"გორის "დილას" წარმატება რეგიონში ფეხბურთის განვითარების სტიმულია"

შიდა ქართლის საფეხბურთო ცხოვრების განმსაზღვრელი ფაქტორი გორის "დილაა". ამ კლუბის წარმატებული გამოსვლა შიდა და ევროასპარეზზე არა მხოლოდ ამ რეგიონის, არამედ ზოგადად, გარკვეული სტიმულია ქართული ფეხბურთის განვითარებისთვის.

მაგრამ, ამას გარდა, რეგიონში არის პრობლემებიც, რომელიც დროულ რეაგირებასა და გადაჭრას ითხოვს. სწორედ ამის თაობაზე ვესაუბრეთ შიდა ქართლის ფეხბურთის ფედერაციის პრეზიდენტ გია რევაზიშვილს.

- ბატონო გია, "დილას" წარმატებები, ალბათ, დადებითად აისახება რეგიონში ბავშვთა ფეხბურთის განვითარებაზე, მასობრიობის თვალსაზრისით, მის კიდევ უფრო მაღალ დონეზე ასაყვანად...
- საფეხბურთო სკოლებში ვარჯიშის მსურველი პატარების რაოდენობის ზრდა აშკარაა, რადგან "დილას" ბოლოდროინდელი წარმატებები მათთვის გადამდებია. მსურს, "ლელოს" საშუალებით დიდი მადლობა ვუთხრა ყველას, ვინც გორის "დილას" ბოლო წლების აღმასვლაში თუნდაც მცირე წვლილი შეიტანა. სხვათა შორის, რეგიონს ახლახან კიდევ ერთი საფეხბურთო სკოლა შეემატა, რომელიც გორში სუხიშვილების უნივერსიტეტთან ერთად იფუნქციონირებს და მას მე ვუხელმძღვანელებ.

- რეგიონის არაერთი არენა სავალალო მდგომარეობაშია. ამას წინათ, "ლელო" ხაშურის "ივერიის" გაპარტახებული სტადიონის თაობაზეც წერდა. რა ეშველება ამ საქმეს?
- საქართველოს ფეხბურთის ფედერაციამ მომთხოვა და მიიღო დეტალური ინფორმაცია ჩვენი რეგიონის ყველა იმ სტადიონის მდგომარეობაზე, სადაც თავად ფედერაციის ან მისი რეგიონული სტრუქტურის მიერ ორგანიზებული ტურნირები იმართება. ფეხბურთის ფედერაციაში არსებობს კომისია, რომელიც ამ საკითხს შეისწავლის. კომისია ჩამოვა, ადგილზე გაეცნობა სიტუაციას და ეცდება, შესაძლებლობის ფარგლებში დაგვეხმაროს.

ამ მომენტისთვის, გორის ცენტრალური არენის გარდა, ნორმალურ მდგომარეობაშია, გორშივე, "ქართლისა" და აგარის სტადიონის მინდვრები, ხოლო ხაშურის, კასპისა და ქარელის სტადიონებზე საფარის მხრივ მწვავე პრობლემა გვაქვს. იმედია, ადგილობრივი მუნიციპალიტეტები ამ პრობლემის გადაჭრაში დაგვეხმარებიან.

- ხაშურის "ივერიას" წლეულს მეორე ლიგიდან პირველში გადასვლის საშუალება მიეცა, თუმცა ამაზე უარი თქვა, პირველ ყოვლისა, სწორედ საშინაო არენის უქონლობის გამო. კასპსა და ქარელს კი მეორე ლიგაშიც არ ჰყავთ გუნდები...
- კასპში ერთ-ერთი საუკეთესო ბავშვთა საფეხბურთო სკოლაა, რომელსაც სოფლებშიც აქვს გახსნილი ჯგუფები. ამ რაიონს თავისუფლად შეუძლია, მეორე ლიგაში ღირსეულად მოასპარეზე გუნდი ჰყავდეს. შარშან ქარელშიც ჰქონდათ სურვილი, აღედგინათ საფეხბურთო კლუბი "იბერია", რაზეც ამ რაიონის გამგებელიც მელაპარაკა, თუმცა წლეულს მუნიციპალიტეტები ძირითადად სოციალურ პროექტებს მიიჩნევენ პრიორიტეტად და საფეხბურთო პრობლემატიკის მოგვარება სამომავლოდ გადაიდო.

