუსლან აგალაროვისა და კლუბის სპორტული დირექტორის, სერგეი კორაბლიოვის თანდასწრებით, გაისაუბრეს ფეხბურთელებთან. ასევე, მათ ამორჩევით დაიწყეს ფეხბურთელების სამედიცინო შემოწმება, რომელთა მიხედვითაც, 5 ფეხბურთელის ანალიზი საეჭვოდ ჩაითვალა.

ეჭვის დასადასტურებლად ან გასაფანტავად, საჭირო გახდა ხელმეორე ექსპერტიზა. ოთხმა ფეხბურთელმა ნებაყოფლობით ჩააბარა ანალიზები, ერთ-ერთმა ეჭვმიტანილმა კი კატეგორიული უარი განაცხადა, დატოვა ტერიტორია და არ გამოდიოდა კონტაქტზე. ეს ფეხბურთელი იყო გია გრიგალავა.

4 თებერვალს, მთელი დღის განმავლობაში, მასთან დაკავშირება შეუძლებელი იყო. 5 თებერვალს შედგა რესპუბლიკის ნარკოლოგიური დისპანსერის დასკვნა, რომელიც პირველი ტესტის საფუძველზე ამტკიცებს გია გრიგალავას ორგანიზმში აკრძალული პრეპარატების კვალს.

თავის მხრივ, "ანჟის" ერთხელაც არ დაუდანაშაულებია გია გრიგალავა ნარკოტიკული ნივთიერებების გამოყენებაში და სანამ ეს ოფიციალური დასკვნა გამოქვეყნდებოდა, არც საჯარო გაუხდია ეს ინფორმაცია.

მედიაში გამოქვეყნებული ვერსია, თითქოს, გია გრიგალავა "ანჟის" სთავაზობდა დამოუკიდებელ ექსპერტიზას მოსკოვში, არ შეეფერება სინამდვილეს, რადგან ექსპერტიზაზე თანხმობა მიღებულია მხოლოდ მახაჭყალაში ანალიზების ჩაბარების შემდეგ, რაზეც გრიგალავამ კატეგორიული უარი განაცხადა.

სხვათა შორის, ერთ-ერთმა ფეხბურთელმა უკვე მიიღო პასუხი განმეორებითი ექსპერტიზის მერე. "ანჟი" აცხადებს, რომ კვლავაც ჯანმრთელი ცხოვრების წესის სადარაჯოზე რჩება.

სოციალურ ქსელებში გაჩნდა პროვოკაციული განცხადებები, რომლებიც არ შეეფერება სინამდვილეს. ჩვენ ჭორებს არ ვყვებით, მხოლოდ ოფიციალური ფაქტებით ვხელმძღვანელობთ", - ვკითხულობთ "ანჟის" ვებგვერდზე.

ვითარებაში უკეთ გასარკვევად თავად გია გრიგალავას დავუკავშირდით:

- თქვენსა და კლუბს შორის კონფლიქტი არახალია...
- ფაქტია, რომ კონტრაქტის გასაწყვეტად ასეთი სიბინძურე იკადრეს. ეს ჩემი ვარაუდი არ არის - ყველა ამას ამბობს. კონტრაქტი კარგი პირობებით მქონდა გაფორმებული, "ანჟის" კი ამ ვალდებულებების შესრულება აღარ სურდა.

გვქონდა მოლაპარაკებები, ისინი ხელშეკრულების გაწყვეტასა და სხვა კლუბში გაშვებას მთავაზობდნენ. ეს ჩემი სურვილიც იყო, მაგრამ კონტრაქტის დარღვევისთვის კომპენსაციას ვითხოვდი, ისინი კი მხოლოდ მცირე ნაწილის გადახდას თანხმდებოდნენ.

- რუსულ გაზეთთან ინტერვიუში თქვით, რომ კონფლიქტამდე მეგობარი დაგიკავშირდათ და გაგაფრთხილათ, რომ რაღაცას მოგიწყობდნენ...
- დიახ, გამაფრთხილა. კლუბთან ურთიერთობა ისე დამეძაბა, ბაზიდან არ გავდიოდი და არ დავმალავ, თავადაც მქონდა ვარაუდი, რომ რაღაცას აპირებდნენ, მაგრამ ასეთ სიბინძურეს ვერასოდეს წარმოვიდგენდი.

მეორე დღეს ბაზაზე ნარკოლოგიური შემოწმება დაიწყეს. ვარჯიშისას "ანჟის" გენერალურმა დირექტორმა გვითხრა, რომ შარდის ანალიზი უნდა ჩაგვებარებინა. ტყუილია, თითქოს, ტესტზე უარი ვთქვი. მაგრამ ანალიზების უმრავლესობა რომ გადაღვარეს და ჩემი შეინახეს, მაშინღა გამახსენდა მეგობრის გაფრთხილება და მივხვდი, რომ ეს ყველაფერი კლუბიდან ჩემ მოსაშორებლად და კონტრაქტის გასაწყვეტად სჭირდებოდათ. სხვა მიზეზი არ არსებობს.

- ეს ყველაფერი გასაგებია, მაგრამ თქვენს ორგანიზმში ნარკოტიკი როგორ მოხვდა?
- მე მგონია, რომ საჭმელში ან სასმელში რაღაც ჩამიყარეს.

