2020 წელს ევროპის ჩემპიონატის დაწყებიდან 60 წელი სრულდება. ამასთან დაკავშირებით, მიშელ პლატინიმ თურქეთში გამართულ უეფას კონგრესზე რევოლუციური იდეა გაამხილა, რომ ევროპის ჩემპიონატს არა ერთმა ან ორმა ქვეყანამ, არამედ ევროპის 12-მა ან 13-მა ქალაქმა უმასპინძლოს.ცნობილი იყო, რომ პლატინის ინიციატივასთან დაკავშირებული დეტალები წლის ბოლოს გამჟღავნდებოდა და აგერ, ინებეთ: გერმანულმა ჟურნალმა "ბილდმა" დაადგინა, რომ უეფას პრეზიდენტი 27-28 ნოემბერს ბრიუსელში უეფას რამდენიმე წევრი ქვეყნის ფედერაციის ხელმძღვანელებს შეხვდება და პროექტს წარუდგენს, რომელსაც 7 დეკემბერს უეფას აღმასკომი განიხილავს, ევროპის ჩემპიონატის ახალი მოდელის თაობაზე გადაწყვეტილების მიღებას
"ბილდის" ინფორმაციით, პროექტს მხარს უჭერს გერმანიის საფეხბურთო კავშირის პრეზიდენტი ვოლფგანგ ნოიერბახი, რომელიც ვარაუდობს, რომ ბერლინი სამ შეხვედრას უმასპინძლებს.
"პლატინიმ საკუთარი გეგმები გამანდო, რომელიც აღმასკომს დღემდე არ დაუმტკიცებია. მას სურს, ჩემპიონატს ევროპის 13 ქვეყნის დედაქალაქმა უმასპინძლოს - სტამბულმა, ბერლინმა, მადრიდმა, ლისაბონმა, რომმა, ლონდონმა, ამსტერდამმა, მოსკოვმა, ზაგრებმა, ათენმა, პარიზმა და ბრიუსელმა.
გამონაკლისი შვეიცარია არის, სადაც კანდიდატად არა ბერნი, არამედ, ბაზელი განიხილება. ნახევარფინალსა და ფინალს კი სტამბული უმასპინძლებს, რადგან თურქეთის ქალაქი ფავორიტია.
"აღმასკომის თანხმობის შემთხვევაში, რვა წლის შემდეგ განახლებულ ევროპის ჩემპიონატს მივიღებთ", - განუცხადა გამოცემას ნოიერბახმა.
შეგახსენებთ, რომ პლატინიმ ამ იდეის განხორციელების აუცილებლობა მსოფლიოს ეკონომიკური კრიზისის შედეგებით ახსნა, რომ ევროპის ჩემპიონატის მასპინძლობა ნებისმიერ ქვეყანას მძიმე ტვირთად აწვება, რამდენიმე შეხვედრის მასპინძლობას კი ყველა მოახერხებსო.
ასეთ ფორმატში 2020 წლის ევროპის ჩემპიონატის მასპინძლობის პრეტენზია საქართველოსაც ჰქონდა. ჩვენი ფედერაციის პრეზიდენტმა ზვიად სიჭინავამ პლატინის შესთავაზა, ტურნირი პირველი ევროპის ჩემპიონის, საბჭოთა კავშირის ყოფილ ქვეყნებში ჩატარებულიყო და რადგან საბჭოთა ნაკრებში მესხი და მეტრეველი ბრწყინავდნენ, მასპინძლობის უფლება საქართველოსაც ეკუთვნის, მით უმეტეს, რომ მთავრობის მხარდაჭერაც გვაქვს და უეფას მოთხოვნების ნაწილს ვაკმაყოფილებთო.
იდეა მშვენიერია და პლატინის წამოწყებას კარგად ერგებოდა, მაგრამ არარეალურია, რაც ნოიერბახის კომენტარიდანაც დასტურდება - მასთან საუბარში პლატინის ევრო 2020-ის შესაძლო მასპინძელ ქალაქებში თბილისი არ უხსენებია. არადა, მაშინ სფფ-ის ერთ-ერთმა მაღალჩინოსანმა პირდაპირ გვითხრა, რომ ევრო 2020 პლატინის ამ იდეით თუ ჩატარდა, 90 პროცენტით ტურნირის ერთ-ერთი მასპინძელი საქართველოს დედაქალაქიც იქნებაო.
ჩვენ არც იმის შანსი გვაქვს, ბალკანელების მსგავსად, უახლოეს წლებში რეგიონული ტურნირი ჩავატაროთ და მწირი საფეხბურთო ცხოვრება გავიხალისოთ. შეგახსენებთ, რომ რეგიონში მშვიდობიანი თანაარსებობის აღსადგენად, სექტემბერში უეფა ბალკანეთის ლიგის დაარსებას დათანხმდა, სადაც ყოფილ იუგოსლავიაში შემავალი ქვეყნების კლუბები ითამაშებენ - სერბეთის, ჩერნოგორიის, ბოსნიის, მაკედონიის, ხორვატიის, სლოვენიის, პლუს უნგრეთ-ბულგარეთის.
ჩვენ ვინღა დაგვწყევლა? უდავოდ კარგი ამბავია, 2015 წელს ევროპის სუპერთასის მატჩს თბილისის "მიხეილ მესხზე" რომ ვუმასპინძლებთ. მაგრამ რეგიონული ტურნირების ხელისშემშლელი პრობლემების მოგვარების გზები არ ჩანს: ჩრდილოეთისკენ გახედვა არ გვინდა; აზერბაიჯანი და სომხეთი ერთმანეთთან საომარ მდგომარეობაში არიან და კავკასიური ლიგის დაარსება გამორიცხულია; თურქული ფეხბურთი ისე განვითარდა, ჩვენთან რეგიონული ტურნირი არ ხიბლავთ, ევროპის ჩემპიონატზე ოცნებაც ზედმეტია და საკუთარ წვენში ვიხარშებით.
უეფა და ფიფა გვეხმარებიან, მაგრამ ამაშიც სხვები გვჯობნიან: ახლახან ხორვატიის ფეხბურთის ფედერაციის ახალი პრეზიდენტი დავორ შუკერი პლატინისთან "ცარიელი" შევიდა და მომავალი წლისთვის ნაკრების ახალი ბაზისა და ოთხი რეგიონული საფეხბურთო ცენტრის დაფინანსებაზე დაითანხმა.
ეს იმ დროს, როდესაც ჩვენ გრანტს ოთხ წელიწადში ერთხელ მოგვიგდებენ ხოლმე.
(იბეჭდება მცირე ცვლილებით)
ყოველდღიური სპორტული გაზეთი "ლელო"
ასევე იხილეთ:
უეფას მოთხოვნები: რა აქვს შესასრულებელი საქართველოს?
უეფა 2015 წლის სუპერთასის მასპინძლობას ჯერ ბაქოს "ეხვეწებოდა"?!
ზვიად სიჭინავა: უეფას სუპერთასი თბილისში - ეს მხოლოდ დასაწყისია!
რევაზ არველაძე: ხომ შეიძლება ევროპის ჩემპიონატი ერთხელ ჩვენთანაც ჩატარდეს
