10 აგვისტოს რამდენიმე ქართველმა ლეგიონერმა ითამაშა. რუსულ პრემიერლიგაში კვლავ დამარცხდა ყაზანის "რუბინი". ამ გუნდისა და მისი ქართველი მცველის, საბა კვირკველიას უიღბლო სერიას დასასრული ჯერჯერობით არ უჩანს. ამჯერად, "რუბინი" მისი ყოფილი მწვრთნელის, ყურბან ბერდიევის გაწვრთნილ "როსტოვთან" დამარცხდა - 0:3. კვირკველიამ მოედანზე 90 წუთი გაატარა.
რუსეთის პირველ დივიზიონში კახა ალადაშვილის "სკა ენერგიამ" კალინინგრადში "ბალტიკასთან" 0:1 წააგო. ალადაშვილი თამაშში 55-ე წუთიდან ჩაერთო.
იმავე ლიგაში "არმავირმა" გასვლაზე 0:1 დათმო ნიჟნი ნოვგოროდის "ვოლგასთან". სტუმართა შორის სასტარტოში იყვნენ ჯღარკავა და ჭეჟია, ხოლო გეფერიძე სათადარიგო გახლდათ.
* * *
ლატვიურ ვირსლიგაში თამაზ პერტიას გაწვრთნილმა "სკონტომ" სტუმრად 5:1 მოუგო ლიეპაიას "მეტალურგს".* * *
პოლონურ ექსტრაკლასაში "რუხი" შინ დაუზავდა "პოდბესკიძიეს" - 1:1. როლანდ გიგოლაევი, რომელსაც საქართველოს ნაკრებში გამოძახების პერსპექტივა აქვს, "რუხის" მწვრთნელმა 55-ე წუთზე შეცვალა.ყოველდღიური სპორტული გაზეთი "ლელო"
