საქართველოს ეროვნული ჩემპიონატი ისეთი რამეა, სეზონში ერთი კაზუსი მაინც უნდა მოუვიდეს. წინა სეზონში ჩემპიონის გამოვლენას აღმასკომის სხდომის ჩატარება დასჭირდა, აგერ, ახლა კი ჩემპიონი გუნდის ფეხბურთელები გაიფიცნენ და ფეხბურთის ფედერაციამაც ჩემპიონატის კალენდარი შეცვალა უმაღლესი ლიგის კლუბებთან კონსულტაციის შემდეგ.
ახლ ეს ვიკითხოთ: ჩემპიონატის დებულების რომელი მუხლის თანახმად შეიცვალა კალენდარი? დებულების რომელ პუნქტში წერია, რომ თუ ერთი გუნდის ფეხბურთელები გაიფიცებიან, კალენდარი უნდა შეიცვალოს?
ერთი მხრივ კარგია, რომ "ზესტაფონის" პრობლემებს სხვა გუნდები გაგებით მოეკიდნენ, სოლიდარობა ფეხბურთშიც აუცილებელია, მაგრამ რამდენად კარგად ესმის ჩვენს საფეხბურთო მილეთს
ფიფას და უეფას სოლიდარობა ასე ესმით: ფულის შოვნა ხდება ძლიერი ეროვნული ასოციაციების ნაკრებებით და კლუბებით, მაგრამ სუსტები და ღარიბებიც არ არიან დავიწყებულები და ფინანსური მოგებიდან რაღაც წილი მათაც ერგებათ. თუ ფიფას ან უეფას წევრი ასოციაციის საქმეში ვიღაც უხეშად ჩაერევა, ეს ორგანიზაციები ყველანაირად შეეცდებიან თავიანთი წევრის ინტერესების დაცვას.
მოკლედ, ფიფა-უეფას პრინციპები ერთია და სულ სხვა არის ის, რაც ჩვენთან ხდება. ფეხბურთის ფედერაციამ და კლუბებმა ანგარიში გაუწიეს "ზესტაფონს", მაგრამ ვინ დაიცავს "ზესტაფონის" ფეხბურთელების ინტერესებს? სად არის აქ სოლიდარობა?
ჩვენთან შეიძლება, რომ გუნდი უმაღლესი ლიგიდან გავარდეს და მერე მაინც დარჩეს უმაღლეს ლიგაში.
ჩვენთან შეიძლება, რომ ფეხბურთის ფედერაციამ სეზონის დამთავრებამდე შეცვალოს დებულება და კონკრეტული გუნდი ამით უმაღლესი ლიგიდან გავარდნას გადაურჩეს.
ჩვენთან შეიძლება, რომ უმაღლესი ლიგის კლუბმა ლიცენზირება ვერ გაიაროს, მაგრამ ფეხბურთის ფედერაციის აღმასკომმა ამ კლუბის გუნდი მაინც დაუშვას უმაღლეს ლიგაში.
ჩვენთან შეიძლება, რომ ფეხბურთის ფედერაციის მაღალჩინოსანმა ერთი გუნდი გამოაცხადოს ჩემპიონად, ცოტა ხანში კი აღმასკომმა ჩემპიონობა სხვას მიაკუთვნოს.
ჩვენთან ყველაფერი მოსულა, თუ იქნება იმის გარანტია, რომ ყველაფერზე თვალი დაიხუჭება, რომ ყველაფერი წყალივით ჩაივლის.
"ზესტაფონი" საკმაოდ ძლიერი კლუბია და ალბათ მოახერხებს ამ სიტუაციიდან თავის დაღწევას, ოღონდაც საფეხბურთო სამყაროს ალბათ მართებს დაფიქრება იმაზე, თუ რატომ მოხდა ასე, თუ რა არის "ზესტაფონის" ამ კონკრეტული პრობლემის მიზეზი, რომელიც შესაძლოა, სხვაგანაც გაღვივდეს.
საქართველოში ხომ ისეთი კლუბიც მოიძებნება, პრეზიდენტმა საახალწლოდ რომ დააჯარიმა ფეხბურთელები არასასურველი შედეგის გამო...
ყოველდღიური სპორტული გაზეთი "ლელო"
ასევე იხილეთ:
ზესტაფონი VS ფეხბურთელები - ზესტაფონური აურზაური გრძელდება
