ევროთასები 2017/18. ჩვენ და პოლონელები: მეტოქე ფავორიტია, მაგრამ...

ფოტოზე: 2004/05. დინამო (თბ)-ვისლა 2:1. ბურთით მიხეილ კაკალაძე
იყო დრო, ბათუმის "დინამო" მართლაც ღირსეულად გამოდიოდა ევროპის საკლუბო ტურნირებზე და ძალიან ძლიერ მეტოქეებთან (შოტლანდიური "სელტიკი", ჰოლანდიური პსვ, სერბული პარტიზანი) მარცხის მიუხედავად, აჭარულ გუნდზე აუგი ვის უნდა დასცდენოდა! აღარაფერს ვამბობთ იმ ფაქტზე, თუ როგორი ანშლაგი იყო ხოლმე ბათუმის კოხტა სტადიონზე, ზედ შავი ზღვის სანაპიროსთან...

სამწუხაროდ, უკვე რამდენი წელიწადია, რაც ბათუმში საფეხბურთო სტადიონი დაანგრიეს და 2015 წელს, ევროტურნირებზე 17-წლიანი პაუზის მერე დაბრუნებულმა გუნდმა კვიპროსულ "ომონიასთან" "საშინაო" მატჩი ზესტაფონში გამართა, დღეს კი ქუთაისში უნდა უმასპინძლოს პოლონურ "იაგელონიას" - გუნდს, რომელიც ერთი თვის წინ დასრულებულ ჩემპიონატში კინაღამ ჩემპიონი გახდა!

- დინამო (ბთ) VS იაგელონია - დაივიწყეთ ყველა წარუმატებლობა!

თუმცა პოლონურ ექსტრაკლასაში II ადგილიც უდიდესი წარმატებაა არატრადიციული კლუბისთვის - მსგავსი შედეგი "იაგელონიას" მანამდე არასოდეს ჰქონია! ეგ კი არა, როცა გასული საუკუნის 90-იანი წლების მეორე ნახევარში ბათუმის "დინამო" მართლაც ღირსეულად ეპაექრობოდა ევროტურნირებზე "სელტიკსა" თუ პსვ-ს, იმ დროს "იაგელონია" პოლონეთის საფეხბურთო ჩემპიონატის მესამე-მეოთხე ლიგაში გამოდიოდა...

დღესდღეობით კი, ჩვენდა სამწუხაროდ, ამ წყვილში ფავორიტის (თანაც - გამოკვეთილის) სტატუსი "იაგელონიას" აქვს და ეს იმის მიუხედავად, რომ გასულ სეზონთან შედარებით, ამ გუნდიდან წამყვანი ფეხბურთელებიც წავიდნენ და, რაც მთავარია, ჩვენი მეტოქის ბოლოდროინდელი წარმატებების მთავარი შემოქმედიც, მთავარი მწვრთნელი მიხალ პრობიერჟი.

ამას გარდა, აუცილებლად აღსანიშნავია კიდევ ერთი ფაქტორიც: მოგეხსენებათ, რომ ბათუმის "დინამო" არცთუ სახარბიელოდ ასპარეზობს ეროვნულ ლიგაში და წინა სეზონისაგან განსხვავებით, ამჯერად ბევრად უფრო მოკრძალებული მიზნებიც გააჩნია.

თუმცა, ბათუმის "დინამოში" არაერთი ისეთი ფეხბურთელია, სხვადასხვა დროს და სხვადასხვა გუნდის შემადგენლობაში, რომლებთაც ასევე არაერთი მატჩი რომ ჩაუტარებიათ ევროტურნირებზე! ყველაფერს თავი რომ დავანებოთ, "იაგელონიას" ნამდვილად არა ჰყავს ისეთი ცნობადი და გამოცდილი ფეხბურთელები, როგორებიც დავით კვირკველია თუ ბათუმელთა სულ "ახალთახალი" ახალწვეული ოთარ მარცვალაძე არიან...

ისევე, როგორც თითქმის ყველა სხვა ქვეყნების წარმომადგენელთან, ევროტურნირებზე პოლონურ გუნდებთანაც უარყოფითი (თანაც, კატასტროფული!) ბალანსი გვაქვს და მხოლოდ ერთადერთხელ მოხდა, როცა მომდევნო ეტაპზე ქართული გუნდი გავიდა...

თუმცა, ძალიან ცუდად გასახსენებელია, რომ დამოუკიდებელი ქართული საკლუბო ფეხბურთის ისტორიაში, ევროტურნირებზე სარეკორდო ანგარიშით ორჯერ სწორედ პოლონურ გუნდებთან წავაგეთ.

საერთოდ კი, ევროტურნირებზე ქართულ-პოლონური გუნდების ურთიერთადაპირისპირებაში დღესდღეობით აი, ასეთი ბალანსია: 10 მატჩი, 2 მოგება, 0 ფრე, 8 წაგება, ბურთების სხვაობა - 9:29...

