ოთარ კაკაბაძე: "ხიმნასტიკის" დაინტერესება ჩემით აბურჯანიას დამსახურებაა

ფოტოზე: ოთარ კაკაბაძე და გიორგი აბურჯანია
"ლელოს" მკითხველმა უკვე იცის, რომ საქართველოს ეროვნული ნაკრების 20 წლის მცველმა ოთარ კაკაბაძემ 3-წლიანი კონტრაქტი გააფორმა ესპანურ "ხიმნასტიკთან", რომლის ღირსებასაც საქართველოს ნაკრების კიდევ ერთი ფეხბურთელი, საყრდენი ნახევარმცველი გიორგი აბურჯანია იცავს.

კაკაბაძეს "ლელო" ესპანურ პერსპექტივაზე ელაპარაკა.

- გილოცავთ "ხიმნასტიკში" გადასვლას. საინტერესოა, საიდან დაინტერესდა ეს გუნდი თქვენით?
- "ხიმნასტიკი" ჩემით რომ დაინტერესდა, ეს გიორგი აბურჯანიას დამსახურებაა. მან კლუბს ჩემზე ამომწურავი ინფორმაცია მიაწოდა. ასე რომ, უცხო ნამდვილად არ ვიყავი მათთვის. ამის შემდეგ დამაკვირდნენ და ისე მოხდა, რომ ამ გუნდის წევრი გავხდი.

- ახალ გარემოსთან ადაპტაცია არ გაგიჭირდებათ სწორედაც გიორგი აბურჯანიას ფაქტორის გამო...
- არა, ადაპტაციის მხრივ არანაირი პრობლემა არ იქნება. სწორად აღნიშნეთ, გიორგი აბურჯანიაც იქაა. ხელს შემიწყობს, ყველაფერში დამეხმარება.

- ხომ არ გისაუბრიათ გუნდის მთავარ მწვრთნელთან ან კლუბის ხელმძღვანელობასთან?
- არა, ჯერ არ გვილაპარაკია. ერთ რამეში დარწმუნებული ვარ - გუნდი მხოლოდ და მხოლოდ მაღალი მიზნებისთვის იბრძოლებს. მოგეხსენებათ, წინა სეზონში ერთი ნაბიჯი დააკლდა "ხიმნასტიკს" პრიმერაში გადასვლამდე. პლეი ოფში დამარცხდნენ...

- რა ინფორმაცია გაქვთ, თქვენს პოზიციაზე დიდი კონკურენცია იქნება?
- რა თქმა უნდა, იქნება კონკურენცია. ამის გარეშე ფეხბურთი არ არსებობს. კონკურენცია არ მაშინებს, პირიქით, ფეხბურთელის პროგრესისთვის ის აუცილებელიცაა. ყველა სიძნელეს უნდა გავუმკლავდე.

- მოგწონთ ესპანური ფეხბურთი?
- კი, ძალიან. შეიძლება ითქვას, რომ ამ ფეხბურთის ყურებით გავიზარდე.

- ესპანურ ენას თუ სწავლობთ?
- დიახ, უკვე რამდენიმე თვეა, ვსწავლობ ესპანურს. იქაც გავაგრძელებ სწავლას და ვფიქრობ, ამ მხრივ პრობლემა არ უნდა იყოს.

- თქვენ როგორ იცით, ახალი ფეხბურთელები კიდევ მოვიდნენ "ხიმნასტიკში"?
- ვიცი, რომ რამდენიმე ახალი მოთამაშე დაიმატეს და გუნდი კიდევ უფრო გაძლიერდა.

- ახლა თუ ხართ ოპტიმალურ ფორმაში?
- ორი კვირა დავისვენე და შემდეგ იმ პროგრამით დავიწყე მომზადება, რომელიც კლუბიდან გამომიგზავნეს.

- სხვა ვარიანტები თუ იყო?
- კარგა ხანია, "ხიმნასტიკის" ამბავი გადაწყვეტილი იყო. ამიტომაც არ მქონია სხვა ვარიანტები.

- ევროპის ჩემპიონატს როგორ აფასებთ?
- მთლიანობაში, კმაყოფილი ვარ, მაგრამ ისიცაა, რომ არაერთი მოსაწყენი თამაში ვნახეთ - შედეგზე ორიენტირებული. ესპანეთის ნაკრებმა, რომელსაც ბავშვობიდან ვქომაგობ, ნაადრევად დაასრულა ასპარეზობა. ახლა საფრანგეთის გამარჯვება მსურს...

(იბეჭდება მცირე ცვლილებით)
ყოველდღიური სპორტული გაზეთი "ლელო"