თბილისის "ლოკომოტივი" ესპანურ შეკრებაზე "ბარსელონას" შეხვდება

შესაძლოა, პარადოქსულად ჟღერდეს: საქართველოში ერთ-ერთი ყველაზე ყურებადი გუნდი, რომელსაც საკმაოდ ბევრი მაყურებელიც ჰყავს, პირველი ლიგის B ზონაში თამაშობს და მხოლოდ მე-10 ადგილზეა.

მიზეზი ის არის, რომ ამ გუნდში ქართული ფეხბურთის მომავალი თამაშობს - მეკარე გაბი თებიძე, 19-წლამდელთა ნაკრების ყოფილი საყრდენი დაჩი ცნობილაძე რუსთავის "მეტალურგს" დაუბრუნდა, გიორგი კიკნაძე, გიორგი არაბიძე, ცოტნე მესხი, ლუკა ზარანდია...

ახლა მათ ზაფხულში ქუთაისის "ტორპედოში" გადასული, ვასილ მაისურაძის გაწვრთნილი 19-წლამდელთა ნაკრების წევრებიც დაემატნენ - ნიკა ჭანტურია, გიორგი გოროზია, დავით ჯიქია.

მათე ცინცაძე თბილისის "დინამოში" გადავიდა, ნიკა ახვლედიანი თავისუფალი აგენტი გახდა და მისი მომავალი ჯერ უცნობია.

"ბიჭებმა გადავწყვიტეთ, რომ "ლოკომოტივში" დავრჩეთ და ერთად ვითამაშოთ, რათა მაისამდე შვეიცარიაში გასამართ 19-წლამდელთა ელიტრაუნდს კარგად მომზადებულები და შეთამაშებულები შევხვდეთ", - გვითხრა 19-წლამდელთა ნაკრების კაპიტანმა ნიკა ჭანტურიამ.

თბილისის "ლოკომოტივი" 19-წლამდელთა ნაკრების მთავარმა მწვრთნელმა ვასილ მაისურაძემ დეკემბერში ჩაიბარა. მასთან მუშაობს საქართველოს 18-წლამდელთა ნაკრების მთავარი მწვრთნელი გიორგი დევდარიანიც. "ლოკომოტივში" საქართველოს ასაკობრივი ნაკრებების არაერთი წევრი და კანდიდატი თამაშობს და იმავე ნაკრებების მწვრთნელებს მათი კარგად მომზადების შანსი აქვთ.

ფეხბურთის ფედერაციის პრესსამსახურის ცნობით, მალე 19-წლამდელთა ნაკრების საბაზო კლუბი ესპანეთში შეკრებაზე გაემგზავრება და იქ საკონტროლო მატჩებს გამართავს: 28 იანვარს მისი პირველი მეტოქე "ბარსელონას" 19-წლამდელთა გუნდი იქნება.

დაგეგმილია შეხვედრები შვეიცარიული "ბაზელის" 21-წლამდელებთან და ნორვეგიულ "ოდ გრენლანდთან". ბოლო სპარინგს კი "ვალენსია B"-სთან ან "ერკულესის" 21-წლამდელებთან ჩაატარებს.

ვერაფერს იტყვი, მშვენიერი მეტოქეებია გუნდისთვის, სადაც საქართველოს ასაკობრივი ნაკრებების წევრები თამაშობენ. ასეთი მატჩები მათ აუცილებლად წაადგებათ.

(იბეჭდება მცირე ცვლილებით)
ყოველდღიური სპორტული გაზეთი "ლელო"