დამოუკიდებელი ქართული საკლუბო ფეხბურთის ისტორიაში მხოლოდ ერთადერთხელ მოხდა, როცა ჩვენმა გუნდმა ევროტურნირების მატჩში საკუთარ კარში... 8 გოლი გაუშვა! ჰო, დღესაც ძალიან მწარედ გვახსენდება 2004 წლის ზაფხული, როცა საქართველოს ახალმა ჩემპიონმა "ვიტ ჯორჯიამ" ვერაფერი დაუპირისპირა პოლონური "ვისლას" ფორვარდების მართლაც მრისხანე დუეტს, მაცეი ჟურავვსკისა და ტომაშ ფრანკოვსკის...

თუმცა, ისე მოხდა, რომ იმავე ზაფხულს "ვისლას" კიდევ ერთხელ მოუწია თბილისში ჩამოსვლა და პოლონური ფეხბურთის ერთ-ერთი ლეგენდის, ჰენრიკ კასპერჩაკის ხელმძღვანელობით მოასპარეზე კრაკოვური გუნდი ამჯერად უკვე დამარცხებული ტოვებდა "დინამოს" სტადიონს!

სხვათა შორის, ჟურავსკი-ფრანკოვსკის დუეტმა "დინამოსაც" გაუტანა კრაკოვში გამართულ იმ უხვგოლიან (4:3) მატჩში. ოღონდ საპასუხო დაპირისპირებაში გია გეგუჩაძის დამოძღვრილმა "დინამომ" გიორგი ნემსაძისა და მიხეილ კაკალაძის გოლებით ჩვენთვის სასურველი ანგარიშით დაამარცხა ძალიან ძლიერი მეტოქე და ამ გამარჯვებით უეფას თასის ჯგუფური ეტაპის საგზურიც მოვიპოვეთ!

...ისე, 2004 წელი "ქართულ-პოლონური საფეხბურთო ურთიერთობის წელიწადად" უნდა გამოცხადებულიყო: "ვისლასთან"... 4 (ოთხი!) დაპირისპირება ხომ ჰქონდათ ჩვენს გუნდებს, იმავე წლის ზაფხულში კიდევ ერთი პოლონური გრანდი, "ლეგიაც" გვერგო ევროტურნირებზე მეტოქედ.

სამწუხაროდ, ევროტურნირების დებიუტანტი და მეტად ახალგაზრდული (მწვრთნელ-ფეხბურთელებიანად) "თბილისი" უშანსოდ დამარცხდა "ლეგიასთან".

პოლონეთის ყველა დროის ერთ-ერთ საუკეთესო და ტიტულიან გუნდ "ლეგიას" ევროტურნირებზე შემდგომშიც დავუპირისპირდით, მაგრამ "თბილისის" მსგავსად, რუსთავის "ოლიმპმაც" ორივე მატჩი წააგო და ამ პოლონური გრანდის კარში ამჯერადაც ვერც ერთი გოლი ვერ გავიტანეთ...

ევროტურნირებზე ქართულ-პოლონური კიდევ ერთი დაპირისპირებაც ჩვენი გუნდის გამოვარდნით დასრულდა, მაგრამ ამ შემთხვევაში აშკარად იღბალმა გაგვწირა! თანაც, არც ადრე და არც ახლა, არასდროს ვყოფილვართ განებივრებულნი ისეთი შემთხვევებით, როცა ქართული გუნდი საპასუხო მატჩში ორბურთიან უპირატესობას აღმოფხვრავს.

არადა, მართლაც ასე მოხდა: გიორგი ჩიხრაძის ხელმძღვანელობით მოასპარეზე "ამერმა" დიმიტრი ტატანაშვილისა და სულიკო დავითაშვილის გოლებით განმეორებით მატჩში 2:0 მოუგო პოლონურ "ბელხატოვს", მაგრამ პენალტების სერიაში სტუმრებმა იმარჯვეს და მომდევნო ეტაპზეც გავიდნენ...

ყველა დაპირისპირება
2004/05 წელი
ჩემპიონთა ლიგა. II საკვალიფიკაციო ეტაპი
ვიტ ჯორჯია-ვისლა 2:8
ვისლა-ვიტ ჯორჯია 3:0

2004/05
უეფას თასი. II საკვალიფიკაციო ეტაპი
თბილისი-ლეგია 0:1
ლეგია-თბილისი 6:0

2004/05
უეფას თასი. III საკვალიფიკაციო ეტაპი
ვისლა-დინამო (თბ) 4:3
დინამო (თბ)-ვისლა 2:1

2007/08
უეფას თასი. I საკვალიფიკაციო ეტაპი
ბელხატოვი-ამერი 2:0
ამერი-ბელხატოვი 2:0, პენ 2:4

2009/10
ევროპალიგა. II საკვალიფიკაციო ეტაპი
ლეგია-ოლიმპი (რ) 3:0
ოლიმპი-ლეგია 0:1.

(იბეჭდება მცირე ცვლილებით)
ყოველდღიური სპორტული გაზეთი "ლელო"