გიორგი ლორია სამარის "კრილია სოვეტოვთან" ერთად არაბთა გაერთიანებულ საემიროებში შეკრებაზეა. საქართველოს ნაკრებისა და რუსული პრემიერლიგის გუნდის მეკარემ 23 იანვარს ჩინურ "ხენან ცზიანისთან" თამაშიც მოასწრო და კარიც "მშრალად" შეინახა.ლორიამ "კრილიასა" და რუსულ პრემიერლიგაში სადებიუტო სეზონი ჩინებულად ჩაატარა. სხვადასხვა გამოცემამ ის რამდენჯერმე დაასახელა სიმბოლურ ნაკრებებში. ყოველკვირეული "ფუტბოლის" მიერ 2015 წლის საუკეთესო ფეხბურთელთა გამოკითხვაში ლორია 35-ე ადგილზე გავიდა. რუსეთში ცნობილმა ქართველმა ჟურნალისტმა და შოუმენმა ოთარ კუშანაშვილმა, ნუკრი რევიშვილთან ერთად, ლორია რუსეთის პრემიერლიგის 2015 წლის "სეზონის აღმოჩენად" მონათლა.
27 იანვარს გიორგი 30 წლის
"მეკარისთვის ეს მართლაც საუკეთესო ასაკია. რაც მთავარია, ძლიერი ლიგის გუნდში ვთამაშობ. ვეცდები, ისევ ისე გავაგრძელო თამაში, როგორც პირველი წრე დავამთავრე. მერე ვნახოთ, რა იქნება.
რაც მთავარია, პირველი შეკრება კარგად დამთავრდა - ტრავმის გარეშე! 27 იანვარს მეორე შეკრება დაიწყო. იმედია, მთლიანად სეზონიც კარგად წარიმართება", - ამბობს ლორია.
სამწუხარო ისაა, რომ მას მშვენიერი ტრანსფერის შანსი ჰქონდა, მაგრამ ქართული პასპორტით და საქართველოს ნაკრების დაბალი რეიტინგის გამო ეს შეუძლებელი აღმოჩნდა - "ჯვაროსნებისა" და "კრილიას" მეკარეს კარიერის გაგრძელებას ინგლისის ერთ-ერთ ყველაზე პოპულარულ კლუბ ლონდონის "ჩელსიში" სთავაზობდნენ.
დაინტერესებული იყო "ნოტინგემ ფორესტიც", მაგრამ დიდ ბრიტანეთში აკრძალულია ისეთი ნაკრების მოთამაშის აყვანა, რომელიც ფიფას რეიტინგში 70 ნაკრებს შორის არ არის. საქართველო კი, სამწუხაროდ, ასეულშიც არაა და ცხადია, ეს ტრანსფერიც გამოირიცხა.
იმედია, ლორიას მომავალი დაბადების დღისთვის საქართველოს ნაკრების რეიტინგიც გაუმჯობესდება და მასაც უკეთესი ლიგის უკეთეს გუნდში ვიხილავთ - 30 წელი ხომ მეკარისთვის მშვენიერი ასაკია...
(იბეჭდება მცირე ცვლილებით)
ყოველდღიური სპორტული გაზეთი "ლელო"