- ამაში დარწმუნებული ხართ?
- სხვაგვარად ნარკოტიკი ორგანიზმში ვერ მოხვდებოდა, წარმოუდგენელია - მე ხომ ბაზაზე ვცხოვრობ, იქ ვჭამ და ვსვამ...

ვთქვი და ვიმეორებ, სიგარეტი არ მომიწევია და წამალი ჩემგან ისე შორსაა, როგორც ჩინური. სხვათა შორის, ტესტირების წინა დღეს რომ ვჭამდი, გემო არ მესიამოვნა და ბოლომდე აღარ ვჭამე. ეს ამბავიც გამახსენდა და სასწრაფოდ მოსკოვში გამგზავრება და იქ დამოუკიდებელი ანალიზის ჩაბარება გადავწყვიტე.

რუსებთანაც ვთქვი, რომ სიცრუის დეტექტორზე გასასვლელადაც მზად ვიყავი. ცხოვრებაში ნარკოტიკი არ მიმიღია - არც ბოლო დღეებში და არც არასოდეს!

ჩემი თანაგუნდელებიც მიხვდნენ, რომ დაუგეგმავი ტესტები მხოლოდ ჩემ დასადანაშაულებლად სჭირდებოდათ.

- მართალია, რომ "ანჟი" დამოუკიდებელი ექსპერტიზის ჩატარებას ეწინააღმდეგებოდა?
- რა თქმა უნდა და ლოგიკურიც არის, რადგან ეშინიათ. გინახავთ ნარკომანი, რომელსაც შემოწმება თავად სურს? ეს ხომ აბსურდია?! როცა მითხრეს, რომ ორგანიზმში ნარკოტიკები აღმომიჩინეს, მაშინვე ვთქვი - ნებისმიერ ექსპერტიზაზე წავალ და სიმართლეს მაინც დავადგენ-მეთქი.

საკუთარ თავში დარწმუნებული რომ არ ვიყო, მოსკოვში კი არ წავიდოდი. იქ გამოჩნდება, ბოლო 6 თვეში რას ვიღებდი. ანალიზების პასუხებს კი 10 თებერვალს ველოდები.

სხვათა შორის, მოსკოვში რომ მივფრინავდი, თვითმფრინავში "ანჟის" გენერალური დირექტორიც აღმოჩნდა, რომელსაც ჩემი დანახვა არ ესიამოვნა და გამგზავრების მიზეზი რომ გაიგო, მთხოვა - არ წახვიდეო. "ანჟის" ვებგვერდზე კი უცებ გაჩნდა ინფორმაცია ჩემი ტესტირების შესახებ. ანუ, თავისი ჭკუით, დამასწრო.

მაგრამ სიმართლე დადგინდება. მაგათ თავს არ დავაჩაგვრინებ!

- თუ ორგანიზმში ნარკოტიკი მართლა აღმოჩნდა და ამას თავადაც აღიარებთ, დამოუკიდებელი ექსპერტიზა საწინააღმდეგოს როგორღა დაამტკიცებს?
- ექსპერტიზა დაადგენს, ორგანიზმში ნარკოტიკი როგორ მოხვდა - საკვებიდან, სასმლიდან თუ მინერალური წყლიდან. კლუბი მოსკოვში ტესტირებაზე რომ მეწინააღმდეგებოდა, ამან კიდევ უფრო დამარწმუნა, რომ რაღაც სუფთად არ იყო.

ექსპერტიზის ჩატარება კი მოსკოვში იმიტომ გადავწყვიტე, რომ დაღესტანში ყველა "ანჟიზე" მუშაობს.

ჯერ აბსურდი ის არის, რომ იანვარში მოსკოვში სამედიცინო შემოწმება გავიარეთ და მე რომ ნარკომანი ვყოფილიყავი, სამედიცინო შემოწმებაზე არ გამოჩნდებოდა? მეტიც, მაშინ გუნდის ექიმი ამბობდა, რომ არც ერთ ფეხბურთელს პრობლემა არ ჰქონდა.

- იყო ლაპარაკი, რომ შესაძლოა, სტიმულატორი მიიღეთ...
- ეს მეორე დიდი აბსურდია! გინახავთ სპორტსმენი, რომელიც შეჯიბრებაზე არ გადის და დოპინგს იღებს? ძირითად გუნდშიც არ მავარჯიშებენ, თამაშზე ხომ ლაპარაკიც ზედმეტია და სტიმულატორს შეჩვეული რომ ვყოფილიყავი, ასეთ დროს რაში დამჭირდებოდა? ესეც არალოგიკურია. ამიტომაც ვფიქრობ, რომ ურჩობისთვის სამაგიერო გადამიხადეს.

- თუ ასეთი დაძაბული ურთიერთობა გქონდათ, თქვენც წასულიყავით. ხომ გიწვევდნენ სხვადასხვა გუნდში?
- ამას თავად ვაპირებდი, მაგრამ კომპენსაციასაც ვითხოვდი. ასე იოლი არაა, კონტრაქტი დაარღვიო, თორემ პერმის "ამკარში" გადასვლა დღესაც რეალურია.

ყოველდღიური სპორტული გაზეთი "ლელო"