- თქვენ საფეხბურთო აკადემია "ქართლი 2011"-ის ერთ-ერთი დამფუძნებელიც ბრძანდებით. ამ აკადემიის საფეხბურთო კლუბმა "ქართლი 2011"-მა მაისში დასრულებული მეორე ლიგის გათამაშება დიდი უპირატესობით მოიგო, თუმცა პირველ ლიგაში გადასვლის ნაცვლად, ეს გუნდი დაიშალა. არადა, მისი მფლობელისგან ხმამაღალი დაპირებებიც გვესმოდა, კლუბში ათეულობით მილიონის ჩადებასთან დაკავშირებით...
- მართალი ხართ, ამ აკადემიის დამფუძნებელი, ჩემს მეგობარ, რუსეთში მცხოვრებ პაატა ფილიევთან ერთად, მეც გახლავართ. ფაქტობრივად, მე შევქმენი ეს აკადემია. თავიდან ყველაფერი ძალიან კარგად მიდიოდა, მაგრამ შემდეგ ფილიევმა ორგანიზაციაში რამდენიმე არაკომპეტენტური პირი მოიყვანა, რამაც უარყოფითად იმოქმედა აკადემიის განვითარებაზე. ცოტა ხანში მეც ჩამოვშორდი მის მმართველ სტრუქტურას. ვფიქრობ, იმ ეტაპზე საჭირო იყო აკადემიის განვითარების სხვა რელსებზე გადაყვანა, რაც არ მოხდა და დღესდღეობით, ფაქტობრივად, აღარც ფუნქციონირებს.

რაც შეეხება საფეხბურთო კლუბს, მისი დაარსება მთლიანად ფილიევის ინიციატივა იყო. მიმაჩნდა, რომ ვიდრე აკადემიის ბავშვთა საფეხბურთო სექციების აღზრდილებს არ დავეყრდნობოდით, არ იყო აუცილებელი მეორე ლიგაში გუნდის გაყვანა. ამას ხომ გაცილებით დიდი ხარჯი დასჭირდებოდა? ფილიევი შეგვპირდა კიდეც, რომ ფინანსური თვალსაზრისით ყველაფერი რიგზე იქნებოდა, მაგრამ ასე არ მოხდა. შედეგად კი, გუნდს, რომელმაც მთელი სეზონის განმავლობაში მხოლოდ ერთი მატჩი წააგო და პირველ ადგილზე დამსახურებულად გავიდა, 11 თვის ხელფასი აქვს მისაღები.

წარმოიდგინეთ, ამდენი ხნის განმავლობაში ანაზღაურებას ვერ იღებენ მწვრთნელები, აკადემიის ადმინისტრაცია, მომსახურე პერსონალი...

- ბოლო წლებში ბავშვთა სპეციალიზებული სპორტული სკოლა ძალიან ნაყოფიერად მუშაობს და მალე "დილას" პირველ გუნდსაც მიაწვდის ცვლას...
- მრავალი წლის განმავლობაში ამ სკოლის ხელმძღვანელი თავად გახლდით, თუმცა ახლა მას სხვები უდგანან სათავეში. მსურს, ყველა მწვრთნელს დიდი მადლობა გადავუხადო ნაყოფიერი მუშაობისთვის. "დილას" პერსპექტიული თაობა ეზრდება. როგორც მთავარი გუნდის, ისე საფეხბურთო სკოლის ინფრასტრუქტურის მოწესრიგებაში ძალზე დიდია ფეხბურთის ფედერაციის პრეზიდენტის, ზვიად სიჭინავას წვლილი. ჩვენ უნდა ვაფასებდეთ იმ ადამიანების საქმიანობას, ვინც მხარში გვიდგას რეგიონში ფეხბურთის განვითარების საქმეში.

- სამწუხაროდ, "დილამ" ევროპა ლიგის მატჩები საკუთარ ქალაქში ვერ ჩაატარა. არადა, გორელი მაყურებელი ფეხბურთს მხურვალედ ქომაგობს და საქართველოში ყველაზე მრავალრიცხოვანი დასწრებაც სწორედ გორშია. ამაზე რას იტყოდით?
- ბოლო პერიოდში სტადიონზე შესრულებულმა სამუშაოებმა საქართველოს ფეხბურთის ფედერაციას საშუალება მისცა, ასაკობრივი ნაკრებების მატჩების გორში ჩატარებაზე ეფიქრა.

უკვე გადაწყვეტილია, რომ საქართველოს 17-წლამდელთა ნაკრები ოქტომბერში გორის ცენტრალურ სტადიონზე ორ მატჩს გამართავს. სავარაუდოდ, შემოდგომაზე გორში ითამაშებს ახალგაზრდული ნაკრებიც. სამომავლოდ კი, იმედია, "დილას" გულშემატკივრები თავიანთი საყვარელი გუნდის ევროპულ მატჩებსაც გორის სტადიონზე ნახავენ.

ყოველდღიური სპორტული გაზეთი "ლელო"