თბილისის "დინამო" - მშვენიერი განწყობით ჩემპიონთა ლიგის წინ [VIDEO]

საქართველოს ჩემპიონმა და თასის მფლობელმა თბილისის "დინამომ" 10 ივლისს ბოლო საკონტროლო მატჩი ჩაატარა ჩემპიონთა ლიგის მეორე საკვალიფიკაციო შეხვედრამდე.

დუშან უჰრინის გუნდის მეტოქე იყო პირველი ლიგის წარმომადგენელი "გაგრა".

აღსანიშნავია, რომ 10 ივლისამდე "დინამომ" 6 საკონტროლო მატჩი გამართა და მხოლოდ 3 გოლი გაიტანა; თუმცა, ნუ დაგვავიწყდება, თუ რა გუნდებთან მოუწია სპარინგშეხვედრების ჩატარება ჩვენს ყველაზე ტიტულოვან კლუბს - კიევის "დინამოსთან", დონეცკის "შახტართან", რუმინულ "კლუჟთან", "კრასნოდართან", მოსკოვის "დინამოსთან" და სომხეთის ჩემპიონ "შირაქთან".

და, აი, გოლთაცვენა შედგა: "დინამომ" მეტოქე "არ დაინდო" და დიდი ანგარიშით, 6:1 დაამარცხა. არადა, პირველი ტაიმი ფრედ (1:1) დამთავრდა.

ანგარიში დინამოელთა ახალწვეულმა ელგუჯა გრიგალაშვილმა გახსნა, თუმცა სულ მალე "გაგრას" ნიგერიელმა თავდამსხმელმა ჯონ ჯერემიამ წონასწორობა აღადგინა.

მეორე ტაიმში "დინამოს" უპირატესობა აშკარა იყო და ეს ანგარიშშიც აისახა: მასპინძლებმა (მატჩი დიღმის საწვრთნელ ბაზაზე გაიმართა) მეტოქის კარში 5 გოლი გაიტანეს. დინამოელთაგან "დუბლი" შეასრულეს ახალგაზრდა ფორვარდმა დათა ხოჭოლავამ და გამოცდილმა მარცხენაფლანგელმა დავით კვირკველიამ. ერთი გოლიც ლევან ხმალაძემ გაიტანა.


"დინამომ" ამ საკონტროლო მატჩში ასეთი შემადგენლობით ითამაშა:
გ. ლორია (46. ზარქუა) - ხურცილავა (57. სეთურიძე), გ. კვარაცხელია (46. შაშიაშვილი), გველესიანი (57. უსტარიცი), გლიშიჩი (81. კაკაბაძე) - ე. გრიგალაშვილი (57. ლექვთაძე), ძარია (46. ხმალაძე), პაპავა (65. შინდაგორიძე), მერებაშვილი (46. კვირკველია) - ჩისკო (46. დვალი), ხოჭოლავა (65. მიქაბერიძე).

"დინამოს" მომდევნო მატჩი კი უკვე ოფიციალური იქნება: 16 ივლისს "დინამო-არენაზე" ჩემპიონთა ლიგის მეორე საკვალიფიკაციო ეტაპის პირველ შეხვედრაში ფარერების ჩემპიონ "სტრეიმურს" უნდა ვუმასპინძლოთ. თუმცა, სულ მალე (შესაძლოა, 11 ივლისსაც) "დინამოში" კიდევ ერთი ახალწვეულის (უცხოელის) გამოჩენასაც უნდა ველოდოთ.

ყოველდღიური სპორტული გაზეთი "ლელო"

ასევე იხილეთ:
თბილისის "დინამო" ჩემპიონთა ლიგას "სტრეიმურით" იწყებს
დინამო (თბ)-დინამო (მ) 1:1 - საფეხბურთო მშვიდობა [VIDEO]
თბილისის "დინამო" და ევრორეალობა - ავსტრიული შეკრების შეჯამება
თბილისის "დინამოს" საევროპო სამზადისი - ავსტრიული ფრაგმენტები [VIDEO]
თბილისის "დინამო" და საკონტროლო მატჩები - სიახლეების მოლოდინი
დინამო-შახტარი 1:0 - კარგი განწყობა ჩემპიონთა ლიგის წინ [VIDEO]
დინამო (თბილისი)-დინამო (კიევი) 0:1 - პირველი სპარინგი ავსტრიაში [VIDEO]
დინამო-შირაქი 1:1 - ახა­ლი გუნ­დის კონ­ტუ­რე­ბი [VIDEO]