26 წლის დავით თარგამაძე კარიერას უკრაინის ჩემპიონატის უმაღლესი ლიგის ბინადარ "ოლეკსანდრიაში" გააგრძელებს. კლუბსა და ფეხბურთელს შორის საიჯარო ხელშეკრულება გაფორმდა.კარგია, რომ თარგამაძემ ბოლოს და ბოლოს ახალი კლუბი იპოვა. იმედია, კალაპოტში ჩადგება. ბანალურად ჟღერს, მაგრამ უნდა ვთქვათ - საქართველოს დასაკარგი ფეხბურთელი არ ჰყავს...
ნაკრებში მის ანგარიშზე 18 მატჩი და 2 გოლია. სხვადასხვა დროს უთამაშია "ფრაიბურგში", იმავე "ოლეკსანდრიაში", "შახტარსა" და "ილიჩევეცში". დიახ, ეს მისი მეორედ მისვლაა "ოლეკსანდრიაში". ის კონტრაქტით კვლავ "შახტარის" კუთვნილებაა. ბოლო დროს ჩვენებური დონეცკურ კლუბში მხოლოდ ვარჯიშობდა...
ამ დროისთვის "ოლეკსანდრიას"
თარგამაძეს ინტერვიუსთვის უკრაინაში შევეხმიანეთ...
- პირველი ჟურნალისტი ხართ, ვისაც ამ ბოლო ამბავზე ინტერვიუს ვაძლევ. სამთვიანი საიჯარო ხელშეკრულება გავაფორმე "ოლეკსანდრიასთან". ზამთრამდე იქ ვიქნები.
- ანუ, ყველაფერი გადაწყვეტილია?
- კი, კონტრაქტი უკვე გავაფორმეთ. ყველანაირი ფორმალობა მოგვარებულია.
- "ოლეკსანდრიაში" ადრეც გითამაშიათ. დღეს რა მდგომარეობაშია ეს გუნდი?
- კარგი გუნდია. როგორც იცით, უკრაინის ჩემპიონატის უმაღლეს ლიგაში თამაშობს. თან გუნდს ვოლოდიმირ შარანი წვრთნის. ის ხელმძღვანელობდა "ოლეკსანდრიას" მაშინაც, როცა იქ ვთამაშობდი 2010-12 წლებში. არ დავმალავ, მწვრთნელის ფაქტორმაც მნიშვნელოვნად განაპირობა ჩემი არჩევანი.
მეორე მოტივაცია კი ის არის, რომ გარკვეული პაუზის შემდეგ ფეხბურთს დავუბრუნდები. ერთია ვარჯიში და მეორე - ოფიციალური მატჩები.
- თუ იყო სხვა ვარიანტები?
- იყო, მაგრამ არჩევანი მაინც "ოლეკსანდრიაზე" შევაჩერე. და თუ რატომ, უკვე გითხარით.
- რა მიზნები აქვს კლუბს?
- ახალი ფეხბურთელები არიან და ახალია პრეზიდენტიც. მიზანი - უკრაინის ჩემპიონატში რაც შეიძლება მაღალი ადგილის დაკავებაა.
- ახლა როგორ ფორმაში ხართ? ბოლო დროს მხოლოდ ვარჯიში გიწევდათ...
- ვარჯიშით ყოველდღე ვვარჯიშობდი. "შახტართან" ერთად შეკრებაც გავიარე. ახლა თამაშს დავიწყებ. ძალიან მიხარია, სისტემატური სათამაშო პრაქტიკა რომ მექნება.
- ბევრი ამბობს, დავით თარგამაძეს პრობლემატური ხასიათი აქვს, ფეხბურთს ყველაფერს არ აძლევსო. თუმცა ბევრი საწინააღმდეგოსაც ამტკიცებს. თქვენ რას იტყოდით?
- რაც უნდა ვთქვა, რამდენიც უნდა ვილაპარაკო, ხალხის აზრს მე ვერ შეცვლი. უბრალოდ, ბევრი პრობლემა იყო კლუბთან და ვერ მოვახერხე ამ პრობლემების გამო სხვაგან თამაში. ღმერთის წყალობით, ახლა სიტუაცია დალაგდა.
შეიძლება ითქვას, რომ ყველაფერს თავიდან ვიწყებ. უზომოდ გახარებული ვარ. ყველაფერს გავაკეთებ იმისთვის, რომ ეს დაკარგული წელიწადი ავინაზღაურო. მჯერა, კიდევ შევძლებ ვითამაშო ის ფეხბურთი, რომელიც მსურს.
- ბოლოს საქართველოს ნაკრებზეც ვთქვათ. როგორ უყურებთ ეროვნულ გუნდში მიმდინარე პროცესებს? ალბათ, იქ დაბრუნების გეიმედებათ...
- ძალიან რთულია, ასე მოკლე დროში გააკეთო პროცესების შეფასება. მე ვფიქრობ, პერსპექტიული ფეხბურთელები გვყავს და მჯერა, კახა ცხადაძე რესურსს მაქსიმალურად გამოიყენებს. რაც შეეხება ჩემს მოტივაციას, ყველაფერს გავაკეთებ, რომ დავბრუნდე ეროვნულ გუნდში. საქართველოს ნაკრები ჩემთვის ყველაფერია.
(იბეჭდება მცირე ცვლილებით)
ყოველდღიური სპორტული გაზეთი "ლელო"
