გიორგი არაბიძე: საქმე ისაა, რომ ქართველი ვარ და თამაშის უფლება არ მაქვს

დიდი ხანი არაა, რაც 17 წლის შემტევი გიორგი არაბიძე თბილისის "ლოკომოტივიდან" დონეცკის "შახტარში" გადავიდა. ამ დროისთვის უკრაინელთა ახალწვეული მხოლოდ ამხანაგურ შეხვედრებში თამაშობს.

არაბიძე ერთ-ერთი იმ ფეხბურთელთაგანია, სამომავლოდ ჩვენი ფეხბურთი ამ ღრმა კრიზისიდან რომ უნდა გამოიყვანოს. ამიტომ, მას მუდმივი სათამაშო პრაქტიკა სჭირდება.

"ლელო" მას ამ არაერთ საინტერესო საკითხზე ესაუბრა...

- უკვე გარკვეული დრო გავიდა მას შემდეგ, რაც დონეცკის "შახტარში" გადახვედით. როგორ მიდის თქვენი საქმეები უკრაინულ გრანდში?
- ძალიან კარგად, თითოეულმა ფეხბურთელმა, კლუბის თანამშრომელმა თუ ხელმძღვანელმა ძალიან კარგად მიმიღო. მოკლედ, ყველაფრით კმაყოფილი ვარ.

- ძირითად გუნდთან ერთად ვარჯიშობთ?
- დიახ, ძირითად გუნდთან ერთად. სულ ასეა, რაც აქ ჩამოვედი.

- ...მაგრამ ოფიციალურ მატჩებში ჯერ არ ჩანხართ...
- ჯერ მხოლოდ ორი ამხანაგური მატჩი ვითამაშე. ოფიციალურად თამაშის უფლება არ მაქვს, პასუხს ფიფასგან ველოდები.

- რა ხდება? რა პრობლემაა?
- საქმე ისაა, რომ ქართველი ვარ და თან ჯერაც არ ვარ 18 წლის. მოკლედ, ზუსტად ის პრობლემაა, რაც ევროპაში.

- რას ამბობენ? მალე მოგვარდება ეს პრობლემა?
- წესით, მალე უნდა მოგვარდეს. რომ დავინტერესდი, მითხრეს, 70 პროცენტით მალე ეშველება ამ ყველაფერსო. ვნახოთ, რა იქნება. ახლა მოლოდინის რეჟიმში ვარ, ყოველდღე ველოდები პასუხს.

- გამოდის, რომ ამ უფლების გარეშე ვერაფრით ითამაშებთ?
- ვერა, გამორიცხულია. თუ ფიფასგან ნებართვა არ ჩამოვიდა, ისე ოფიციალურ შეხვედრაში ვერ მივიღებ მონაწილეობას.

- თქვენი აზრით, ეს უფლება რომ გქონდეთ, ძირითად გუნდში დამკვიდრებას შეძლებდით?
- ზუსტად ამის თქმა ცოტა ძნელია ამ ეტაპზე. გეტყვით მხოლოდ ჩემს აზრს - ასე მგონია, სათადარიგოთა შორის ვიქნებოდი. ეს ჩემი ვარაუდია.

- "შახტარში" რას ამბობენ? მათ ხომ იცოდნენ, რომ ეს პრობლემა იქნებოდა?
- კი, იციან ჩემი პრობლემის შესახებ. მე მათზე კარგის მეტს ვერაფერს ვიტყვი. ყველაფერს აკეთებენ, რომ ეს პრობლემა მოგვარდეს. ძალიან უნდათ "შახტარის" ხელმძღვანელებსა და მწვრთნელებს, რომ ვითამაშო.

- როგორი ვარჯიშები აქვს მირჩა ლუჩესკუს?
- ძალიან მრავალფეროვანი, სახალისო ვარჯიშებია.

- საქართველოს შემდეგ უკრაინული დატვირთვების ატანა ხომ არ გაგიჭირდათ?
- არა, საერთოდ არ გამჭირვებია.

- როგორი გუნდია "შახტარი"? განსაკუთრებით ვის დაუმეგობრდით?
- გუნდი შესანიშნავია... არც ვიცი, რა ვთქვა... შედეგები ყველაფერზე მეტყველებს. რაც შეეხება დამეგობრებას, ასე ვერავის გამოვყოფ, ყველასთან ძალიან კარგად ვარ.

- გასულ სეზონში, დონეცკში არსებული ვითარების გამო, "შახტარი" ძალიან ხშირად იცვლიდა საცხოვრებელ ადგილს. ახლა სად ცხოვრობს გუნდი?
- კიევში ვართ. ვისაც უნდა, უმაღლესი კლასის სასტუმროში ცხოვრობს, ვისაც არა და, სახლები აქვთ აღებული და იქ ცხოვრობენ.

- თქვენ სად დაბინავდით?
- სანამ თქვენს კითხვას გავცემდე პასუხს, უნდა ვთქვა, რომ "შახტარში" იმედი აქვთ, რომ ექვს-შვიდ თვეში გუნდი დონეცკში დაბრუნდება. ვნახოთ, ეს ძალიან მნიშვნელოვანი და კარგი მოვლენა იქნება. რაც შეეხება ჩემს საცხოვრებელ ადგილს, მეც სახლი მაქვს აღებული და იქ ვცხოვრობ. ერთი შემიძლია ვთქვა - კიევში "შახტარი" შესანიშნავ პირობებში ცხოვრობს და კლუბის ხელმძღვანელობა ყველაფერს აკეთებს საიმისოდ, რომ ფეხბურთელმა მხოლოდ ფეხბურთზე იფიქროს.

- რა შეგიძლიათ თქვათ უკრაინის ჩემპიონატის დონეზე?
- მაღალი დონეა. თავადაც იცით, "შახტარი" ფავორიტია, მაგრამ გუნდს ყველა შეხვედრაში ძალების ბოლომდე დახარჯვა სჭირდება საიმისოდ, რომ სასურველ შედეგს მიაღწიოს. უკრაინის ჩემპიონატს ასეთი სპეციფიკა აქვს - ყველა გუნდი ბოლომდე იბრძვის და თუ თავი არ დადე, ისე თამაშს ვერ მოიგებ. ერთი წამითაც კი არ უნდა მოდუნდე, თორემ ეს მაშინვე თამაშის შედეგზე აისახება.

- კიევი განსაკუთრებული ქალაქია ბევრი საცდურით. შეგვიძლია, ვთქვათ, რომ ბოლომდე ფეხბურთს ეკუთვნით?
- ზომიერების დაცვა ყველგან საჭიროა და ფეხბურთში ეს უმთავრესია. მე ჩემს საქმეს არასდროს არაფერს დავაკლებ...

(იბეჭდება მცირე ცვლილებით)
ყოველდღიური სპორტული გაზეთი "ლელო"