ყარაბაღი VS სამტრედია - კავკასიური ფეხბურთის წრე

დღეს, 11 ივლისს, საქართველოს ჩემპიონი "სამტრედია" სტუმრად აზერბაიჯანულ "ყარაბაღს" დაუპირისპირდება. ჩემპიონთა ლიგის მეორე საკვალიფიკაციო ეტაპის პირველი მატჩი ბაქოში, ტოფიკ ბახრამოვის სახელობის რესპუბლიკურ სტადიონზე 21:00 სთ-ზე დაიწყება.

შეხვედრის ტელერეპორტაჟს "პირველი არხი" წარმოადგენს, ქალაქ სამტრედიაში კი დამონტაჟდება დიდი ეკრანი, სადაც ქომაგებს შეეძლებათ საყვარელი გუნდის თამაშს თვალი ერთად ადევნონ.

მატჩის წინა დღეს სამტრედიელებმა ბაქოს სტადიონზე ვარჯიში ჩაატარეს, გუნდების მთავარმა მწვრთნელებმა კი პრესკონფერენციაზე ჟურნალისტების კითხვებს უპასუხეს.

- გია ცეცაძე: "ყარაბაღთან" დაპირისპირებისთვის ბოლომდე მზად ვართ
- "ყარაბაღის" თავკაცი: ეს ის "სამტრედია" არაა, შარშან "გაბალასთან" 1:5

რომ წააგო


რეალურად, "სამტრედიაში" დიდი საკადრო ცვლილებები არ მომხდარა და ვერც იმას ვიტყვით, რომ გუნდი საევროპოდ გაძლიერდა: ევროთასებამდე ჩემპიონმა დაიმატა მეკარე ილია სტურუა, მცველი ბაკარი ბალდე და თავდამსხმელი ნიკა საბანაძე.

"ყარაბაღისა" და "სამტრედიის" მატჩს თურქ მსაჯთა ბრიგადა მოემსახურება, რაც უცნაურად ჩანს. არბიტრი 38 წლის სტამბოლელი ინჟინერ-მექანიკოსი მეთე კალკავანი იქნება, რომელსაც თურქეთის სუპერლიგის გარდა, იუნიორების ჩემპიონთა ლიგაში, ევროპალიგასა და შესარჩევი ციკლის სანაკრებო მატჩები უმსაჯია. ფიფას არბიტრი 2012 წლის 24 დეკემბრიდანაა.

სტატისტიკიდან ჩანს, რომ დიდად მკაცრი არ არის. ყოველ შემთხვევაში, დასრულებულ სეზონში ევროპალიგაზე ორჯერ იმსაჯა და 6-ჯერ გამოიყენა ყვითელი ბარათი. ის გაუძღვა "სამტრედიის" შარშანდელი მეტოქის, "გაბალასა" და უნგრული მტკ-ს მატჩს, რომელშიც ფეხბურთელებს 3 ყვითელი ბარათი აჩვენა - ერთი მასპინძლებს, ორიც - სტუმრებს. კალკავანს თანამემამულეები, ესათ სანჯაქთარი და ბაიიკ ერდემი დაეხმარებიან, მეოთხე მსაჯი კი ჰალილ უმუთ მელერი იქნება.

"სამტრედიის" მთავარმა მწვრთნელმა გია ცეცაძემ ბაქოში ეს შემადგენლობა იახლა:

მეკარე: ომარ მიგინეიშვილი, ილია სტურუა, ოთარ სტურუა;
მცველები: გიორგი მჭედლიშვილი, დავით მთივლიშვილი, ჯემალ გოგიაშვილი, ლაშა კასრაძე, ნიკა სანდოხაძე, დავით მანჯგალაძე, გიორგი ახალაძე, ბაკარი ბალდე, ვალერი ოლხოვი, ირაკლი დოლიძე;
ნახევარმცველები: გიორგი დათუნაიშვილი, გიგლა ბურკაძე, გიული მანჯგალაძე, თეიმურაზ მარკოზაშვილი, აკაკი ნინუა, დავით რაჟამაშვილი, გურამ სამუშია;
თავდამსხმელები: გიორგი ბერიაშვილი, დავით ჯიქია, ზაურ ხაბეიშვილი, ნიკა საბანაძე.

(იბეჭდება მცირე ცვლილებით)
ყოველდღიური სპორტული გაზეთი "ლელო"